Read Termanu KEJADIAN 29 Bible Online

KEJADIAN 29 - Termanu bible

KEJADIAN 29

¹Yakob la'ok nakandoo leleo-lala'on, fo neu leo nusak manai Kanaan boboan dulu neu.

²No kaiboik, nita oedolu esa nai mook-ka, ma bi'ilopo, bi'ihiik bubuak telu lu'u nai oedolu ndia boboan-na, fo biasan-na bi'i sila-la, linu oe lai ndia. Oedolu ndia, nanatatanak nenik batu matuaina.

³Metema, basa bi'ihiik bi'ilopo lakabubua lai mamanak ndia soona, basa manafoo-la, loliheni batu ndia leo boboak neu, fo ala fe bi'ihii bi'ilopo sila-la linu. Basa soona, basa manafoo-la, tatana falik oedolu ndia.

⁴Boema, Yakob natane basa manafoo manai sila-la nae, “Hai tia-laing-ngala lemin, emi meme bee mai?” Ala lataa lae, “Ami meme Haran mai.”

⁵Yakob natane seluk nae, “Emi malelak Laban, fo Nahor anan-na do ta?” Ala lataa lae, “Ami malelak-kana.”

⁶Boema, Yakob natane seluk nae, “So'da-molek do?” Ala lataa lae, “So'da-molek. Mitak anafe'on mana'de Rahel-la, nde ndia. Ana foo neni aman bi'ihii bi'ilopon-nala leo ia mai.”

⁷Yakob nae, “Besak-ka le'dohana ia, de fain-na beita losa, ala foo falik bi'ihiik bi'ilopo leo lalae dale neu fa. Taole'e de, emi ta fe bana sila linu fa, ma emi po'ilota kasa la'a na'u seluk bai?”

⁸Ala lataa lae, “Makanaema basa bi'ilopo-la lakabubua lai ia so, ma oedolu-a batu tatanan-na, nanalolihenik soona, besak-ka ami hapu fes linu.”

⁹Yakob bei kola-kola nos, te Rahel foo neni bi'ihii bi'ilopon-nala mai.

¹⁰Lelek Yakob nita Rahel sama-sama no bana-manun sila-la boema, Yakob neu leo oedolu neu, de ana loliheni batu tatanan-na leo boboak neu, de ana fe bana sila-la linu.

¹¹Basa boema, nate'a Rahel ma ana kii, nanahu name'da kasian neu Rahel.

¹²Nafa'da Rahel nae, “Ribka fo o amam feton-na, anan au ia.” Boema Rahel nalai fali leo uman neu, fo ana tui dede'ak ndia neu aman.

¹³Lelek Laban namanene la'eneu Yakob, fo feton-na anan ndia boema, nalai neu fo sanga natongon-no n. Laban holu-na Yakob, de ana de'in, de basa boema, non leo uma neu. Yakob tui basa dede'an lala'en-na, neu Laban boema,

¹⁴Laban nae, “Memak tete'ek-ka, o ia teidalek fo, ana deka no au.” Yakob leo neme ndia, bulak esa dalen-na.

¹⁵Nai faik esa boema, Laban nafa'da Yakob nae, “Ta nandaa o maue-male'di neu au no louk fa, ka'da hu kande au tolano ka'a-fa'ding o. O nau ngga'di a de'ubee?”

¹⁶Laban ana inan dua; de ka'ak-ka na'de Lea, ma fa'dik-ka na'de Rahel.

¹⁷Lea matan-na, mana'a hiik, ma Rahel aon-na mana'ahiik ma mata makeek.

¹⁸Yakob dalen-na tu'da neu Rahel, hu ndia de, nataa Laban nae, “Metema to'o nau au sao Rahel soona, au nau aue-ale'di teuk hitu dalen-na.”

¹⁹Boema, Laban nae, “Malole lenak au fen leo o neu, neme au fen leo hataholi fe'ek neu; da'di, leo meme ia leona.”

²⁰Boema, Yakob naue-nale'di teuk hitu dalen-na, fo ana sao Rahel, nana ba'eneun teu-teuk sila-la sapu-lalo, sama leo faik de'ubee mesan, nanahu susue ina anafe'on-na neu Rahel.

²¹Basa ndia boema, Yakob nafa'da Laban nae, “Teuk hitu seli so; de po'i au sao To'o anafe'on-na leon.”

²²Boema Laban tao feta ka'bing, de ana ka'i basa hataholi manai kota ndia lala'en-na.

²³Tehu le'odaek ndia, Laban no Lea leo Yakob neu, te ta no Rahel neu fa, de Yakob sungu non. (

²⁴Laban fe ata inan-na na'de Zilpa neu Lea, fo ana da'di atan-na.)

²⁵Balahaa besak-ka, Yakob bubuluk, nae ana sao Lea nde ndia. Boema Yakob neu leo Laban neu, de nafa'dan nae, “Tao le'e de, To'o tao au leoiak? Ade, au aue-ale'di soaneu sao Rahel dei hetu? Tao le'e de, To'o ke'di-na au?”

²⁶Boema Laban nataa nae, “Tunga ha'dak manai ia soona, fa'dik-ka ta bole sao nakahuluk neme ka'ak-ka mai fa.

²⁷Mahani losa basa feta ka'bing fai ka hituk-ka soona, neukose au fe Rahel neu o boe, sa'di o nau maue-male'di teuk hitu dalen-na seluk.”

²⁸Yakob nakaheik, de basa feta ndia boema, Laban fen Rahel, fo da'di saon-na. (

²⁹Laban fe ata inan-na na'de Bilha neu Rahel, fo ana da'di atan-na.)

³⁰Yakob sungu no Rahel boe, ma ana sue Rahel lena heni Lea. Basa boema, naue-nale'di teuk hitu seluk.

³¹Lelek Amak-ka bubuluk, nae Yakob sue Rahel lena heni Lea, boema Ana fe Lea bongi anak, tehu Rahel ta hapu anak nahele fa.

³²Lea nailu, boema ana bongi anatouk esa. Nafa'da nae, “Amak-ka nita basa au susang-nga so, de besak ia, neukose au saong-nga sue au.” Boema ana foi anan ndia na'de Ruben.

³³Lea nailu seluk, boema ana bongi anatouk esa. Nafa'da nae, “MANETUALAIN fe basa au ni'iana ia so, nanahu Ana bubuluk, nae au ta nanasue-laik fa.” Boema ana foi anan ndia na'de Simeon.

³⁴Lea nailu seluk, de ana bongi ana touk esa. Nafa'da nae, “Besak ia, neukose au saong-nga nakadita no au, nanahu au bongi-a, anatouk telu so.” Boema ana foi anan ndia na'de Lewi.

³⁵Basa boema, Lea nailu seluk, de ana bongi anatouk esa. Nafa'da nae, “Oek ia, neukose au koa-kio Amak-ka.” Boema ana foi anan ndia na'de Yehuda. Basa ndia boema, Lea ta bongi so'on.