Read Tedim Chin 1 SAMUEL MASA 31 Bible Online

1 SAMUEL MASA 31 - Tedim Chin bible

1 SAMUEL MASA 31

¹Filistia-te in Israel-te sim uh hi. Filistia-te’ mai-ah Israel-te tai uh a, Gilboa Mual tungah thahin tuk uh hi.

²Filistia-te in Saul le a tapate pha uh hi. Filistia-te in Saul’ tapate Jonathan, Abinadab, le Malkhishua a that uh hi.

³Gal in nakpitakin Saul neh a, gal thaltawite in nakpitakin amah liamsak hi.

⁴Tua ciangin Saul in a galhiam puapa kiangah, “Hih dawibia mite hong pai-in kei hong dawtletin hong mawlpih kha ding uh ahih manin na namsau dok inla, tua tawh hong dawtlet in,” a ci hi. Ahih hangin a galhiam puapa in hih ngam lo hi; bang hang hiam cih leh amah lau mahmah hi. Tua ahih ciangin Saul in ama namsau la-in tua tungah puk hi.

⁵A galhiam puapa in Saul a sihna a muh ciangin amah zong a namsau tungah kipuksuk sakin amah tawh a sikhawm hi.

⁶Tua bangin Saul, a tapa thumte, a galhiam puapa, le a mi khempeuh, a ni kikhatin a sikhawm uh hi.

⁷Tua ciangin Jezreel kuam galkhat le Jordan galkhat a om Israel mite in Israel mite tai-in Saul le a tapate a sih khitna thu a zak uh ciangin amaute in a khuapite uh nusia-in tai uh ahih ciangin Filistia-te hong pai-in tuate sungah a teng uh hi.

⁸A zing ciangin a kithat mite’ na a la dingin Filistia-te hong pai ciangin Saul le a tapa thumte Gilboa Mual tungah a si mu uh hi.

⁹Amaute in Saul’ lu tankhia-in a galhiam hawkkhia uh a, a milimte uh le mite kiangah hih thuhoih a puak dingin Filistia gam sung khempeuhah kamtaite a sawl uh hi.

¹⁰Amaute in Ashtaroth biakinn sungah ama galhiam koih uh a, Bethshan khuakulhah ama luang a suang uh hi.

¹¹Ahih hangin Jabeshgilead ah a teng mite in Saul’ tungah Filistia-te’ hihna a zak uh ciangin,

¹²a hang mi khempeuh dingin zan tawntung pai uh a, Bethshan kulh tung panin Saul’ luang le a tapate’ luangte va la uh hi. Amaute in Jabesh-ah tunpihin tua lai-ah a hal uh hi.

¹³Amaute in a guhte la-in Jabesh khuasung makeng kung nuai-ah vui uh a, ni sagih sung an a tang uh hi.