Read Termanu KEJADIAN 18 Bible Online

KEJADIAN 18 - Termanu bible

KEJADIAN 18

¹MANETUALAIN natu'du aoinan-na neu Abraham nai mamanak fo, deka no ai manituk-la nai mamana makaluku-makatele manai Mamre. Nai lelek ndia, le'do nahaa nanseli, de Abraham nangatuuk nai uma ofun-na lelesun-na.

²Ana botik langan-na boema, nita hataholi telu lapadeik lai matan-na. No lai-laik, Abraham nalai neu soluk-kasa. Ana senek ma

³nafa'da nae, “Tuan-tuan, tuli dei, fo boso la'ok seli au ofung-nga; fe au loak alalau-aoono Tuan-tuan-nala.

⁴Mahani fo au ho'i oe, fo safe Tuan-tuan-nala ein-na. Tuan-tuan-nala hahaeaom mai ai ia huun-na.

⁵Fo au u sadia nana'ak, fo ela Tuan-tuan-nala hapu balakai beuk, fo besak-ka la'ok makandoo. Metema Tuan-tuan-nala, tuli atam-ma uman ia soona, tuan-tuan-nala fe ha'da-holomata neu au.” Boema hataholi ka telu sila-la, lataa lae, “Makasi ba'uk-ka, neu o dale malolem-ma. Neukose ami tuli.”

⁶Abraham masok lai-lai leo uma ofu dale neu, de nafa'da Sara nae, “Lai-lai, ho'i-ma ha'desopu neulauk kalong esa, fo tao loti bobongoanak leona.”

⁷Basa boema, nalai leo banan-nala mamana nana'an-na neu, de ana hele sapiana maao, fo ela paan-na mangana'uk-ka, boema ana ta'tin, de ana fen leo atan-na neu, fo ana tunu-nasun no lai-laik.

⁸Basa ndia boema, Abraham ho'i kapaoe, ma kapaoe langak, ma paa nananasu basak ndia, de ana sadia fen neu Tuan-tuan sila-la. Lelek ndia, Abraham nde nalalau-naoonos nai ai ndia huun-na.

⁹Basa boema, latane lae, “O saom Sara, nai bee?” Abraham nataa nae, “Nai uma ofu dale.”

¹⁰Hataholi sila-la, esa nafa'da nae, “Bei bulak sio seluk bai te, neukose Au fali ma'ing-nga. Ma nai lelek ndia, neukose o saom Sara, ana bongi ni'iana touanak esa.” Ndia te, Sara nai uma ofu-a lelesun-na bafan-na, fo nai fui sila dean-na, de namanene.

¹¹Abraham no Sara lamalasi lanseli so, de Sara ta hapu bula so'on.

¹²Hu ndia de, Sara hika nai dalen dale, ma nae, “Au amalasi, ma balakaik ta so, de hapu nai bee, au bei ahiik sungu o au saong-nga? — Bai te, au saong-nga boeo namalasi so.”

¹³Boema, MANETUALAIN natane Abraham nae, “Tao le'e de, Sara hika ma dalen-na naba'e, ade, ana bei hapu bongi anak, nai fai lasin-na dalek do?

¹⁴Ade, hapu hata mateaina ba'eneu MANETUALAIN do? Sama leo na'kasa, Au afa'da basan ae, bei bulak sio seluk bai te, neukose Au fali ma'ing-nga leo ia mai. Te nai lelek ndia, neukose Sara bongi ni'iana touanak esa so.”

¹⁵Hu kande bibiik-ka, de Sara nalelesi nae, “Au ta hika fa.” Tehu MANETUALAIN nataa nae, “Memak na'kasa o hika so.”

¹⁶Basa ndia boema, fui ka telu sila-la ala la'o, de Abraham neu nafulis. Boema, ala losa mamanak esa, fo nai bee, ala hapu mete lita Sodom.

¹⁷MANETUALAIN dodoo nai dalen dale nae, “Au ta nau afuni Abraham, hata fo neukose Au taon fa.

¹⁸Ade, neukose tititi-nonosin, ta da'di leoina matuaina ma manakoasa fa do? Ade, ta tunga ndia fa, de neukose, Au fe baba'e-papalak neu basa leoina manai daebafak-ka fa do?

