Read Tedim Chin 1 SAMUEL MASA 20 Bible Online

1 SAMUEL MASA 20 - Tedim Chin bible

1 SAMUEL MASA 20

¹Tua ciangin Ramah khuasung Naioth veng panin David tai-in, Jonathan kiangah hong tungin ama mai-ah, “Bang hih ka hi hiam? Ka mawhna bang ahi hiam? Amah in kei thah dingin hong zon nadingin na pa’ mai-ah ka khialhna bang om ahi hiam?” a ci hi.

²Tua ciangin amah in David kiangah, “Tua bang hi het lo ding! Na si kei ding hi. En in, ka pa in kei kiangah gen loin a lian hitaleh a neu hitaleh bangmah hihlo hi; bang hangin ka pa in kei tungah hih thu hong im ding ahi hiam? Tua bang hi lo hi,” a ci hi.

³Ahih hangin David in dawngin, “Nangma nong pahtaklam na pa in teltakin thei hi. Tua ahih manin amah in, ‘Amah dah kha ding ahih manin hih thu Jonathan theisak kei ning,’ ci-in ngaihsun hi. Ahih hangin a taktakin, TOPA nungta-in nang na nuntak mah bangin kei ka sih nading themkhat bek in sam hi,” a ci hi.

⁴Tua ciangin Jonathan in David kiangah, “Na gen peuhpeuh nang a dingin kong hihsak ding hi,” a ci hi.

⁵David in Jonathan kiangah, “En in, zing ciang pen Khadet ni hi a, kumpipa tawh sabuai-ah pel loin ka tut ding ahi hi. Ahih hangin a ni thum ni nitak dongin lo sungah ka buk theih nadingin kei hong paisak in.

⁶Na pa in kei hong kan leh, ‘David in ama khuapi Bethlehem-ah a va taipak dingin kei kiangah limtakin hong kingen hi; bang hang hiam cih leh amau innkuan khempeuh a dingin kumsim biakpiakna tua lai-ah om hi,’ na ci ding hi.

⁷Amah in, ‘Pha hi!’ a cih leh na nasempa a dingin a hoih hi ding hi; ahih hangin amah a heh leh amah in siatna a ngaihsutna thei in.

⁸Tua ahih ciangin thuman itna tawh na nasempa hong bawl in; bang hang hiam cih leh nang tawh a siangtho thuciamna-ah na nasempa na tunpih hi. Ahih hangin kei sungah mawhna a om leh, nangmahmah in kei hong that in; bang hangin na pa kiangah kei hong paipih ding na hi hiam?” a ci hi.

⁹Tua ciangin Jonathan in, “Nang tungah tua bang hi het kei hen! Ka pa in nang tungah siatna tung ding a ngaihsutna thei leng nang kiangah hong gen lo ding ka hi hiam?” a ci hi.

¹⁰Tua ciangin David in Jonathan kiangah, “Na pa in nang hong ngawh dawn leh kua in kei kiangah hong gen ding ahi hiam?” a ci hi.

¹¹Jonathan in David kiangah, “Hong pai in, lo sungah pai ni,” a ci hi. Tua ahih ciangin amau tegel lo sungah a pai uh hi.

¹²Tua ciangin Jonathan in David kiangah, “Israel-te’ Pasian, TOPA, teci hi ta hen! Zing ciang tubang hun ahi a, a ni thum ni-in ahi zongin, ka pa’ ngaihsutna tawng ka kankhiat khit ciangin, nangma tungah a lungsim a hoih leh, nang kiangah mi hong sawlin hong pulak lo ding ka hi hiam?

¹³Ahih hangin nang tungah siatna bawl nading in ka pa a lungkimsak leh, a muanhuaina-ah nang na pai theih nadingin nang kiangah a thu kong pulak kei a, nang kong sawlkhiat kei taak leh TOPA in keimah Jonathan hong dawm kei tahen. TOPA in ka pa a ompih mah bangin nang zong hong ompih tahen.

¹⁴Kei ka nuntak lai leh ka sih loh nadingin TOPA’ thuman itna kei tungah hong lak in.

¹⁵Keima innkuan panin na thumanna dokkik ngei kei in. Leitung maitang panin David’ galte khempeuh TOPA in a phiatkhiat ciangin,

¹⁶David’ innkuan panin Jonathan’ min phiatkhia kei in. TOPA in David’ galte tungah phu la ta hen,” a ci hi.

¹⁷Tua ciangin Jonathan in amah a itna David tungah kiciampha kik hi; bang hang hiam cih leh ama pumpi a it zahin amah in David a it hi.

¹⁸Tua ciangin Jonathan in ama kiangah, “Zing ciang pen Khadet ni ahi hi. Na tutna awng ding ahih manin nang hong kiphawk ding hi.

¹⁹A ni thum ni-in nakpitakin nang hong kiphawk kanzaw lai ding hi. A thu a kikup ciangin na bukna-ah pai inla, suangcian hua lampangah om in.

²⁰Tua ciangin muitum bangin tua lampangah thaltang thum ka lawn ding hi.

