Read పవిత్ర బైబిల్ పరమగీతము 1 Bible Online

పరమగీతము 1 - పవిత్ర బైబిల్ bible

పరమగీతము 1

¹సొలొమోను గీతాలలో ఉన్నత గీతం

²తన నోటి ముద్దులతో అతడు నన్ను ముద్దు పెట్టుకొననిమ్ము ఎందుకంటే ద్రాక్షా రసంకన్నా మధురమయింది నీ ప్రేమ.

³నీ పరిమళ ద్రవ్యం అద్భుతమైన సువాసననిస్తుంది, కాని మిక్కిలి ఉత్తమ పరిమళ ద్రవ్యం కన్నా నీ పేరు[1] తియ్యనైనది. అందుకే యువతులు నిన్ను ప్రేమిస్తారు.

⁴నన్ను ఆకర్షించుకొనుము! మేము నీ దగ్గరకు పరుగెత్తుకొని వస్తాము! రాజు తన రాజ గృహానికి నన్ను తీసుకు వెళ్ళాడు. మేము ఆనందిస్తాం. నీకోసం సంతోషంగా ఉంటాం. నీ ప్రేమ ద్రాక్షారసము కన్నా బాగుంటుందని జ్ఞాపకముంచుకొనుము. మంచి కారణంతోనే యువతులు నిన్ను ప్రేమిస్తారు.

⁵యెరూషలేము పుత్రికలారా, కేదారు, సల్మా[2] గుడారముల నలుపువలె నేను నల్లగా అందంగా ఉన్నాను.

⁶నేనెంత నల్లగా ఉన్నానో చూడవద్దు, సూర్యుడు నన్నెంత నల్లగా చేశాడో చూడవద్దు. నా సోదరులు నా మీద కోపగించారు. వాళ్ల ద్రాక్షా తోటలకు కాపలా కాయుమని నన్ను బలవంత పెట్టారు. అందువల్ల నన్ను గురించి నేను శ్రద్ధ తీసుకోలేక పోయాను.[3]

⁷నా ప్రాణం అంతటితో నిన్ను ప్రేమిస్తాను! నీ గొర్రెల్ని ఎక్కడ మేపుతావో, మధ్యాహ్నం వాటిని ఎక్కడ పడుకో బెడతావో నాకు చెప్పు. నీతో ఉండటానికి నేను రావాలి లేకపోతే నీ మిత్రుల గొర్రెల కోసం పాటుపడే అద్దెకు తీసుకున్న స్త్రీని[4] అవుతాను!

⁸నీవు అంత అందమైనదానవు! కనుక నిజంగా నీకు తెలుసు ఏమి చెయ్యాలో. వెళ్లు, గొర్రెలను వెంబడించు. నీ చిన్న మేకల్ని కాపరుల గుడారాల వద్ద మేపు.

⁹నా ప్రియురాలా, ఫరో రథాలు[5] లాగుతున్న నా ఆడ గుర్రాలతో నిన్నుపోల్చియున్నాను.

¹⁰నీకోసం చేసిన అలంకరణలివిగో, బంగారు తలకట్టు[6], వెండి గొలుసు. నీ చెక్కిళ్లు ఎంతో అందంగా ఉన్నాయి బంగారు అలంకరణలతో, నీ మెడ ఎంతో అందంగా ఉంది వెండి అల్లికలతో.

¹²నా పరిమళ ద్రవ్యపు సువాసన తన మంచంమీద పడుకున్న రాజును చేరింది.

¹³నా స్తనాల మధ్య పడివున్న నా మెడలో వున్న చిన్న గోపరసం[7] సంచిలాంటి వాడు నా ప్రియుడు.

¹⁴ఏన్గెదీ ద్రాక్షాతోటల దగ్గరున్న గోరంటు[8] పూల గుత్తిలాంటివాడు నా ప్రియుడు.

¹⁵నా ప్రియురాలా, నువ్వెంతో అందంగా ఉన్నావు! ఓహో! నువ్వు సుందరంగా ఉన్నావు! నీ కళ్లు పావురపు కళ్లలా వున్నాయి.

¹⁶నా ప్రియుడా, నువ్వెంతో సొగసుగా ఉన్నావు! అవును, అత్యంత మనోహరంగా ఉన్నావు! మన శయ్య ఆకుపచ్చగా ఆహ్లాదంగా ఉంది[9]

¹⁷మన యింటి దూలాలు దేవదారువి అడ్డకర్రలు సరళమ్రానువి.