Read Termanu KEJADIAN 11 Bible Online

KEJADIAN 11 - Termanu bible

KEJADIAN 11

¹Makasososan-na, basa leoina manai daebafak-ka, lanuu ka'da dede'ak esa, ma kokolan-nala matak esa.

²Lelek, laleu-lalaak leo daebafak-ka boboan dulu leu boema, ala losa masadokek esa nai Babilonia, boema ala leo lahele leme ndia leona.

³Esa kokolak no esa nae, “Mai fo, ata tao batu cetak, fo ata hotun losa natea.” Boema ala hapu batu cetak, soaneu tao uma batu, ma ter, fo lakadiditak lenik-kana.

⁴Beekola lae, “Mai fo ata tapadedeik kota, ma uma puni madema esa, poin-na losa lalai, fo ela ita nanakoa-nanakiok, ma ita ta tapasasala leo daebafak-ka lala'en-na teu fa.”

⁵Boema, MANETUALAIN kona mai, fo Ana mete kota, ma uma puni madema fo, hataholi daebafak-ka tao-nak ndia.

⁶Boema Manetualain nae, “Hataholi ia-la, leoina esa, ma dede'ak esa, de ia, besak-ka sila dale tutu'u makasososan-na. Ta dook-ka so'on te, neukose ala bisa tao su'di beek fo, ala lahiik-kana.

⁷Malole lenak, Ata kona teu, fo sese'do-babalik dede'an-nala, fo ela esa ta nalelak esa dede'an-na so'on.”

⁸MANETUALAIN tao tapasasalas leo daebafak-ka lala'en-na neu-a, enon-na leondiak. Boema, ala ta tao kota ndia so'on.

⁹Hu ndia de, losa besak ia, kota ndia na'de Babel, nanahu MANETUALAIN tao tasi'bu basa leoina-la dede'an-na neme ndia, ma MANETUALAIN tao tapasasalas leme ndia, leo basa daebafak-ka lala'en-na leu.

¹⁰Sem tititi-nonosin nde ia: Basa faa matuaina, teuk 2, fo ndia te, Sem teun natun esa, boema ana bongi anatouk esa, na'de Arpakhsad.

¹¹Basa ndia boema, ana bei naso'da teuk natun lima seluk.

¹²Nai lelek, Arpakhsad teun teluhulu lima boema, ana bongi anatouk esa, na'de Selah.

¹³Basa ndia boema, Arpakhsad bei naso'da teuk 403 seluk, de ana bongi ana fe'e-fe'en-nala.

¹⁴Nai lelek, Selah teun teluhulu, boema ana bongi ana touk esa, na'de Eber.

¹⁵Basa ndia boema, Selah bei naso'da teuk 403 seluk, de ana bongi ana fe'e-fe'en-nala.

¹⁶Nai lelek, Eber teun teluhulu haa boema, ana bongi ana touk esa, na'de Peleg.

¹⁷Basa ndia boema, Eber naso'da teuk 430 seluk, de ana bongi ana fe'e-fe'en-nala.

¹⁸Nai lelek, Peleg teun teluhulu boema, ana bongi ana touk esa, na'de Rehu.

¹⁹Basa ndia boema, Peleg bei naso'da teuk 209 seluk, de ana bongi ana fe'e-fe'en-nala.

²⁰Nai lelek, Rehu teun teluhulu dua boema, ana bongi ana touk esa, na'de Serug.

²¹Basa ndia boema, Rehu bei naso'da teuk 207 seluk, de ana bongi ana fe'e-fe'en-nala.

²²Nai lelek, Serug teun teluhulu boema, ana bongi ana touk esa, na'de Nahor.

²³Basa ndia boema, Serug bei naso'da teuk 200 seluk, de ana bongi ana fe'e-fe'en-nala.

²⁴Nai lelek, Nahor teun duahulu sio boema, ana bongi ana touk esa, na'de Terah.

²⁵Basa ndia boema, Nahor bei naso'da teuk 119 seluk, de ana bongi ana fe'e-fe'en-nala.

²⁶Lelek Terah teun hituhulu boema, ana bongi ana touk telu, fo nde Abram, Nahor ma Haran.

²⁷Terah tititi-nonosin nde ia. Abram, Nahor ma Haran, fo sila aman nde Terah. Haran bongi ana touk esa, na'de Lot.

²⁸Haran maten nai nggolo-ta'dun, fo nde Ur nai Babilonia, ndia te aman bei naso'da.

²⁹Abram saon-na Sarai, ma Nahor saon-na Milka, fo Haran anafe'on-na. Haran bei nanuu ana touk esa, na'de Yiska.

³⁰Sarai nde been-na, ina manabongi taak.

³¹Terah la'oela kota Ur-ra nai Babilonia, sama-sama no anan Abram, upun Lot, ma manafeuinan Sarai, fo Abram saon-na. Ana dodoo nae, sanga neu leo nusa Kanaan-na neu. Tehu ala losa Haran boema, ala leo lahele leme ndia.

³²De mate Terah neme ndia boe, fo nai lelek, teun 205.