Read Tedim Chin 1 SAMUEL MASA 28 Bible Online

1 SAMUEL MASA 28 - Tedim Chin bible

1 SAMUEL MASA 28

¹Tua hunin Filistia-te in Israel-te a sim dingin a galkapte khawm uh hi. Akhish in David kiangah, “Nang le na mite, kei tawh galkapte lakah a kuankhawm ding na hihlam thei in,” a ci hi.

²David in Akhish kiangah, “Hoih mahmah hi; na nasempa in bang hih thei hiam, cih na thei ding hi,” a ci hi. Tua ciangin Akhish in David kiangah, “Hoih mahmah hi; khan tawntungin keimah a hong cing dingin nang kong koih ding hi,” a ci hi.

³Tu-in Samuel si khin a, Israel-te khempeuh ama hangin kapin, ama khuapi Ramah-ah vui uh hi. Saul in vankahte le aisante a gam sung panin beisak hi.

⁴Filistia-te kikhawm uh a, hong pai-in Shunem-ah giahphual sat uh hi. Saul in Israel-te khempeuh khawm a, amaute in Gilboa-ah giahphual sat uh hi.

⁵Saul in Filistia galkapte a muh ciangin lau a, a lungsim nakpi takin ling hi.

⁶Saul in TOPA tungah thu a dot ciangin, TOPA in mang tawh hitaleh, Urim tawh hitaleh, kamsangte tawh hitaleh dawng lo hi.

⁷Tua ciangin Saul in a nasemte kiangah, “Ama kiangah pai-in ama tung pan thu ka dot theih nadingin vankahthei numei khat kei a dingin hong zonsak un,” a ci hi. A nasemte in ama kiangah, “En in, Endor-ah vankahthei khat om hi,” a ci uh hi.

⁸Tua ahih ciangin Saul in a mel seelin puan dang silh a, amah le mi nih pai hi. Amaute zanin tua numei kiangah va pai uh hi. Amah in, “Kei a dingin a sisate’ kha kiang pan thu hong dotsak inla, nang kianga a min kong gen peuhpeuh kei a dingin hong saptohsak in,” a ci hi.

⁹Numei in ama kiangah, “Saul’ hihsa thu, gam sung panin vankahte le aisante a suksiatna na thei taktak hi. Tua ahih ciangin bang hangin keima sih nading a piangsak dingin kei a dingin thangzak hong koih na hi hiam?” a ci hi.

¹⁰Ahih hangin ama tungah TOPA’ min tawh Saul kiciam a, “TOPA a nungta ahih mah bangin hih thu hangin nang tungah gimna hong tung het lo ding hi,” a ci hi.

¹¹Tua ciangin numei in, “Kua hong sapsak ding ka hi hiam?” a ci hi. Amah in, “Samuel hong sapsak in,” a ci hi.

¹²Numei in Samuel a muh ciangin a gingin kikokhia hi. Numei in Saul kiangah, “Bang hangin kei hong khem na hi hiam? Nang, Saul na hi hi,” a ci hi.

¹³Kumpipa in ama kiangah, “Lau kei in; kua mu na hi hiam?” a ci hi. Numei in Saul kiangah, “Leisung panin pasian khat hong paikhiato ka mu hi,” a ci hi.

¹⁴Amah in tua nu kiangah, “Ama mel bangci ahi hiam?” a ci hi. Tua nu in, “Puteek khat hong paito a, amah in puantualpi silh hi,” a ci hi. Tua ciangin Saul in tua pen Samuel hi, ci-in thei a, lei-ah a maikunin zahtakna a bawl hi.

¹⁵Tua ciangin Samuel in Saul kiangah, “Bang hangin keimah saptohna tawh hong nawngkaisak na hi hiam?” a ci hi. Saul in dawngin, “Nakpi takin ka lungkham hi; Filistia-te in kei hong sim a, kei kiang panin Pasian kiheikhia-in kamsangte tawh ahi a, mang tawh ahi zongin hong dawng nawn lo hi. Tua ahih ciangin ka gamtat nading zia a hong gen dingin nang kong sam hi,” a ci hi.

¹⁶Tua ciangin Samuel in, “TOPA, nang kiang panin kiheikhia-in na gal suak khin ahih ciangin bang hangin kei thu hong dong lai na hi hiam?

¹⁷TOPA in kei’ tungtawnin hong gensa bangin nang tungah hong hih hi. TOPA in na khutsung panin kumpi gam balkhia-in na vengpa David’ tungah pia khin hi.

¹⁸Nangmah in TOPA’ thu ngai loin, Amalek tungah ama heh mahmahna tawh kizui-in hihlo na hih manin TOPA in nang tungah tuni-in hihte hong tungsak hi.

¹⁹Tua tham loin TOPA in Israel mite zong nang tawh Filistia-te’ khut sungah hong piakhawm ding hi. Zing ciangin nang le na tapate in zong kei kiang nong zuan ding uh hi. TOPA in Israel galkapte zong Filistia-te’ khut sungah pia ding hi,” a ci hi.

²⁰Tua ciangin Samuel’ thugente hangin lau lua-in leilakah Saul tawnpuk pah hi. Amah in sun tawntung le zan tawntung bangmah ne lo ahih manin a tha nem mahmah hi.

²¹Tua ciangin Saul kiangah a numei hong pai-in amah a lau mahmahna a muh ciangin tua nu in Saul kiangah, “En in, na nasemnu in na thu hong ngaizo hi. Ka luang khamin, kei tungah nong gen bangin ka gamtazo hi.

²²Tua ahih ciangin nang zong na nasemnu’ thu hong ngai in; na mai-ah anlum tawmkhat hong luisak in; na paina dingah na pai ciangin na thahat nadingin ne in,” a ci hi.

²³Amah in nial a, “Ka ne kei ding hi,” a ci hi. Ahih hangin tua numei tawh kopin a nasemte in ci teitei uh ahih manin amau’ cih bangin a mang hi. Tua ahih ciangin leilak panin amah tho-in lupna tungah a tu hi.

²⁴Tu-in tua numei in a inn-ah bawngno thau khat nei a, amah in manlang takin go-in, tua ciangin annel la a, a annel meekin silngo sawh loh anlum em a,

²⁵Saul le a nasemte’ mai-ah lui a, amaute in a ne uh hi. Tua ciangin amaute dingin tua zanin a paikhia uh hi.