Read Termanu KEJADIAN 25 Bible Online

KEJADIAN 25 - Termanu bible

KEJADIAN 25

¹Abraham ka'bing seluk no inak esa, na'de Ketura.

²Saon ndia, bongin-na ni'iana-la, na'den-nala nde ia: Zimran, Yoksan, Medan, Midian, Isybak, ma Suah.

³Syeba ma Dedan fo aman nde Yoksan, ma Dedan tititi-nonosin nde hataholi Asyur, hataholi Letus, ma hataholi Leum-mala.

⁴Midian anan-nala nde, Efa, Efer, Hanok, Abida, ma Eldaa. Ketura tititi-nonosin basa sila-la.

⁵Leomae Abraham fe basa hata-heton lala'en-na neu Isak,

⁶nai tepo-lelek bei naso'da, ana fe bua palsen makadotok neu sao fe'e-fe'en-nala, anan-nala. Basa boema, nadenu anan sila-la; fo ala lali leo nusak manai Kanaan boboan dulu neu, fo ela ladook aon-nala, neme anan Isak mai.

⁷Abraham maten nai fai lasin-na dalek, fo nde teun natun esa hituhulu lima.

⁹Anan Isak, ma Ismael latoin nai Leak Makhpela, fo nai tina manai Mamre, boboan dulu. Makahulun-na, Zohar fo hataholi Het ndia anan Efron tinan ndia,

¹⁰tehu Abraham asa-nan neme hataholi Het ndia mai so. Latoi Abraham saoinan Sara, nai ndia boe.

¹¹Lelek Abraham mate basan boema, Manetualain ba'e-pala Isak, fo Abraham anan-na. Nai lelek ndia, Isak leo deka no oedolu fo loken soona lae, “Ndia Fo Manataoafik Neu Au.”

¹²Ismael nde been-na, Abraham no Hagar, fo ina Masir, ma Sara atan-na, anan ndia.

¹³Ismael anan sanahulu dua, fo nanakokolak nai ia, tunga fai bobongin-nala, fo nde: Nebayot, Kedar, Adbeel, Mibsam, Misyma, Duma, Masa, Hadad, Tema, Yetur, Nafis ma Kedma. Anak sila-la da'di leoinak-ka sanahulu duak-kala ama kain-na, de loke sila desan-na, ma uma ofun-na tunga anak sila na'den-nala.

¹⁷Ismael maten nai lelek teun natun esa teluhulu hitu.

¹⁸Tititi-nonosin leo nai nusak manai Hawila ma Syur tala'da, fo nai Masir boboan dulu, leo Asyur neu. Ala ta leo lakabubua loo Abraham tititi-nonosi fe'e-fe'en-nala fa.

¹⁹Isak, fo Abraham anan-na, tutuin-na nde ia.

²⁰Isak teun haahulu, nai lelek ana ka'bing no Laban fa'din Ribka, fo Betuel hataholi Aram esa neme Mesopotamia mai, anan ndia.

²¹Hu kande Ribka ta bongi fa, de Isak hule-haladoi neu MANETUALAIN soaneu saoinan Ribka. De MANETUALAIN sipok Isak huhule-haladoin, boema Ribka nailu.

²²Ana nailu ana takalapak, de beita bongi ni'iana sila fa te, laule-lapo'de nai tein dale. Ribka nae, “Tao le'e de, manada'dik ia, muse ana da'di neu au aoinang-nga?” Boema ana dokodoe, natutu'duk neme MANETUALAIN mai.

²³ MANETUALAIN nafa'dan nae, “Leoina dua nai o teim dale; neukose o bongi leoina dua, fo esa musu no esa; fa'dik-ka balakain-na lena neme ka'ak-ka mai, fo uluk-ka nalalau-naoono mate'a teisu'uk-ka.”

²⁴Fain-na losa, ba'eneu Ribka ana bongi, de ana bongi ni'iana touanak dua, takalapak.

²⁵Uluk-ka dulan-na pilabalanggeok, ma loun-na sama leo ba'du manalu kabubulus-sa. Hu ndia de, ala foin na'de Esau.

²⁶Lelek fo bongi ana ka dua mai te, liman-na ho'u Esau eitingan-na. Hu ndia de, foin na'de Yakob. Nai lelek Isak teun neehulu, boema bongi duas.

²⁷Ni'iana ka duak sila-la, boetai lamatuak-ka. Esau da'di manasopu-danga malelaina, ma ana hii leo nai mook-kala, tehu Yakob mananee-nee lino-linok, ma ana hii ka'da nai uma.

²⁸Isak suen-na Esau ba'un-na seli, nana Isak hii na'a paa sopu-dangak. Tehu Ribka susuen-na, ba'un-na seli neu Yakob.

²⁹Nai faik esa, fo nai lelek Yakob nasu fufue pilas boema, Esau fali neme sopu-dangan mai te namala'a.

³⁰Boema, nafa'da Yakob nae, “Au amala'a anseli, de fe au fufue pilas ndia faa anak.” (Hu ndia de loken soona lae Edom.)

³¹Boema Yakob nataa nae, “Hei, sa'di o fe makahuluk, o haak ana uluk-ka mai dei.”

³²Boema Esau nae, “Au amala'a anseli so, de paluu beek no haak ndia!”

³³Yakob nafa'da seluk nae, “Soo-supa makahuluk, mae o fe o haak-ka leo au mai.” Esau soo, de ana fe ndia haak-ka leo Yakob neu.

³⁴Basa ndia boema, Yakob fen loti, ma ana ba'e duak fufue pilas ndia, de ana fen seli. Esau na'a-ninu basa boema, ana la'o. Esau nakadadaek ndia haak, so fo da'dileo ana uluk-ka tutuin-na leondiak