Read Termanu KEJADIAN 23 Bible Online

KEJADIAN 23 - Termanu bible

KEJADIAN 23

¹Sara teun natun esa duahulu hitu boema,

²maten nai Hebron, fo nai dae Kanaan-na. Abraham dalen-na he'dis-sa, de ana makaleleu saon ndia mamaten-na.

³Basa ndia boema, Abraham la'oela mamates-sa, de neu leo hataholi Het manaleo nusak ndia, de nafa'das nae,

⁴“Au ia, hataholi manamai, de au leo nai tolanook-kala tala'daheon; emi nau soona, au asa-a, dae duduik esa, fo au atoi au saong-nga.”

⁵Boema, hataholi sila-lataa lae,

⁶“Ami fe ha'da-holomata neu Tuan, da'di leo mauli-malanga balakaik nai ami dalek, da'di matoi Tuan saon-na, neu ami bolo mamate mana'a hiim-ma dalek. Ami basa-basam-mala mamahoko, sadia fe Tuan saon-na, bolo mamates.”

⁷Basa boema, Abraham senek neu hataholi sila matan-na,

⁸de nafa'da nae, “Metema tolanook-kala nau au atoi au saong-nga nai ia soona, sue-na, moke Efron, fo Zohar anatoun-na,

⁹fo ela nase'o fe au Leak Makhpela fo nai tinan-na boboan-na. Malole lenak, nase'o dae ndia nai tolanook-kala matan, fo tolanok-kala sakasii. Neukose au bae atetu belin-na, fo ela dae ndia da'di au pusakang.”

¹⁰Nai lelek ndia, Efron bei nangatuuk no hataholi Het sila-la, nai mamana nakabuak-ka, fo nai kota lelesuinan-na. Boema, nataa nai basa hataholi manai sila-la matan, nae,

¹¹“Au leoinang-nga nde da'di sakasii, au fe tina ndia no leak-ka leo Tuan neu, fo daenga Tuan natoi Tuan saon-na neu ndia.”

¹²Boema, Abraham senek neu hataholi Het sila-la matan,

¹³de basa hataholi-la lamanene, nafa'da Efron nae, “Au dokodoe, fo mamanene au dei, te au ahiik asa-a, tina ndia lala'en-na. Sipo-ma belin-na leona, fo ela au atoi au saong-nga neu ndia.”

¹⁴Boema, Efron nataa nae,

¹⁵“Dae duduik esa, belin-na ka'da doifulak natun haa ndia, sosoa-na hata, ba'eneu ita dua? Ka'da Tuan matoi Tuan saon-na neu ndia leona.”

¹⁶Abraham sipok belik ndia, de ana leke doifulak de'u Efron nafa'dak-ka, fo nde doifulak natun haa, boema ala tai doifulak sila-la, tunga basa manadangan-nala pake tatais-sa. Boema ana baen leo Efron neu, de basa hataholi Het sila-la sakasii.

¹⁷Leondiak, Efron tinan manai Leak Makhpela, fo nai Mamre boboan dulu, da'di Abraham pusakan. Dae ndia neni tina no leak-ka, boema basa ai manai dalen-na, ma ai manai dae too-nala boeo, lai dalek.

¹⁸Basa hataholi Het manai nakabuak nai kota lelesuinan-na dalek, lakaheik dae ndia, da'di Abraham pusakan.

¹⁹Basa ndia boema, Abraham natoi saon Sara nai Leak Makhpela, fo nai dae Kanaan-na dalek.

²⁰Leondiak, tina no leak fo makahulun-na, hataholi Het-tala pusakan-na, besak ia, ana da'di Abraham pusakan, de ana taon da'di mamana natoi-natono mamates.