Read Termanu KEJADIAN 31 Bible Online

KEJADIAN 31 - Termanu bible

KEJADIAN 31

¹Yakob namanene Laban anan-nala kokolak lae leo ia, “Yakob ho'i-na basa ita aman hata-heton lala'en-na so. Basa su'i-beten sila-la, da'di neme ita aman hata-heton mai.”

²Yakob boeo nita, nae Laban ta mangana'uk non so'on, sama leo makahulun-na fa.

³Boema, MANETUALAIN nafa'da Yakob nae, “Fali mu'um-ma leo o amam, ma o tolanoo ka'a-fa'dim-mala nusan-na muu. Neukose, Au asulu-ahapa o.”

⁴Basa ndia boema, Yakob nadenu hataholi neu nafa'da Rahel ma Lea, fo daenga latongo loon nai mook-ka, fo nai bi'ihii bi'ilopon-nala mamana nana'an-na.

⁵Boema Yakob nafa'da duas nae, “Au ita emi amam, ta tao mangana'uk neu au so'on, sama leo mandoo fai-a fa; tehu Manetualain, fo au amang sene-do'ok-ka, nasulu-nahapa au.

⁶Emi dua boeo, bubuluk mae au aue-ale'di puselaipana fe emi amam so.

⁷Leomae leondiak boe, ana ke'di-na au so, de naketu nasafali au ngga'ding-nga losa la'i sanahulu. Tehu Manetualain ta po'ilotak-kana, tao mangalauk neu au fa.

⁸Nai lelek emi amam nafa'da nae, ‘O soa bi'ihiik kokotok-kala, fo da'di neu o ngga'dim-ma,’ boema basa-basas bongi ana kokotok no'u-no'u. Nai lelek nafa'da nae, ‘O soa bi'ihiil kekeak-kala, fo da'di neu o ngga'dim-ma,’ boema basa-basas bongi ana keke'ak no'u-no'u.

⁹Manetualain ho'i-na emi amam bana manun-nala, de Ana fes leo au mai-a, enon-na leondiak.

¹⁰Ma neu faik fo, bana sila-la lala'bi, au alame'i au ita basa bi'ihii mane fo manamala'bik-kala, madulak, kokotok ma keke'ak.

¹¹Manetualain ata nusa so'dan-na kokolak no au, nai me'is ndia dalek nae, ‘Yakob!’ Tutika au ataa ae, ‘Ya.’

¹²Ata nusa so'dak ndia nafa'da seluk nae, ‘Mete mitak, bi'ihii mane fo manamala'bik sila-la, madulak, ma kokotok ma keke'ak. Au sue ito-ato leondiak soaneu o, nanahu Au ita basa, hata fo Laban taon soaneu o so.

¹³Au nde Manetualain, fo natu'du aoinan-na neu o, neme Betel so. Nai naa, o tunu-hotu basa batu nasanene'dak esa, nenik o po'a mina setun neu lain. Nai naa boe, o soo neu Au. Besak ia, maheheleaom, fo fali leo o nusa fuafuni-ndalusitam-ma muu.’ ”

¹⁴Boema Lea no Rahel lataa lae, “Ami ta hapu baba'ek neme ami amam hata-heton mai so'on,

¹⁵nafa'da nae, ami ia, da'dileo hataholi nusa dea. Ana nase'oheni ami, de hata fo ana sipo-nan ndia, nabasan so boe.

¹⁶Manetualain ho'i-na, basa hata-heto neme ami amam mai ndia, tunga ndoon-na, ami mo ami anam-mala nuun sila. Ka'da tao hata fo, Manetualain paletan neu o leona.”

¹⁷Boema Yakob nafafa'u bua-lo'an, fo ana fali leo aman nai nusa Kanaan-na. Nakasasa'ek sao-anan-nala leo onta lain neu, ma ana foo-na basa bi'ihii bi'ilopon-nala, ma basa hata fo ana hapun nai Mesopotamia.

¹⁸

¹⁹Nai lelek ndia, Laban nai mook-ka, fo ana bei nggute bi'ilopon-nala bulun-na, ma nai lelek ndia nde, Rahel namanakon-na, aman dodoki-dudulan fo manamasulu-mahapa teidalek-ka.

²⁰Jakob ke'di-na Laban, nenik ta nafa'dan lala'on-na fa.

