Read Tedim Chin 1 SAMUEL MASA 24 Bible Online

1 SAMUEL MASA 24 - Tedim Chin bible

1 SAMUEL MASA 24

¹Filistia-te a delhna panin Saul a ciah ciangin ama kiangah, “En in, Engedi gamlakah David om hi,” ci-in kigen hi.

²Tua ciangin Saul in Israel-te khempeuh sung pan a kiteel mihing tulthum la-in Sathak Suangpi mai-ah David le a mite a zong dingin a pai hi.

³Lam gei-a tuukhawk omna-ah a pai hi. Tua gei-ah leihawm khat om a, awng hawh dingin tua sungah Saul a pai hi. Tu-in David le a mite tua leihawm tawngnung sungah na tu uh hi.

⁴Tua ciangin David’ mite in ama kiangah, “TOPA in nang kiangah, ‘En in, na khut sungah na gal pa kong pia ding a, hoih na sak bangin ama tungah na hih ding hi,’ hong cih pen tuni hita hi,” a ci uh hi. Tua ciangin David dingin Saul’ puantualpi mong atkhiatsak sim hi.

⁵Tua khit ciangin amah in Saul’ puanmong a atkhiat manin David a lungsim nuamthei nawn lo hi.

⁶Amah in a mite kiangah, “Amah pen TOPA’ sathau nilh pa hi, ci-in a thei gegupi-in ama tungah ka khut ka ngak ding, TOPA’ sathau nilh pa ahi ka topa tungah hih bang ka hih ding TOPA in hong kham hi,” a ci hi.

⁷Tua ahih ciangin David in hih thute tawh a mite zol a, amaute Saul hihsak lo hi. Tua ciangin Saul ding khia-in leihawm nusia a, a pai nading lampi-ah a paisuak hi.

⁸Tua khit ciangin David zong leihawm sung panin paikhia-in Saul nung sap a, “Ka to kumpipa!” a ci hi. Saul in a nung a et ciangin David in lei-ah a mai kunin zahtakna a bawl hi.

⁹Tua ciangin David in Saul kiangah, “Bang hangin, ‘En in, David in na siat nading zong hi,’ a ci mite’ thu um na hi hiam?

¹⁰En in, TOPA in tuni-in leihawm sung, ka khut sungah nang hong piakna nangmahmah in tuni-in na thei khin hi. Mi pawlkhat in nang a that dingin kei hong sawl a, ahih hangin nang kong hih kei hi. Keimah in, ‘Ka topa tungah ka khut ka nga kei ding hi; bang hang hiam cih leh amah pen TOPA’ sathau nilh pa ahi hi,’ ka ci hi.

¹¹En in, ka pa aw, ka khutsunga na puantualpi mong en in. Kei tungah khialhna ahi a, kumpi dona ahi zongin a om lohna, na puantualpi mong atkhia napi-in nang kong thahlohna thu tawh thei-in na mu ding hi. Kei thah dingin nong zon hangin nang tungah ka khial kei hi.

¹²TOPA in kei le nang kikalah thu hong khen tahen. TOPA in kei tangin nang tungah hong thuk tahen. Ahih hangin keima khut tawh nang kong hih kei ding hi.

¹³Tang-ate’ paunak in, ‘A gilote’ sung panin gitlohna hong piang,’ a cih mah bang ahi hi. Ahih hangin keima khut tawh nang kong hih kei ding hi.

¹⁴Israel kumpipa kua do-a hong kuankhia ahi hiam? Kua delh na hi hiam? Uisi maw! Uili maw!

¹⁵Tua ahih ciangin TOPA thukhen hong hi-in, kei le nang kikalah thukhenna hong pia hen la, hih thu thei-in ka thu-ah hong pang hen la, na khutsung panin kei hong honkhia ta hen,” a ci hi.

¹⁶David in hih thute Saul kiangah a gen a man khit ciangin Saul in, “Ka tapa David, tu-a ka zak nang’ aw ahi hiam?” a ci hi. Tua ciangin Saul a kap hi.

¹⁷Amah in David kiangah, “Nang pen kei sangin na thuman zaw hi. Keimah in nang tungah a sia kong bawl laitakin nang in kei tungah a pha nong bawl hi.

¹⁸TOPA in na khut sungah kei hong koih laitakin nang in kei nong thah lohna-ah kei nong limbawlna tu-in na hong laktel hi.

¹⁹Bang hang hiam cih leh mi khatpeuh in a gal pa mu leh amah in a suakta-in a gal pa paikhiasak ding ahi hiam? Tua ahih ciangin tuni-in kei tungah nong bawlna hangin TOPA in a hoih tawh nang thaman hong pia tahen.

²⁰Tu-in en in, kumpi na hih taktak ding ka thei hi. Israel kumpi gam nangma khut sungah a kip ding hi.

²¹Tua ahih ciangin keima nunga ka suanlekhakte beisak loin, ka pa’ innkuan panin ka min na phiat loh nadingin TOPA’ min tawh kei tungah hong kiciam in,” a ci hi.

²²Tua ciangin Saul’ deih bangin David a kiciam hi. Tua ciangin Saul a inn-ah a ciah hi. Ahih hangin David le a mite munmuanhuai-ah paito uh hi.