Read Tedim Chin 1 SAMUEL MASA 23 Bible Online

1 SAMUEL MASA 23 - Tedim Chin bible

1 SAMUEL MASA 23

¹Tu-in amaute in David kiangah, “En in, Filistia-te in Keilah khua sim uh a, a ancilnate uh luh uh hi,” ci-in a gen uh hi.

²Tua ahih ciangin David in TOPA thu dongin, “Pai-in Filistia-te ka sim ding hiam?” a ci hi. TOPA in David kiangah, “Pai-in Filistia-te sim inla, Keilah khuamite honkhia in,” a ci hi.

³Ahih hangin David’ mite in ama kiangah, “En in, Judah gam hih munah eite i lau hi. Filistia galkapte simin Keilah-ah pai lehang bangzahin lauzaw ding ihi hiam?” a ci uh hi.

⁴Tua ciangin David in TOPA thu dongkik hi. TOPA in amah dawngin, “Ding in; Keilah-ah paisuk in; bang hang hiam cih leh na khut sungah Filistia-te kong pia ding hi,” a ci hi.

⁵Tua ciangin David le a mite Keilah-ah paisuk uh a, Filistia-te tawh kido-in amau’ ganhingte ciahpihin amaute tampi tak a that uh hi. Tua ahih ciangin David in Keilah-a teng mite a honkhia hi.

⁶David kiang Keilah-ah Ahimelek’ tapa Abiathar a tai lai-in amah in siampipuan khat kengin paisuk hi.

⁷Keilah-ah David a tunkhitna thu tu-in Saul kiangah kigen hi. Saul in, “Pasian in ka khut sungah amah hong pia khin hi; bang hang hiam cih le kulhkongpi le a kalhna zawl a nei khua sungah lutna tawh amahmah kikhaknelh hi,” a ci hi.

⁸Tua ciangin Saul in galsim ding, Keilah khua-ah a paisuk ding, David le a mite a umcih dingin mi khempeuh a sam hi.

⁹Saul in ama tungah a sia a sawmna David in thei hi. Amah in a siampi Abiathar kiangah, “Hih lai-ah siampipuan hong paipih in,” a ci hi.

¹⁰Tua ciangin David in, “Israel-te’ Pasian, TOPA aw, keima hangin khuapi susia dingin Saul in Keilah-ah pai hong sawmna thu na nasempa in za khin taktak hi.

¹¹Keilah mite in ama tungah kei hong ap ding hiam? Na nasempa’ zak bangin Saul hong paisuk ding hiam? Israel-te’ Pasian, TOPA aw, kong thum hi, na nasempa tungah hong gen in,” a ci hi. Tua ciangin TOPA in, “Amah hong paisuk ding hi,” a ci hi.

¹²Tua ciangin David in, “Keilah mite in kei le ka mite Saul’ tungah hong ap ding uh hiam?” a ci hi. Tua ciangin TOPA in, “Amaute in note hong ap ding uh hi,” a ci hi.

¹³Tua ciangin mi zaguk bang a pha, David le a mite dingin Keilah panin kihemkhia uh a, amaute a pai theihna peuhpeuh uhah pai uh hi. Keilah panin David a suahtakna thu Saul kiangah a kigen ciangin amah in a vai a khawl phot hi.

¹⁴Zif gamlak mualtung gam sung, gamlak munmuanhuaina-ah David om hi. Saul in nisimin amah zong a, ahih hangin Pasian in ama tungah David pia lo hi.

¹⁵Amah a that dingin Saul kuankhia khin ahih manin David a lau hi. Zif gamlak Horesh munah David om hi.

¹⁶Tua ciangin Saul’ tapa Jonathan dingin David kiang Horesh-ah pai a, Pasian in hong huh ding hi, ci-in amah a hanthawn hi.

¹⁷Amah in David kiangah, “Lau kei in; bang hang hiam cih leh ka pa Saul in nang hong sukhalo ding hi. Nang pen Israel-te tungah kumpi na hi ding a, kei pen nangma zom ka hi ding hi; ka pa Saul in zong hih thu thei hi,” a ci hi.

¹⁸Tua ciangin amau tegel in TOPA’ mai-ah thuciamna bawl uh hi. Horesh-ah David om lai-in, Jonathan a inn-ah a ciah hi.

¹⁹Tua ciangin Saul’ kiang Gibeah-ah Zif mite paito uh a, “Jeshimon leitaw lam, Hakhilah mualtung, Horesh a munmuanhuai sung kote’ lakah David om hi lo ahi hiam?

²⁰Tu-in hong paisuk in, kumpipa aw; amah na matnopna thu thei ka hih manun hong paisuk in. Kote’ hih ding ahihleh kumpipa tungah amah kong ap ding uh ahi hi,” a ci uh hi.

²¹Tua ciangin Saul in, “TOPA in note thupha hong pia ta hen. Bang hang hiam cih leh note in kei tungah hehpihna nong nei uh hi.

²²Pai-in va kiciansak lai un. Ama bukna mun thei-in va mu unla, tua lai-ah kua in mu hiam, hong thei un. Bang hang hiam cih leh amah ngiansiam mahmah hi, ci-in kei tungah hong kigen hi.

²³Tua ahih ciangin amah a bukna, a kiselsimna mun khempeuh hong ciamteh unla, thu a kiteltak tawh kei kiangah hong paikik un. Tua ciangin note tawh kei kong kuan ding hi. Gam sungah amah a omlai nakleh , Judah gam sung khempeuh zon ding ahi zongin a tul lak panin amah ka zongkhia teitei ding hi,” a ci hi.

²⁴Amaute ding uh a, Zif-ah a pai dingin Saul’ mai-ah a na ma pai uh hi. Tu-in David le a mite Jeshimon leitaw lam Arabah gam sung Maon gamlakah om uh hi.

²⁵Saul le a mite amah a zong dingin kuan uh hi. Hih thu David kiangah kigen hi. Tua ahih ciangin Maon gamlak a om suangpi-ah amah paisuk hi. Saul in tua thu a zak ciangin amah in Maon gamlakah David delh hi.

²⁶A mualpang khatah Saul pai a, David le a mite a mualpang langkhatah pai uh hi. Saul le a mite in David le a mite a man dingin hong um uh ahih manin Saul a pelh dingin David a nawhtai laitakin,

²⁷Saul kiangah kamtai khat hong tung a, “Hong kinawh inla hong ciah in; bang hang hiam cih leh Filistia-te in gam sung hong sim hi,” a ci hi.

²⁸Tua ahih ciangin David a delhna panin Saul kileh kik a, Filistia-te a do-in a pai hi. Tua ahih ciangin tua mun pen Kikhenna Mual kici hi.

²⁹Tua lai panin David paito-in Engedi munmuanhuai-ah a om hi.