Read Termanu KEJADIAN 24 Bible Online

KEJADIAN 24 - Termanu bible

KEJADIAN 24

¹Abraham namalasi nanseli so, boema MANETUALAIN ba'e-palan nai basa dede'ak lala'en-na dalek.

²Faik esa boema, Abraham nafa'da atan fo manakoasa basa hata-heton lala'en-na nae, “Tao o limam-ma neu au puu huung-nga.

³Fo soo-supa menik Amak, MANETUALAIN, fo manakoasa lalai ma daebafak-ka, mae neukose o ta sanga fe au anang Isak, saoinak nai basa hataholi manai dae Kanaan ia-la fa.

⁴O muse fali leo au nusa-namong muu, fo sanga fen saoinak, nai au tolano ka'a-fa'ding-ngala dalek.”

⁵Boema, ata ndia natanen nae, “Tao leo beek, fo metema anafe'oanak ndia, ta nau la'o ela uman-na, ma ana ta nau tunga au leo, nusak ia mai fa? Au muse o Tuan anan ndia, leo Tuan nusa-namon neu do?”

⁶Tehu, Abraham nataa nae, “Masanene'dak! Boso moo au anang-nga leo naa neu makandondook!

⁷MANETUALAIN, fo manakoasa lalai-a, no basa au eme au amang uman mai, ma neme au tolanoo ka'a-fa'ding-ngala mai, ma Ana soo-supa basa au, nae neukose Ana fe nusak ia neu au tititi-nonosing. Ndia boeo, neukose nadenu ata nusa so'dan-na, fo ana tulu-fali o, fo ela o hapu matongo moo saoinak esa nai naa, soaneu au anang-nga.

⁸Tehu, metema anafe'oanak ndia, ana ta nau tunga no o fa, soona o matapo'i neme soo-supak ndia mai. Leomae leo beek boe, boso moo anang ndia leo naa neu.”

⁹Basa boema, ata ndia tao liman-na neu ndia Tuan Abraham puu huun-na, de ana soo nae, ma neukose ana tao tunga Abraham nonoken ndia.

¹⁰Ata ndia, foo neni onta sanahulu, ma bua-lo'a kabeli mata-matak-kala neme ndia tuan-na pusakan-na mai, de ana la'o leo kota fo, Nahor mamana leleon-na, nai tepo-lelek fai maso'dan-na; mamanak ndia, nai Mesopotamia boboan kii.

¹¹Lelek ana losa naa boema, ana fe onta sila-late'e, fo ela ala hahaeaon-nala, deka no oedolu esa, nai kota deak. Le'donoso boema, basa inak-kala mai aso oe nai oedolu ndia.

¹²Boema, ata ndia hule-haladoi nae, “Amak, fo au tuang Abraham MANETUALAIN-na, fali-ma au dei, fo ela au bela-ba'ung, neni buna-boak nai faik ia; madale malole neu au tuang Abraham.

¹³Mitak au apadeik deka o oedolu ia. De ba'ihanak seluk te, neukose anafe'oanak manai kota ia, ala mai aso oe.

¹⁴Neukose au afa'da anafe'oanak sila-la esa ae, ‘Sue-na, makona o nggusim-ma, fo fe au oe faa dei.’ Metema, nataa nae, ‘Minu leona, ma au fe Ama onta nala linu boe!’ soona ndia nde, O helen soaneu O atam Isak. Metema, dede'ak ndia da'di soona, neukose au bubuluk, ae O madale malole neu au tuang Abraham.”

¹⁵Lelek ana bei hule-haladoi ndia te, Ribka fo anafe'oanak esa, mata makeek nanseli, ma bei matatema, losa oedolu ndia, neni nggusi nai alun lain. Betuel anan ndia, ma Betuel ina-aman nde been-na, nde Nahor ma Milka; Abraham ka'an Nahor ndia. Ribka neu leo oedolu ndia neu, de ana aso oe leo nggusin dale neu, fo ana sanga fali ne'un.

¹⁶

¹⁷Tehu Abraham atan-na, neu deka noon, de nafa'dan nae, “Fali-ma au dei, Anang-ngo, fe au inu neme o nggusim ndia mai.”

¹⁸Boema, anafe'oanak ndia nataa nae, “Minu leon Ama, boema no lai-laik, nakona nggusin-na neme alun lain mai, de ana ho'u nggusi ndia, ma ana fe ata ndia ninu.”

¹⁹Lelek ata ndia ninu basa boema; anafe'oanak ndia nae, “Au aso fe Ama ontan-nala linu boe, fo ela bana sila-la linu lakabete.”

²⁰Basa boema, no lai-laik, ana po'a oe manai nggusi ndia dalek, leo onta-la mamana nininun-na dalek neu, boema nalai fali seluk leo oedolu neu, de neni oe ba'uk-ka seluk, losa bana sila-la linu losa lakabete.

²¹Ndia te, no denge-dengek, Abraham atan-na taoafik nakandoon. Ana hii bubuluk, ade MANETUALAIN fe ndia ue-le'din nabuna-naboa do ta.

