Read Termanu KEJADIAN 1 Bible Online

KEJADIAN 1 - Termanu bible

KEJADIAN 1

¹Nai makasososa oe-oen-na, fo nai lelek Manetualain mulai nakadada'dik lalai-a, ma daebafak-ka,

²daebafak-ka beita nalupa hata esa boen, ma beita nanaito-atok fa. Tasi matuaina liin-nala napoponu, de ana sa'e-na basa hata lala'en-na, ma makiu-makahatuk-ka potin-nan, tehu Manetualain koasan-na nakabale nai oe lain.

³Manetualain kokolak nae, “Mangale'dok-ka da'di leona!” Boema mangale'dok-ka da'di.

⁴Manetualain nita manada'dik ndia boema namahoko. Boema Ana ta'da fe'e mangale'dok ndia, neme makahatuk-ka mai,

⁵de Ana foi mangale'dok ndia, na'de “Lele'dok” ma makahatuk ndia, na'de “Le'odaek”. Le'odaek-ka basan boema fafaik-ka da'di. Fo ndia nde, fai ka esan-na.

⁶Basa boema, Manetualain kokolak nae, “Buas esa, sama leo uma hunuk-ka, da'di leona, fo ela ana ba'e oe ndia neu dua, de Ana kena ketu oe ndia, nai mamana mana kofe'ek dua dalek.” Boema, ana da'di leona. Leondiak, Manetualain taon-na buas esa, sama leo uma hunuk-ka, fo ana ba'e oe manai uma hunuk ndia dae, neme oe manai uma hunuk ndia lain.

⁸Ana foi buas fo sama leo uma hunuk ndia, na'de “Lalai” Le'odaek-ka seli, boema fafaik-ka da'di. Fo ndia nde fai ka duan-na.

⁹Basa boema, Manetualain kokolak nae, “Ela leo been-na, oe manai lalai-a dae, ana faa leo mamanak esa neu, fo ela hapu dae ma'dak.” Boema ana da'di leona.

¹⁰Manetualain foi dae manama'dak ndia, na'de “Dae ma'dak”, ma Ana foi oe makabubuak ndia, na'de “Tasi”. De Manetualain nita manada'dik ndia, boema namahoko.

¹¹Manetualain kokolak seluk nae, “Ela leo been-na, dae-a, ana kalua basa hata manamolik lala'en-na, fo nde ai fo, naboa ai de'e mata-matak-kala, ai maboa mata-matak-kala.” Boema, ana da'di leona.

¹²Leondiak dae-a, ana kalua basa manamoli mata-matak lala'en-na. De Manetualain nita manada'dik ndia, boema namahoko.

¹³Le'odaek-ka seli boema, fafaik-ka da'di. Fo ndia nde, fai ka telun-na.

¹⁴Basa boema, Manetualain kokolak nae, “Ela leo been-na, hapu buas mangale'dok nai lalai, fo nangale'do-na, daebafak-ka, fo ana ta'da fe'e lele'dok-ka neme le'odaek-ka mai, ma soaneu natu'du faik, teuk, ma agama fai malole-na, dada'din-na.” Boema ana da'di leona.

¹⁶Leondiak, Manetualain tao buas mangale'dok matuaina dua, fo nde le'do-a, fo ana koasa nai fai lele'don-na, ma bulak-ka, fo ana koasa nai fai le'odaen-na; fe'ek neme ndia mai, Ana tao nduuk-kala boe.

¹⁷Manetualain pe'da buas mangale'dok sila-la neu lalai, fo langale'do-la daebafak-ka,

¹⁸fo ala koasa lele'dok-ka, ma le'odaek-ka, ma soaneu ala ta'da fe'e mangale'dok-ka neme makahatuk-ka mai. De Manetualain nita manada'dik ndia, boema namahoko.

¹⁹Le'odaek-ka seli, boema fafaik-ka da'di. Fo ndia nde, fai ka haan-na.

²⁰Basa boema, Manetualain kokolak nae, “Ela leo been-na, mahahae maso'dak makadotok lakalalapa lai oe dale, ma manupui makadotok bee-laa lai lalai.”

²¹Boema Manetualain nakadada'dik bana matuaina-la lai tasi dale, ma basa mahahae maso'da mata-matak-kala, lai oe dale, ma basa manupui mata-matak lala'en-na. De Manetualain nita manada'dik sila-la, boema namahoko.

²²Manetualain ba'e-pala basa sila lala'en-na, nenik Ana fe paleta neu mahahaek fo, laso'da lai oe dale, fo ela lamade'u, fo ala tao lahenu tasi-a, ma neu manupui-la, fo ela boetai lamaba'uk-ka.

²³Le'odaek-ka seli boema, fafaik-ka da'di. Fo ndia nde fai ka 5-na.

²⁴Basa boema, Manetualain kokolak nae, “Ela leo been-na, daebafak-ka kalua basa bana kamaus mata-matak-kala, ma bana fuik mata-matak-kala, lai ma'dak lain, nau ana do matua boe.” Boema ana da'di leona.

²⁵Leondiak, Manetualain tao basa sila-la, de nita manada'dik ndia, boema namahoko.

²⁶Basa boema, Manetualain nafa'da nae, “Besak ia, Ata tao hataholi daebafak-ka, fo neukose ana da'di sama-na leo Ita, ma lupa-aon sama leo Ita. Neukose, ala koasa basa i'ak-kala, manupui-la, ma basa bana fe'ek-kala, nau kamaus do fuik boe, nau matua do ana boe.”

²⁷Leondiak, Manetualain nakadada'dik hataholi daebafak-ka, ma nakadada'dik-kasa sama leo Aoinan-na mesak-kana.

²⁸Basa boema, Ana fes baba'e-papalak, nenik hala-kokolak nae, “Bongi-ma, upu-anak makadotok, fo ela o tititi-nonosim leo lahenu daebafak-ka lala'en-na, boema, ala koasa daebafak-ka. Au fe emi bela-ba'uk, fo ito-ato i'ak-kala, manupui-la, ma basa bana fuik-kala.

²⁹Soaneu o nana'a-nininum soona, Au fe o basa hata manamolik mata-matak, fo labuna-laboa aide'ek, ma aiboak mata-matak lala'en-na.

³⁰Tehu ba'eneu basa manupui, ma bana fuik lala'en-na, Au fes na'u ma na'u-aiana madook lala'en-na, da'di sila nana'an-nala.” Boema ana da'di leona.

³¹Manetualain nita, Ana taon-na basa hata lala'en-na ndia boema, namahoko nanseli. Le'odaek-ka seli, boema fafaik-ka da'di. Fo ndia nde fai ka 6-na.