¹⁹Au hele basa ndia so, fo ela ana paleta anan-nala, fo ala tunga Au, ma ala tao hata fo malole, ma tunga ndoos ma matetuk-ka. Metema ala tao tunga ndia soona, neukose Au tao atetu Au hehelu-balataang neu Abraham-ma.”

²⁰Basa boema, MANETUALAIN nafa'da Abraham nae, “Sodom ma Gomora, hapu kalaak mabelaina, nana, memak hataholi sila-la sala-singon, ba'un-na seli so.

²¹Hu ndia de, Au sanga kona leo naa u, fo Au palisak, ade Au amanene basa kalaak sila-la, tete'ek-ka do ta.”

²²Boema, hataholi fui ka telu sila-la, sila dua leu leo Sodom leu, tehu esak-ka, fo nde MANETUALAIN, bei nahele no Abraham.

²³Abraham neu deka no MANETUALAIN, de natane nae, “Tete'ek-ka, MANETUALAIN sanga tao namopo-namate hataholi sala taak-ka, sama-sama no hataholi masalak-ka do?

²⁴Leounik-ka, nai kota ndia dalek, hapu hataholi limahulu, ta tao salak fa, na neukose MANETUALAIN tao namopo-namate basa, hataholi manai kota ndia dalek lala'en-na do? Ade, MANETUALAIN ta fe do'o do ampon neu hataholi ka limahulu sila-la, fo ela ala hapu so'dak do?

²⁵Boso taomisa hataholi sala taak sila-la, sama-sama loo hataholi masalak-kala. Bosok MANETUALAIN! Nana, metema MANETUALAIN taon soona, tao leo bee-o, neukose hataholi sala taak-kala, nanahukuk sama-sama loo hataholi masalak-kala. Hapu nai bee, manakee-manafula lalai ma daebafak-ka, ho'i nakeketuk fo ta ndoos ma matetuk fa!”

²⁶Boema MANETUALAIN nafa'da nae, “Leounik-ka, Au hapu hataholi sala taak limahulu, nai Sodom soona, neukose Au fe do'o do ampon neu kota ndia lala'en-na, nanahu hataholi ka limahulu sila-la.”

²⁷Boema Abraham nafa'da seluk nae, “Manetualain, fe ampon neu au, nana no au bafa da'ung-nga, de au tu'ti kokolak ia. Au ia, ka'da hataholi daebafak, fo ta nanuu hak, soaneu kokolak hata esa boen.

²⁸Tehu, fafa'kama hapu hataholi sala taak haahulu lima, te ta limahulu fa. Ade, neukose Manetualain tao namopo-namate kota ndia lala'en-na, hu kande, tasala ka'da, hataholi lima mesak-kana do?” Boema, MANETUALAIN nae, “Leounik-ka, Au hapu hataholi sala taak haahulu lima lai naa soona, neukose Au ta tao amopo-amate kota ndia fa.”

²⁹Boema, Abraham nafa'da seluk nae, “Tao leo bee, fo metema hapu ka'da hataholi haahulu.” Boema, MANETUALAIN nataa nae, “Hu kande, hataholi ka haahulu sila-la, de neukose Au dale tutu'ung ndia, ta da'di fa.”

³⁰Boema, Abraham nae, “Manetualain, boso mamanasa, metema au kokolak seluk. Tao leo bee, fo leounik-ka, hapu ka'da hataholi teluhulu mesak-kana?” Boema, MANETUALAIN nataa nae, “Metema Au hapu hataholi teluhulu soona, neukose Au dale tutu'ung ndia, ta da'di fa.”

³¹Boema, Abraham nae, “Manetualain, fe ampon neu au, nanahu au apalani kokolak akandoo. Leounik-ka, hapu ka'da hataholi duahulu mesak-kana?” Boema, MANETUALAIN nataa nae, “Metema Au hapu hataholi duahulu soona, neukose Au ta tao akalulutuk kota ndia fa.”

³²Mate'en-na, Abraham nae, “Manetualain, boso mamanasa, te neukose au kokolak ka'da la'iesa seluk ae. Tao leo bee, fo hapu ka'da hataholi sanahulu mesak-kana?” Boema, MANETUALAIN nataa nae, “Metema hapu hataholi sala taak sanahulu soona, neukose Au ta tao amopo-amate kota ndia fa.”

³³Lelek MANETUALAIN kokolak basa no Abraham boema, Ana la'o, ma Abraham fali ne'un leo uman neu.