Read Termanu KEJADIAN 14 Bible Online

KEJADIAN 14 - Termanu bible

KEJADIAN 14

¹Manek haa, fo nde: Amrafel neme Babilonia mai, Ariokh neme Elasar mai, Kedorlaomer neme mai Elan, ma Tideal leme Goyim mai,

²latee-lata'ti la'ban manek lima, fo nde: Bera neme Sodom mai, Birsya neme Gomora mai, Syinab neme Adma mai, Semeber neme Zeboim mai, ma manek maneme Bela mai, fo loken lae Zoar boe.

³Manek-ka 5 sila-la dalek esa, de ala tao lakabubua solda'dun-nala nai Bafak Sidim-ma, fo besak ia, loken lae Tasi Mates.

⁴Nai teuk sanahulu dua dalen-na, Manek Kedorlaomer-ra, koasa manek sila-la, tehu neu teu ka 13-na boema, ala ta tunga paleta so'on, de ala la'ban manek-ka.

⁵Nai teu ka sanahulu haan-na dalek, boema Kedorlaomer no mane-manek fo, ala dalek esa loon-na, ala mai loo solda'dun-nala, de ala sengi hataholi Refaim-mala neme Asyterot-Karnaim, hataholi Zuzim-mala neme Ham, hataholi Emim-mala neme Syawe-Kiryataim,

⁶ma hataholi Hori-la neme letelepak Edom-ma, boema ala usis losa dodook El-Param-ma, nai moo solokaek-ka su'un-na.

⁷Basa ndia boema, manausi-la lepos fali seluk, de ala fali le'us leo En-Mispat, fo besak ia, loken lae Kades. Ala paleta la'iesak dae Amalek-ka lala'en-na, boema ala sengi hataholi Amori, fo manaleo nai Hazezon-Tamar-ra.

⁸Basa boema, manek-kala leme Sodom, Gomora, Adma, Zeboim ma Bela mai, de ala ito-ato sila solda'dun-nala, fo lapadedeik lakadadalak lai Bafak Sidim-ma, boema latee-lata'ti

⁹la'ban mane-manek-kala leme Elam, Goyim, Babilonia ma Elasar mai; da'di, manek lima la'ban manek haa.

¹⁰Bafak ndia, henuk no oedolu aspal, de lelek mane-manek-kala leme Sodom ma Gomora, ala sanga enok fo lalai leme musu dale mai, de ala tu'da leo oedolu sila dalek leu. Mane ka telu fe'ek-kala laladeak, de lalai leo letelepak-ka leu.

¹¹Mane ka haa fo manasengik-kala, ala kalo leni basa hata lala'en-na, ma nana'a-nininuk boe, neme Sodom ma Gomora, boema ala la'o leona.

¹²Lot, fo Abram tolanoon-na anan-na boeo, ana leo nai Sodom, hu ndia de, musu-a non, sama-sama no hata-heton lala'en-na.

¹³Tehu hataholi esa, hapu naladeak, de nafa'da basa manada'dik neu Abram, fo hataholi Ibrani ndia. Abram leo deka no ai manituk-la, fo Mamre, hataholi Amori esa, mamana makaluku-makatelen-na. Mamre no tolanoon-nala, fo nde Eskol ma Aner fo Abram tia-lai malolen hataholi sila-la.

¹⁴Lelek Abram namanene, lae tolanoon-na anan-na da'di hataholi nanafook, boema nakabubuan-na basa hataholi manai ofun dale, fo nde hataholi manamatee-matati malelak-kala, dede'un-na hataholi 318, boema ala usi mane ka haa sila-la, losa kota Dan-na.

¹⁵Nai ndia, Abram ba'e hataholin-nala neu bubuak de'ubee, boema leu sapu-la musu-a la'e fai le'odaek, de ala sengis. Ana usis losa Hoba, fo nai kota Damsyik-ka boboan kii.

¹⁶Abram hapu kalo neni falik bua-lo'as, fo ala kalo lenik-kala, ma Lot no hata-heton lala'en-na, ma ina fe'e-fe'ek-kala, ma hataholi nanafook fe'ek-kala.

¹⁷Ala sengi basa Mane Kedorlaomer-ra no mane-manek fo sila dalek esa, boema Abram fali ma'in. Boema, mane Sodom-ma neu soluk-kana nai Bafak Syawe-a, fo loken lae Dokek Manek boe.

¹⁸Melkisedek, manek Salem, fo ana da'di Manetualain Fo Mademaina imam-ma, neni fe Abram loti ma angol,

¹⁹boema ana fe Abram baba'e-papalak nae, “Sa'di leo been-na Manetualain Fo Mademaina, fo nakadada'dik basa lalai ma daebafak-ka, ba'e-pala Abram!

²⁰Kokoa-kikiok neu Manetualain, Fo Mademaina, Ana fe basa o sesengik neu o musum-mala.” Basa ndia boema, Abram fe Melkisedek bua-lo'as fo, ana kalo neni falik-kasa, baba'ek esa neme baba'ek 10 mai.

²¹Boema, mane Sodom-ma nafa'da Abram nae, “Ho'i-ma bua lo'as nanakalo nenik sila la, tehu sa'di leo been-na fe falik au hataholing-ngala leo au mai.”

²²Tehu, Abram nataa nae, “Au soo nai MANETUALAIN, Fo Mademaina, manamaka dada'dik lalai-a, ma daebafak-ka matan,

²³ae neukose, au ta ho'i hata esa boen, neme o pusakam-ma mai fa, nakalenak a'bas dook esa, do tabueis-sa tali nggenggeloanan esa boeo ta. No leondiak, neukose o ta bisa mafa'da mae, ‘Au nde fe Abram da'di hataholi kamasu'ik.’

²⁴Au ta nau ho'i hata esa boen, soaneu au mesang-nga fa. Ka'da au nau sipo hata, fo au hataholing-ngala paken. Tehu nemen-na, fo au tia-lai maloleng-ngala, fo nde Aner, Eskol ma Mamre, ho'i-la sila baba'en-na.”