Read Termanu KEJADIAN 30 Bible Online

KEJADIAN 30 - Termanu bible

KEJADIAN 30

¹Tehu Rahel beita bongi anak boen. Hu ndia de, nape'da dalek no ka'an-na, boema nafa'da Yakob nae, “Fe au bongi anak, te metema ta soona, neukose mate au.”

²Yakob namanasa Rahel, de nafa'dan nae, “Manetualain, ta nde au ia fa. Ndia nde ta fe o bongi anak fa.”

³Boema Rahel nae, “Au atang Bilha nde ia; de sungu moon, fo ela ana bongi. No enok ndia, au bisa da'di mama, tunga ndia.”

⁴Boema, ana fe Bilha neu saon-na, de Yakob sungu no ata ndia.

⁵Bilha nailu, boema ana bongi anatouk esa.

⁶Rahel nafa'da nae, “Manetualain naketu basa, fo nok au so. Namanene au huhule-haladoing, de Ana fe au anatouk esa.” Boema ana foi ni'iana ndia na'de Dan.

⁷Bilha nailu seluk, de ana bongi anatouk esa.

⁸Rahel nafa'da nae, “Au puselaipana anseli, fo la'ban au ka'ang, de au sengi,” hu ndia de, ana foi ni'iana ndia na'de Naftali.

⁹Lelek fo Lea name'da, nae ndia ta bisa bongi anak so'on, boema ana fe atan-na, fo nde Zilpa neu Yakob, fo ana da'di saon-na.

¹⁰Zilpa bongi anatouk esa.

¹¹Lea nafa'da nae, “Au hapu nanalak,” boema ana foi ni'iana ndia, na'de Gad.

¹²Boema, Zilpa bongi anatouk esa seluk,

¹³de Lea nafa'da nae, “Au aua-anale anseli! Besak ia, neukose basa inak-kala lafa'da lae au aua-anale.” Hu ndia de, ana foi ni'iana ndia, na'de Asyer.

¹⁴Nai fai ketu-kolu gandum-ma, boema Ruben neu leo mook-ka neu, de ana hapu bubu'u-palusa mo'do-akidook matak esa nai ndia, boema ana ho'i nenin leo inan Lea neu. Boema, Rahel nafa'da Lea nae, “Fe au, o anam-ma neni mo'do-akidook ndia faaanak dei.”

¹⁵Lea nataa nae, “O ho'i-ma au saong-nga so, de beita dai fa do? Besak ia, nakalenak o so'ba ho'i-ma mo'do-akidook fo au anang-nga nenik-ka bai.” Boema Rahel nataa nae, “Metema, o nau fe o anam-ma mo'do-akidoon ndia leo au mai soona, le'odaek ia, o bole sungu moo Yakob.”

¹⁶Lelek le'donoso, de Yakob fali ma'in neme mook-ka mai boema, Lea neu soluk-kana, de nafa'dan nae, “Le'odaek ia, sungu moo au, nanahu au bae basa dede'ak ndia, nenik au anang-nga mo'do-akidoon so.” Boema, le'odaek ndia Yakob sungu non.

¹⁷Manetualain sipok Lea hule-haladoin, de nailu boema, ana bongi ka lima.

¹⁸Lea nafa'da nae, “Manetualain fe au ngga'di so, nana au fe basa Zilpa leo au saong-nga neu so,” hu ndia de, ana foi anan ndia na'de Isakhar.

¹⁹Lea nailu seluk, de ana bongi ana ka nee-a.

²⁰Nafa'da nae, “Manetualain fe basa au, bua palsen mana'ahiik nanseli so. Besak ia, au saong-nga neukose ana fe ha'da-holomata neu au, nana au bongi-a, ni'ianatouk 6 so,” hu ndia de, ana foi anan ndia na'de Zebulon.

²¹Basa ndia boema, Lea bongi anainak esa, de ana foin na'de Dina.

²²Boema, Manetualain nafandele neu Rahel; Manetualain sipok hule-haladoin, de Ana fen bongi anak.

²³Boema Rahel nailu, de ana bongi anatouk esa. Rahel nafa'da nae, “Manetualain tao namopo au matasi'da-matasaeng so.

²⁴Sa'di leo been-na, MANETUALAIN fe au anatouk esa seluk.” Hu ndia de, ana foi anan ndia na'de Yusuf.