²²Basa onta-la linu lakabete boema, Abraham atan-na ho'i-na ndeli lilopilas esa, de ana taon neu anafe'oanak ndia panan-na. Ma ana tao sue lilopilas dua neu lima lesun-na.

²³Boema, ata ndia nae, “So'ba mafa'da su'dik, o amam na'den-na. Ade hapu mamana susunguk nai uman, soaneu ami do ta?”

²⁴Anafe'oanak ndia nataa nae, “Au amang na'de Betuel, fo Nahor ma Milka anan-na.”

²⁵“Nai ami umam, hapu mamana susunguk soaneu Ama, boema ha'deaik makadotok boe, ma nana'a bana.”

²⁶Boema, ata ndia senek, fo ana sene-do'ok MANETUALAIN.

²⁷Nae, “Koa-kio Amak, fo au tuang Abraham MANETUALAIN-na. Se'kona MANETUALAIN manalilinekak, ma dalen-na malole neu au tuang Abraham. Ana hela-nole au tutik, leo tolanoo ka'a-fa'din neu.”

²⁸Basa boema, anafe'oanak ndia, nalai leo inan uman neu, de ana tuin basa manada'dik sila lala'en-na.

²⁹Ribka maka'ak, fo na'de Laban. Namanene fa'din-na tui la'eneu hata fo ata ndia nafa'dak-ka. Boeo nita ndeli lilopilas manai panan-na, ma sue lilopilas-sa nai fa'di ndia lima lesun-na. Boema, Laban nalai leo deak neu, fo natongon-no Abraham atan ndia, fo bei napadeik no ontan-nala nai oedolu matan-na.

³⁰

³¹Boema Laban nae, “Ama nde been-na, hataholi fo, MANETUALAIN ba'e-palan! Mai fo, ata teu leo ami umam teu. Ami sadia basa kama soaneu Ama so, ma mamanak soaneu Ama ontan-nala boe.”

³²Boema ata ndia tunga, de ana leo uma dale neu. Laban nakona heni onta-la bua-lo'a fufuan-nala, de ana fes ha'deaik, fo bana sila-la la'a. Basa ndia boema, neni fe Abraham atan-na, no basa manatungan-nana oe, fo ala safe ein-nala.

³³Lelek sadia nana'a-nininuk boema, ata ndia nae, “Metema, au beita anduku-alosak au ini hala heheluk-ka fa soona, au ta u'a fa.” Boema Laban nae, “Na, kokolak leona.”

³⁴Boema, Abraham atan-na mulai kokolak nae, “Abraham atan, au ia.

³⁵MANETUALAIN ba'e-pala au tuang ndia ba'un-na seli de Ana taon-nan, da'di namasu'i hatu-hatu. MANETUALAIN fe basan bi'ilopo, bi'ihiik, sapi, onta, keledei ma lilopilas lilofulak boe, boema ata touk ata inak.

³⁶Au tuang-nga saoinan Sara, nai fai lasin-na dalek, besak-ka ana bongi ana touk, de au tuang-nga, fe basa hata-heton lala'en-na neu anan ndia so.

³⁷De nadenu au tao hehelu-balataak, pake soo-supak, fo ela au tunga paletan-na. Nae, ‘O boso hele fe au anang-nga, saoinak neme anafe'oanak manai dae Kanaan ia-la mai,

³⁸tehu hele neme au amang teidale-bobongin-nala, do neme tolanoo ka'a-fa'din-nala mai. Da'di, muu lai-lai leo naa muu.’

³⁹Boema, au atanen ae, ‘Tao leo beek, fo metema anafe'oanak ndia, ta nau tunga no au fa?’

⁴⁰Boema, nataa nae, ‘MANETUALAIN fo au tungan tataas esa, neukose nadenu ata nusa so'dan-na mai, fo ana tulu-fali, fo ela o bela-ba'um neni buna-baok. Neukose, o hapu saoinak ba'eneu au anang-nga, fo nde neme au amang teidalen-nala mai.

⁴¹Ka'da, metema ala ta sipok o fa soona, besak-ka o matapo'i meme o soo-supam mai.’

⁴²Ma lelek, na'kasa au losa oedolu-a, au hule-haladoi nai au daleng dale ae, ‘MANETUALAIN, fo au tuang Abraham MANETUALAIN-na, ela leo been-na Ana fe au bela-ba'ung, neni buna-boak.

⁴³Neukose, au apadeik ahele nai oedolu ia su'un-na. Metema anafe'oanak esa, ana mai aso oe soona, neukose au oken oe, fo ela ana fe au inu.

⁴⁴Metema, ana nau fe, ma noke boe, fo ana fe au ontang-ngala linu, soona sa'di leo been-na, ndia nde MANETUALAIN helen, da'di au tuang-nga anan ndia saon-na.’

