Read Tedim Chin 1 SAMUEL MASA 21 Bible Online

1 SAMUEL MASA 21 - Tedim Chin bible

1 SAMUEL MASA 21

¹Tua ciangin Nob khua-a siampipa Ahimelek kiangah David pai hi. Ahimelek a lingsa-in David a dawn dingin hong pai-in ama kiangah, “Bang hangin nang guak hong hi a, kuamah hong tonpih lo na hi hiam?” a ci hi.

²David in siampi Ahimelek kiangah, “Kumpipa in na khat hong sawlin kei kiangah, ‘Nang kong sawlna le nang kong hilh thute khat zong kuamah theisak kei in,’ hong ci hi. Tua mun tua munah tangvalte tawh kiciamna khat ka bawlzo hi.

³Tua ahih ciangin tu-in nang bang nei na hi hiam? Anlum lum nga ahih kei leh hih lai-a a om peuhpeuh hong pia in,” a ci hi.

⁴Siampipa in David dawngin, “Tutakin anlum mawkmawk ka nei kei hi; ahih hangin anlum siangtho om hi; tangvalte numei panin a kikep nak-uhleh la in,” a ci hi.

⁵Tua ciangin David in siampipa dawngin, “A taktakin ci lehang, hih bangin ka paikhiat uh ciangin numeite kiang panin kote ka kikem tawntung uh hi. Khualzin mawkmawk ciang nangawnin zong tangvalte siangtho hi. Tuni-in amaute bangzahin siangthozaw kan ding ahi hiam?” a ci hi.

⁶Tua ahih ciangin siampipa in anlum siangtho amah pia hi. Bang hang hiam cih leh anlum dang om lo a, a kilakkhiat ni-in anlum a lum lai tawh a kilaih pah ding, TOPA’ mai panin a kilakhia Ompihna Anlum bek om hi.

⁷Tua laitakin TOPA’ mai-ah biakna vai-in a om, Saul’ nasemte mi khat tua lai-ah na omkha hi. Ama min Doeg hi a, Saul’ gancing makai pa hi a, Edom mi ahi hi.

⁸Tua ciangin David in Ahimelek kiangah, “Teipi ahi a, namsau ahi zongin hih lai-ah nei lo na hi hiam? Bang hang hiam cih leh kumpipa’ nasep pen nawhtat ding kul ahih manin ka namsau ahi a, ka hiamte ahi zongin ka la man kei hi,” a ci hi.

⁹Siampipa in, “Elah kuamah na thah Filistia mi Goliath’ namsau, puan tawh kitunin hih lai-ah siampipuan nungah om hi. Tua na deih leh la in. Bang hang hiam cih leh adang om lo a, tua bek hih lai-ah om hi,” a ci hi. David in, “Tua sanga hoihzaw adang om lo hi; kei hong pia in,” a ci hi.

¹⁰David dingin tua ni-in Saul kiang panin tai a, Gath kumpipa Akhish kiangah pai hi.

¹¹Akhish’ nasemte in ama kiangah, “Hih David, a gam kumpipa hi lo ahi hiam? Amaute khatlekhat in ama thu la-in sa-in laam uh a, ‘Saul in a tulin that, David in a tul sawmin that,’ ci hi lo ahi uh hiam?” a ci uh hi.

¹²David in hih thute a lungsimah ciamteh a, Gath kumpipa Akhish kihta mahmah hi.

¹³Tua ahih ciangin amaute’ mai-ah a gamtat kheelin, amaute’ muhna-ah a hai-in kibawl a, kulhkongkhakte tung kui gawpin, a khamul tungah a cilphuan kaisuksak hi.

¹⁴Tua ciangin Akhish in a nasemte kiangah, “En un, hih mipa a hai ahihlam na mu uh hi. Tua ahih ciangin bang hangin kei kiangah amah hong paipih na hi uh hiam?

¹⁵Ka omna-ah mihai-a gamta dingin hih mipa nong paipih nadingun mihai kisam thuah lai ka hi hiam? Hih mipa ka inn sungah hong pai ding ahi hiam?” a ci hi.