²⁵Rahel bongi basa Yusuf boema, Yakob nafa'da Laban nae, “Po'i au fali leo au nusang-nga u.

²⁶Po'i au la'o, o au saong duas, ma au anang-ngala. Au hapus leme au aue-ale'di fe To'o so. To'o bubuluk, au aue-ale'di puselaipana anseli so.”

²⁷Laban nafa'dan nae, “Mamanene dei: te au hapu hala nafa'da elak, nae hu kande o, de Amak-ka ba'e-pala basa au so.

²⁸Ka'da mafa'da, o moke de'ubee.”

²⁹Boema, Yakob nataa nae, “To'o mesak-kana nde bubuluk, au aue-ale'di puselaipana anseli so, ma To'o bana-manun boetai lamade'uk-ka, nanahu au nde akabobois-sala.

³⁰Au beita mai fa, To'o hata-heton ta ba'uk-ka fa, tehu besak ia, To'o namasu'i so. MANETUALAIN ba'e-pala basa To'o nanahu au. Besak ia fain-na losa, au aue-ale'di fe au teidaleng-ngala mesak-kasa.”

³¹Laban nae, “Da'di, au muse fe o beek?” Yakob nataa nae, “Boso fe au hata esa boen. Neukose au foo ahele To'o bana-manun, sa'di To'o nakaheik au nonokeng-nga nde ia:

³²Fe au loak nai faik ia, fo au u memete basa To'o bi'ihii bi'ilopon-nala, fo au ho'i-a basa bi'ilopo ana nggeok-kala, ma basa bi'ihii ana keke'ak do kokotok boe. Au ahiik ngga'di-a, nde ndia.

³³Nai fai makabuin, no mudak la'i esak-kana, To'o bisa bubuluk, ade au tao tunga ndoon-na so do beik. Metema, To'o mai palisak au ngga'ding-nga, fo To'o nita, hapu bi'ihiik fo, ta kokotok do ta keke'ak do bi'ilopo fo ta nggeok fa soona, neukose To'o bubuluk, mae au amanako bana sila-la so.”

³⁴Boema, Laban nataa nae, “Au akaheik! Neukose ata tao tunga o nonokem ndia!”

³⁵Tehu neu faik ndia boema, Laban ta'daheni basa bi'ihii mane madulak do keke'ak-kala, ma basa bi'ihii ina keke'ak, kokotok do hapu nggelok fulan-na makahatuk; boeo ana ta'daheni basa bi'ilopo nggeok-kala. Basa boema, nadenu anan-na, fo nanea bana sila-la,

³⁶boema ala foo leni bana sila-la leo dook-ka leu, fo sue kande dook-ka neme Yakob mai. La'ok faik telu soona, besak-ka losa mamanak ndia. Yakob foo Laban bi'ihii bi'ilopo bubuan, fo bei elak-kala.

³⁷Basa boema, Yakob ho'i ai daa maseek, ai ketapang, ma ai berangan-na ndana momo'don-na, de ana siiheni loun beke selik, nalosa ai ndanak sila da'di keke'ak.

³⁸Ana pe'da ai ndanak sila-la, neu bi'ihii bubuak sila-la mamana nininun-nala dalek, nanahu bana sila-la sanga linu soona bi'ihii mane la'bi bi'ihii ina.

³⁹Da'di, metema bi'ihii mane-a, la'bi bi'ihii ina deka no ai ndanak sila-la soona, anan-na madulak, ta soona, keke'ak do kokotok.

⁴⁰Basa soona, Yakob foo neni bi'ilopo-la leo ndia neu, fo ana fes lasale leo, bi'ihii madulak ma nggeok-kala leu. No enok ndia, ana hapu bana-manu, de ana ta'da henis, leme Laban bana-manun-nala dalek mai.

⁴¹Metema, bi'i mane mapukak-kala, ala labi bi'i ina-la soona, Yakob pe'da ai ndanak nanasii louk sila-la deka no bi'i-la, fo nai mamana nininun-nala dalek.

⁴²Tehu ana ta pe'da ai ndanak sila, deka no bana tapandoes-sala fa. Da'di, basa bana fulak sila-la tapandoes, de Laban nuun sila-la, tehu basa bana nggeok, keke'ak ma kokotok sila-la balakaik, de Yakob nuun sila-la.

⁴³No enok ndia de, Yakob namasu'i hatu-hatu. Nanuu bi'ihiik bi'ilopo, onta, keledei ma ata makadotok.