²¹Ana ho'i neni basa hata-heton lala'en-na, de ana la'o no nakalupuk. Ana lena Lee Efrat-ta, de neu leo nusa letelepak Gilead-ta neu.

²²Basa faik telu, besak-ka lafa'da Laban lae Yakob nalai so.

²³Boema Laban naloo nakabubua basa hataholin-nala, de basa-basas usi tunga Yakob nai faik hitu dalen-na, de ala tungan losa nusa letelepak Gilead-ta.

²⁴Le'odae boema, Laban nalame'i Manetualain mai, de nafa'dan nae, “Manea matalolole, fo boso fe Yakob nasanene'da mahelek makandondook, nenik dede'ak de'ek esa boen.”

²⁵Nai lelek ndia, Yakob napadedeik-na, lalaa teman-na nai pupukuk esa lain so. Basa boema, Laban no hataholin-nala, lapadedeik sila lalaa teman-na, nai pupuku fe'ek esa lain, fo bei nai nusak ndia boe.

²⁶Basa ndia boema, Laban nafa'da Yakob nae, “Taole'e de, o ke'di-ma au, de o malai moo au anang-ngala, nono'kabai sila hataholi fo, musu foo nenis?

²⁷Taole'e de, o ke'di-ma au, de o la'o no denge-dengek, ta no nate'ak fa? Leouni'ka, o mate'a soona, tao leo bee o, au po'i o la'o no namahokok, fo tambur ma kecapi-la lakamee tunga o!

²⁸Nakalenak bai, o ta fe au loak, fo au de'i au upu-anang, da'dileo ta'du-tana nasi'da-naba'ek boen. O tatao-nono'im ndia, nggoak nanseli!

²⁹Au balakaing-nga dai, soaneu tao mangalauk neu o, tehu le'odaek-ka, Manetualain, fo o amam sene-do'ok-ka, Ana fe au nasanene'dak, fo ela au boso fe o nasanene'da mahelek makadondook.

³⁰Au bubuluk, ae o lala'om ndia, hu kande o mahiik fali manseli. Tehu tao le'e de, o mamanako meni dodoki-dudulak, fo manamasulu-mahapa au teidaleng-ngala?”

³¹Boema Yakob nataa nae, “Au la'o no denge-dengek, nanahu au bii, neukose To'o ta po'i anan-nala la'o fa.

³²La'eneu dodoki-dudulak ndia soona, metema To'o hapu hataholi esa nai ia, nde namanako nenin soona, neukose hataholi ndia, nanahuku nisak. Palisak leona, ade hapu To'o bua-lo'an nai ia do ta. Metema hapu soona, ho'i-man leona. Fo ami hataholim-mala, bole lita matan.” Yakob ta bubuluk, Rahel nde namanakon-na dodoki-dudulak ndia fa.

³³Boema Laban neu nggale'da Yakob lalaa teman-na; basa ndia boema, neu leo Lea lalaa teman-na neu, ma neu leo Lea ata ka dua-nala, lalaa teman-na neu, tehu ana ta hapu dodoki-dudulak ndia fa. Mate'en-na, neu leo Rahel lalaa teman dale neu.

³⁴Ndia te, Rahel ho'i-na dodoki-dudulak ndia, de ana taon leo alukosu manai onta, ne'a sa'e ndalan dale neu, de nangatuuk neu lain. Laban nggale'da basa Rahel lalaa teman dale lala'en-na, tehu ana ta hapu dodoki-dudulak ndia fa.

³⁵Boema, Rahel nafa'da aman nae, “Ama boso mamanasa, te au ta hapu fo'a, fo sipok Ama fa, nana au hapu bula.” Laban sanga besa-besa, tehu ana ta hapu dodoki-dudulak ndia fa.

³⁶Boema Yakob namanasa leona, de nae, “Au tao tatao-nono'i mangalauk beek so?” natane no nasak nanseli. “Au sala beek, de nalosa To'o usi nahele au?

³⁷Besak ia, nggale'da basa au bua-lo'ang lala'en-na so, ade To'o hapu To'o buan ndia so do beik? Kalua buas ndia leona, fo taon mai ia, fo ela au hataholing-ngala, ma To'o hataholin-nala bisa litan, fo laketu nai ita 2, see ka nde ndoos.

³⁸Au leo o To'o, teuk duahulu dalen-na so. To'o bi'ilopo bi'ihiin-nala lamade'u so, tehu au beita u'a ita bi'ihii mane esa boen, neme To'o bana-manun mai fa.

