Read Termanu KEJADIAN 17 Bible Online

KEJADIAN 17 - Termanu bible

KEJADIAN 17

¹Lelek Abram teun siohulu sio boema, MANETUALAIN natu'du aoinan-na neun, de nae, “Au nde MANETUALAIN, Fo Manakoasa. Tunga Au, ma tao-no'i Au hihii-nanaung tataas esa.

²Neukose, Au tao hehelu-balataak no o, ma Au fe o tititi-nonosik makadotok.”

³Boema, Abram senek, de basa boema, Manetualain nafa'da nae,

⁴“Au hehelu-balataang, fo Au taon no o-a, nde ia: Au helu ae neukose, o da'di ama kai neu leoina makadotok. Hu ndia de, o na'dem-ma, ta na'de Abram so'on, te na'de Abraham.

⁶Neukose, Au fe o upu-anak makadotok, ma nai upu-anak sila-la dalek, neukose hapu nggelok da'di manek-kala. Neukose, o tititi-nonosim makadotok nanseli, de nalosa neukose ala da'di leoina-leoina-la.

⁷Neukose, Au tao atetu Au hehelu-balataang neu o, ma neu o tititi-nonosim-mala, neme bobongik leo bobongik neu, ma hehelu-balataak ndia, manaketu-basa taak. Neukose, Au da'di o Manetualaim-ma, ma o tititi-nonosim Manetualain-na.

⁸Neukose, Au fe dae ia neu o, ma o tititi-nonosim, fo nde dae fo besak ia, o leon da'di leo hataholi manamai. Basa dae Kanaan-na lala'en-na, neukose da'di o upu-anam pusakan, losa dodoon-na, ma neukose, Au da'di sila Manetualain-na.”

⁹Manetualain nafa'da seluk Abraham nae, “O boeo, muse lilineka neu hehelu-balataak ia, nau o, do o tititi-nonosim, neme bobongik leo bobongik neu.

¹⁰O ma basa o tititi-nonosim-mala, muse sunat-tasa.

¹¹Mulai neme besak ia mai, o muse sunat basa o anatoum, fo nanabongi beuk-kala, fo teun-na, besak-ka faik falu, ma basa o atam, fo bongin nai o umam, do o asa mak-kala. Sunat ndia, neukose ana da'di ta'du-tana, neme hehelu-balataak fo, Au taon emi.

¹³Hataholi lala'en-na, muse nanasunat, fo neukose, ndia da'di ta'du-tana aopak, fo natu'du nae, Au hehelu-balataang no o ndia, manaketu-basa taak.

¹⁴Basa touk, nanasunat taak lala'en-na, Au anang ta ndia fa, nanahu, ana ta ho'u hehelu-balataak ndia fa.”

¹⁵Basa boema, Manetualain nafa'da Abraham nae, “O boso boe maloo o saom-ma, mae Sarai bai; te mulai besak ia, na'den-na Sara so.

¹⁶Neukose, Au ba'e-palan, ma neukose, ana bongin-na ni'iana touanak esa, fo Au fen neu o. Neukose, Au ba'e-pala Sara, ma neukose ana da'di ina kai, neu leoina-la. Neukose hapu manek-kala, nai tititi-nonosin-nala dalek.”

¹⁷Boema, Abraham senek leona, tehu ana hika, nai lelek fo ana dodoo nae, “Hapu nai bee, touk esa, teun natun esa so, tehu ana bei bongi anak? Hapu nai bee, Sara bisa bongi nai teun siohulu dalek?”

¹⁸Boema, Abraham nafa'da Manetualain nae, “Malole lenak, Ismael nde da'di manahapu au pusakang-ngala.”

¹⁹Tehu Manetualain nae, “Ta. Neukose, o saom Sara bongi anatouk, de neukose o foin na'de Isak. Neukose, Au ho'u ahele Au hehelu-balataang no ni'iana ndia, ma no tititi-nonosin-nala losa dodoon-na. Hehelu-balataak ndia, manaketu-basa taak.

²⁰Tehu, Au sipok o nonokem la'eneu Ismael boe. Hu ndia de, neukose Au ba'e-palan, ma Au fen tititi-nonosik makadotok. Neukose, ana da'di, leo ka sanahulu duak-kala, bei-ba'i kain, ma neukose, Au fe tititi-nonosin da'di leoina matuaina esa.

²¹Tehu, neukose Au henge Au hehelu-balataang no o anam Isak, nana neukose, Sara bongin nai teu manamaik-ka, fo nai faik sama leo ia.”

²²Manetualain nafa'da basa nae leondia boema, Ana la'o ela Abraham.

²³Nai faik ndia boe, Abraham tunga Manetualain paletan-na, de ana sunat anan Ismael, ma basa anatouk manai uman dale, nau basa ata, fo nanabongik nai uman dale, do ana asa nak-kala boe.

²⁴Abraham nanasunat ndek lelek teun siohulu sio,

²⁵ma anan Ismael teun sanahulu telu.

²⁶Sunat duas, nai faik esa dalen-na,

²⁷sama-sama no basa Abraham atan-nala.