²¹Naupang khat sawlin ama kiangah, ‘Pai in; thaltangte va zong in,’ ka ci ding hi. Naupang’ kiangah, ‘En in, nangma kiang hih lamah thaltangte om hi, tawm in,’ ka cih leh nang a hong pai ding na hi hi; bang hang hiam cih leh TOPA a nungta ahih mah bangin nang a dingin lungmuanhuai-in launa om lo hi.

²²Ahih hangin tangvalpa kiangah, ‘En in, thaltangte nangma khen ah om hi,’ ka cih leh, nang paikhia in; bang hang hiam cih leh TOPA in nang hong sawlkhia hi.

²³Nang le kei in i gen thu tawh kisai-in ahihleh, nang le kei kikalah TOPA om tawntung hi,” a ci hi.

²⁴Tua ahih ciangin lo sungah David bu hi. Khadet ni hong tun ciangin an ne dingin kumpipa tu hi.

²⁵A nidanga bangin kawm gei-a a tutna tung, ama tutna-ah kumpipa tu hi. A kigalsai-in Jonathan tu-in, Saul’ pangah Abner tu a, ahih hangin David’ mun a awng hi.

²⁶Ahi zongin Saul in tua ni-in bangmah gen lo hi; bang hang hiam cih leh amah in, “Ama tungah thu khatpeuh piang hi ding hi; amah siang lo hi; siang lo taktak hi,” a ci hi.

²⁷Ahih hangin a ni nih ni, Khadet ni khit a zing ciangin David’ mun awng lai hi. Tua ciangin Saul in a tapa Jonathan kiangah, “Bang hangin Jessi’ tapa zanni hitaleh tuni hitaleh an nekna-ah hong pai lo ahi hiam?” a ci hi.

²⁸Jonathan in Saul dawngin, “Bethlehem-ah a pai dingin limtakin kei tungah David hong kingen hi.

²⁹Amah in, ‘Kei hong ciahsak in; ka innkuante un khua sungah biakpiakna bawl uh a, ka sanggampa in tua lai-ah ka om ding thu hong pia hi. Tua ahih ciangin tu-in nong hehpihna-in hong paisakin ka sanggamte hong musak in,’ hong ci hi. Hih thu hangin kumpipa’ sabuai-ah amah hong pai lo hi,” a ci hi.

³⁰Tua ciangin Jonathan tungah Saul heh mahmahin ama kiangah, “A kiheikhial, a lehdo numei’ tapa aw, nangma maizum nading le na nu’ mindai nadingin Jessi’ tapa na pawlpihna thu a thei lo hong sa na hi hiam?

³¹Bang hang hiam cih leh leitungah Jessi’ tapa a nuntak laiteng nang na hi a, na kumpi za ahi zongin kip lo ding hi. Tua ahih ciangin mi sawl inla, kei kiangah amah hong paipih in. Amah a si taktak ding hi,” a ci hi.

³²Tua ciangin Jonathan in a pa Saul dawngin, “Bang hangin amah kithat ding ahi hiam? Amah in bang hih ahi hiam?” a ci hi.

³³Ahih hangin Saul in amah a khawhkha dingin ama lamah a teipi lawn hi. Tua ahih ciangin a pa in David thah ding a ngaihsutna Jonathan in theitel hi.

³⁴Tua ciangin heh mahmahna tawh sabuai panin Jonathan ding khia a, tua pawi a ni nih ni-in an ne lo hi. Bang hang hiam cih leh a pa in David minsiasak ahih manin ama hangin a dah hi.

³⁵A zing ciangin David tawh a kiciamna lo-ah Jonathan pai-in, amah tawh naupangno khat pai hi.

³⁶Amah in a naupang kiangah, “Tai inla ka thaltang lotte va tawm in,” a ci hi. Naupang a tai laitakin ama khen ah a thaltang khat lawn hi.

³⁷Jonathan’ thaltang lot a tukna munah naupang a tun ciangin Jonathan in a naupang samin, “Nang’ khen’ hua lamah thaltang om hi lo ahi hiam?” a ci hi.

³⁸Tua ciangin Jonathan in naupang samin, “Manlang in; hong kinawh in; tua lai-ah om kei in,” a ci hi. Tua ahih ciangin Jonathan’ naupang pa in a thaltangte khawmin a topa kiangah a paipih hi.

³⁹Ahih hangin naupang in bangmah thei lo a, Jonathan le David bek in a thu thei uh hi.

⁴⁰Tua ciangin Jonathan in a hiamte a naupang pa kiangah pia-in ama kiangah, “Pai inla, khuapi sungah ciahpih in,” a ci hi.

⁴¹Naupang a paikhiat khit phetin suangcian pang panin David dingin lei-ah maipuk a, thumvei kun hi. Jonathan sangin David nakpitakin dahzaw a, amau khatlekhat kinamin, khitui luangin khatlekhat kikah uh hi.

⁴²Tua ciangin Jonathan in David kiangah, “Ei tegel TOPA’ min tawh kiciamin, ‘Kei le nang kikal, le keima suanlekhakte le nangma suanlekhakte kikalah a tawntungin TOPA om ding hi,’ i cih mah bangin nuamtakin pai in,” a ci hi. Tua ciangin amah dingin paikhia a, Jonathan zong khuapi sungah a ciah hi.