⁴⁵Au beita hule-haladoi basa nai au daleng dale fa, te Ribka mai, te ana su'u nggusi nai langan lain, boema ana aso oe neme oedolu dale mai. Basa boema, au afa'dan ae, ‘Sue-na, fe au inu dei.’

⁴⁶Boema, lai-lai nakona heni nggusi neme langan lain mai, de nae, ‘Minu leona, te au sanga fe Ama onta-nala linu boe.’ Boema au inu, de basa ndia boema, ana fe au ontang-ngala linu boe.

⁴⁷Basa ndia boema, au atanen ae, ‘O amam nde see?’ Boema, nataa nae, ‘Au amang nde Betuel, fo Nahor no Milka anan-na.’ Boema au tao ndeli lilopilas neu panan-na, ma suek pasan esa neu lima lesun-na.

⁴⁸Boema, au sene-do'ok ma koa-kio Amak, fo au tuang Abraham MANETUALAIN-na, no au leo ia mai, fo leo au tuang-nga tolanoo ka'a-fa'din mai, nalosa au hapu atongo o inaanak ia, ba'eneu anan-na.

⁴⁹Besak ia, metema emi nau tao au tuang-nga no malole, ma tao matetu emi lulu'a-lelepam soaneun, da'dileo tolanook soona, sa'di leo been-na mafa'dan neu au, tehu metema ta soona, mafa'dan neu au boe, fo ela au bubuluk, au muse tao beek.”

⁵⁰Laban ma Betuel lataa lae, “Hu kande manada'dik ndia, ana da'di neme MANETUALAIN mai, de ami ta mandaa fe nakeketuk fa.

⁵¹Mitak Ribka nde ia; nemen-na, fo ana tunga no Ama, fo ana da'di Ama tuan-na, anan-na saon-na, sama leo hata fo, MANETUALAIN nafa'dan.”

⁵²Lelek Abraham atan ndia namanene sila dede'an ndia boema, ana sene-do'ok MANETUALAIN.

⁵³Boema, ana kalua bua papakek, lilo-henu, lilofulak, lilopilas, de ana fe basa sila-la leo Ribka neu. Ana fe ka'an ma inan, bua palsen kabeliina-la.

⁵⁴Basa ndia boema, Abraham atan-na, ma manatungan-nala, la'a linu boema ala sungu leme ndia. Balahaa fafaik, de ala fo'a boema, ata ndia nae, “Fe au loak, fo au fali leo au tuang-nga u.”

⁵⁵Tehu Ribka ka'an-na, ma inan lae, “Nemen-na, fo Ribka leo no ami, fafa'kama mamasok esa do faik sanahulu seluk, fo basa ndia soona, besak-ka ne'i.”

⁵⁶Tehu ata ndia nae, “Boso makataka mahele au. Te MANETUALAIN taon-na au leleo-lala'ong neni buna-boak so; de fe au loak, fo au fali leo au tuang-nga u.”

⁵⁷Boema lata lae, “Ata ta loo-ta Ribka, fo tatane, ndia hahapun-na.”

⁵⁸Boema laloo Ribka, de latanen lae, “O nau tunga hataholi ia do ta?” Inaanak ndia nataa nae, “Hei, au nau.”

⁵⁹Boema ala po'i Ribka no inak mana nafadulin-nana, loo Abraham atan-na, ma manatungan-nala la'o leona. Boema ala fe Ribka baba'e-papalak nenik hala-kokolak ia-la: “Sa'di leo been-na, o fo Ribka, da'di inak neu hataholi duta-duta-la! Sa'di leo been-na, o tititi-nonosim tao-la kota musu-la lakatele neun!”

⁶⁰

⁶¹Basa boema, Ribka no ata inak muli-solun-nala laheheleaon, boema ala sa'e onta, de ala tunga Abraham atan ndia.

⁶²Ndia te, Isak mai neme moo solokaek-ka mai so, de ana tunga oedolu fo loken lae, “Ndia Fo Manataoafik Neu Au” de ana leo nai Kanaan boboa konan-na.

⁶³Nai le'donosok esa boema, ana kalua neme uma ofun dale mai, fo sanga neu la'o-la'o nai tina, boema nita onta-la mai.

⁶⁴Lelek Ribka nita Isak boema, ana kona neme onta lain mai,

⁶⁵de natane Abraham atan ndia nae, “See touk manai tina ndia, de ana la'ok nasale leo ita mai?” Ata ndia nataa nae, “Au tuang-nga nde ndia.” Boema, Ribka ho'i na lafa lalaan-na, de ana potiketu mata-panan, fo da'di leo ta'du-tana ha'da-holomata.

⁶⁶Basa boema, ata ndia tui Isak, basa hata lala'en-na fo, ana tao-no'in so.

⁶⁷Basa ndia boema, Isak no Ribka leo nai uma ofu, fo inan Sara leo hai neme dalek so, de ana tao Ribka da'di ndia saoinan. Isak sue Ribka; boema Isak dale manasusan, hu kande inan mamaten-na, da'di namahokok.