Read Termanu KEJADIAN 2 Bible Online

KEJADIAN 2 - Termanu bible

KEJADIAN 2

¹Boema, basa lalai-a no daebafak-ka nakadada'din-na.

²Neu fai ka hitun-na, boema Manetualain tao nakababasak tatao-nono'in ndia, boema Ana hahaeaon-na.

³Boema, Ana ba'e-pala fai ka hitu ndia, de Ana taon da'di fai hehelik, nanahu nai faik ndia, Manetualain hahaeaon-na, nai lelek Ana tao nakababasak tatao-nono'in.

⁴Lalai-a, ma daebafak-ka nakadada'din-na, tutuin-na leondiak. Lelek MANETUALAIN tao lalai no daebafak-ka,

⁵beita hapu bini-ngges manupuk, ma beita hapu bubu'u-palusa nai daebafak-ka fa, nanahu MANETUALAIN beita nakona u'dan leo daebafak-ka mai fa, ma beita hapu hataholi foi-fala dae ndia fa.

⁶Tehu oe-a, mulai nasabu'bu neme dae dale mai, de ana tao nakadoe daebafak-ka.

⁷Basa boema, MANETUALAIN ho'i-na dae faa anak, de Ana taon-nan, nalupa hataholi esa, boema Ana fuu, ani hahaek fo maneni maso'dak-ka leo pana bolon dale neu; boema hataholi ndia, naso'da leona.

⁸Basa boema, MANETUALAIN tao osi nai Eden boboan dulu, de Ana fe hataholi fo, Ana taon-nak ndia, neu leo nai mamanak ndia.

⁹MANETUALAIN nakamomolik basa ai mana'ahiik mata-matak-kala, fo labuna-laboa ai boa malole. Ai manafe maso'dak-ka, ma ai manafe malelak la'eneu beek-ka nde malole ma beek-ka nde mangalauk-ka ala moli nai osi-a tala'da.

¹⁰Lee esa, ana faa neme Eden mai, de ana faa leo osi ndia dalek neu; ma lee ndia losa Eden deak boema, naba'eneu ba'ek haa.

¹¹Lee makasososak-ka, na'de Pison; lee ndia faa akofefeok dae Hawila.

¹²Hapu lilopilas isik, ma kaboomenik-kala, fo susa la'iesak-kana, besak-ka hapun, boema batu poe mata-la lai ndia.

¹³Lee ka dua, na'de Gihon; oen-na faa okofefeok dae Kus-sa.

¹⁴Lee ka telu na'de Tigris, fo ana faa leo Asyur boboan dulu neu. Lee ka 4, na'de Efrat.

¹⁵Basa boema, MANETUALAIN fe hataholi ndia neu leo nai osi Eden-na dalek, fo ana foi-fala, ma ana mete-nakanae osi ndia.

¹⁶MANETUALAIN nafa'da hataholi ndia nae, “O bole mu'a basa ai manai osi ia dalek, boan-nala,

¹⁷ta'da fe'e ai fo, manafe malelak la'eneu beek-ka nde malole, ma beek-ka nde magalauk-ka. O ta bole mu'a boan-na fa; nana metema o mu'a boan-na soona, tao leo bee-o, neukose mate o, faik ndia boe.”

¹⁸Boema, MANETUALAIN nafa'da nae, “Metema hataholi-a, naso'da mesak-mesak-kana soona, ta malole fa. Au sanga tao fen manatulu-fali esa, nandaa noon.”

¹⁹Boema, Ana ho'i-na dae faaanak, de Ana fe lupak neu basa bana mata-matak manai ma'dak lain-na, ma bana manai lalai lala'en-na. Manetualain neni basa-basan leo hataholi ndia neu, fo ana mete bana sila-la beek-ka, nandaa no na'dek beek-ka.

²⁰Ndia nde makasososan-na, bana manai ma'dak lain-nala, ma manai lalai-a, esa-esak mana'dek so. Hataholi ndia, ana foi basa bana manai ma'dak lain-nala, ma manai lalai-a na'den-na, leondiak. Tehu nai basa bana sila-la dalek, ta hapu esa boen, fo ana bisa da'di ndia mana tulu-falin, fo nandaa non fa.

²¹Boema MANETUALAIN taon-na, hataholi ndia sungu namanee, de ana bei sungu-sungu te, MANETUALAINho'i-na hataholi ndia kaiisu duin esa, boema Ana tao ketu mamanan-na, nenik hataholi ndia, ao isin-na.

²²MANETUALAIN taon-na inak esa, neme kaiisu duik ndia mai, boema non leo hataholi ndia neu.

²³Boema hataholi ndia, nafa'da nae, “Ia nde hataholi fo, sama no au — duin-na neme au duing-nga mai, ma ao isin-na, neme au ao ising-nga mai. Au foin na'de inak, nanahu, ho'in neme touk-ka mai.”

²⁴Hu ndia de, touk-ka la'oela ina-aman, fo ana da'di esa no saoinan-na, boema duas da'di esa.

²⁵Touk-ka no inak ndia lakahola-la, tehu ala ta lame'da mama'ek fa.