³⁹Beita la'i esa fo, au ini bana makaak-kala kaa lisak-kala leo To'o mai fa, nana au nde nggatis-sala. Lamanako lenis, nai lele'dok do le'odaek boe, To'o nakaseti au, fo au nggatin.

⁴⁰Nasi'a, au ahoi le'do nai fai lele'don-na, makaleni nai fai le'odaen-na. Ma nasi'a, au ta hapu sungu faaanak boen.

⁴¹Au so'dang-nga leondiak, nai lelek au aue-ale'di fe To'o teuk duahulu dalen-na. Au aue-ale'di teuk sanahulu haa dalen-na, fo sue kande au hapu To'o ana ka duan sila-la, ma teuk nee seluk, fo au hapu bi'ihii bi'ilopo sila-la. Ma nai lelek ndia boe, To'o naketu nasafali au ngga'ding-nga losa la'i sanahulu.

⁴²Leouni'ka, au bei-ba'i kaing Manetualain-na, fo nde Manetualain fo Abraham ma Isak sene-do'ok-ka, ta nasulu-nahapa au fa, soona tao leo bee-o, To'o nadenu basa au, fo au la'o no lima louk so. Tehu Manetualain taoafik neu au toto'a-tataang, ma tatao-nono'ik fo au tao-no'in, de le'odaek-ka, Ana fe basa nakeketun-na so.”

⁴³Boema Laban nataa Yakob nae, “Au anang inak-ka duak sila-la; anan-nala nde been-na, au nuung, ma bi'ilopo bubuak sila-la boeo au nuung. Tete'ek-ka, o mita basa hata lala'en manai ia-la, au nuung basa sila-la. Tehu au ta hapu tao hata-hata, soaneu au akataka ahele au upuanang-ngala fa.

⁴⁴Hu ndia de, mai fo ata tao hehelu-balataak, ma takatoto'dok batu, da'dileo ta'du-tana hehelu-balataak ndia.”

⁴⁵Basa boema, Yakob ho'i-na batu esa, de napadedeik-kana, da'di batu nasanene'dak.

⁴⁶Boema, nadenu hataholin-nala, fo tao batu nananaunuk. Basa ndia boema, la'a sama-sama deka loo batu nananaunuk ndia.

⁴⁷Laban foi batu nananaunuk ndia na'de Yegar-Sahaduta, tehu Yakob foin na'de Galed.

⁴⁸Laban nafa'da Yakob nae, “Batu nananaunuk ia, neukose ana da'di, batu nasanenedak neu ita dua.” Hu ndia de, loke mamanak ndia soona lae, Galed.

⁴⁹Laban boeo nafa'da nae, “Sa'di leo been-na, MANETUALAIN mete-nakanae ita, nai ita maso'dan, fo komododoon ia dalek.” Hu ndia de, loke mamanak ndia soona lae, Mizpa boe.

⁵⁰Laban nafa'da seluk nae, “Metema, o tao mangalauk neu au anang-ngala, do o sao ina fe'ek, leomae ta hapu hataholi bubuluk fa, tehu mafandendelek te, Manetualain nanea besa-besa no ita.

⁵¹Au aunu basa batu-la nde ia, ma batu nasanene'dak-ka nde ia.

⁵²Nau batu nananaunuk ia, do batu nasanene'dak ndia, fe nasanene'dak neu ita, nae au ta bole la'o seli batu nananaunuk ia, ma batu nasanene'dak ia, fo au sapu-a o, ma o boeo, ta bole la'o seli batu nananaunuk ia, ma batu nasanene'dak ia, fo o sapu-ma au.

⁵³Manetualain fo Abraham sene-do'ok-ka, ma au amang Nahor sene-do'ok-ka, neukose ana da'di manamaketu-mala'dik neu ita.” Boema Yakob soo nenik Manetualain, fo aman Isak sene-do'ok-ka na'den-na, fo ana tao natetu hehelu-balataan.

⁵⁴Ana do'do bana esa, de ana tunu-hotun nai pupukuk ndia lain. Boema ana ka'i basa hataholin-nala, fo la'a sama-sama. La'a basa boema, ala sungu leme pupukuk ndia lain.

⁵⁵Balahaa fafaianak boema, Laban de'i upu-anan, da'di leo dedei nasi'da-naba'ek, boema ana fes baba'e-papalak, de ana fali leo nusan-na neu.