Read Termanu KEJADIAN 32 Bible Online

KEJADIAN 32 - Termanu bible

KEJADIAN 32

¹Yakob la'ok nakandoo leleo-lala'on. Boema ata nusa so'dak de'ubee, ala mai latongo loon.

²Lelek Yakob nitas boema, nafa'da nae, “Manetualain lalaa teman ia,” hu ndia de, ana foi mamanak ndia na'de Mahanaim.

³Basa ndia boema, Yakob nadenu hataholin de'ubee lakahuluk leo nusa Edom-ma leu, fo latongo loo ka'an Esau.

⁴Yakob nafa'das nae, “Mafa'da au ka'ang Esau mae leoia, ‘Au Yakob, fo o atam-ma. Dodoo basa ia, au leo o Laban so.

⁵Besak ia, au anuu sapi, keledei, bi'ilopo, bi'ihiik ma ata. Au haitua halak leo au tuang-nga neu, no namahehenak, neukose au tuang-nga namahoko.’ ”

⁶Lelek hataholi nadedenuk-kala falima'i seluk-kasa leo Yakob mai boema, lafa'da lae, “Ami meu leo Tuan ka'an Esau meu so, de ana nau natongon-no Tuan. Ana mai so, tehu bei nai eno tala'dak. Ana mai no hataholi natun haa.”

⁷Yakob namanene dede'ak ndia boema, ana bii nanseli, ma dalen-na ta tesa-tama fa. Boema ana ba'e hataholi fo sama-sama loon-nana, neu bubuak dua, leondiak boe, bi'ilopon-nala, bi'ihiin-nala, sapin-nala ma ontan-nala.

⁸Ana dodoo nae, “Metema Esau mai, fo ana sapun-na bubua makasososak-ka, soona fafa'kama bubua ka dua hapu loak lalai.”

⁹Basa boema, Yakob hule-haladoi nae, “Ou MANETUALAIN, fo au ba'ing Abraham ma au amang Isak sene-do'ok-ka, mamanene au leona! Amak-ka nadenu basa au, fo au fali ma'ing-nga leo au nusang-nga mai, ma au tolanoo ka'a-fa'ding-ngala mai so. Ma Amak-ka helu, nae neukose Amak-ka ito-ato basa hata lala'en-na no malole, soaneu au.

¹⁰Au ta andaa sipo basa susue-lalaik, ma lilinekak lala'en fo Amak-ka natu'du basan neu au so. Lelek au la'o, de au lena Lee Yarden-na, au ta ini hata esa boen, te ka'da aitete'ek-ka mesak-kana. Besak ia, au falima'ing-nga o hataholi bubua ka duak ia-la.

¹¹Au dokodoe anseli, soi-mala au, eme au ka'ang Esau mai. Au bii, boso nalosak ana mai sapun-na ami, fo ana tao namopo-namate ami basa-basam-mala, inak-kala ma ni'iana-la boe.

¹²Mafandendelek te, MANETUALAIN helu basa, nae neukose Amak-ka ito-ato basa hata lala'en-na no malole soaneu au, ma Amak-ka fe au tititi-nonosik makadotok. Ta hapu hataholi esa boen, hapu leke-nala fan, nanahu dede'un-na sama leo solokaek manai tasi su'un-na.”

¹³Yakob sungu neme ndia, boema ana foo-na bana-manun-nala seli, de ana palsen-nasa leo Esau neu. Palsen sila-la nalupa leo: bi'ihii ina natun dua, bi'ihii mane duahulu, bi'ilopo ina natun dua, bi'ilopo mane duahulu, onta bei manasu'uk, sama-sama no anan-nala teluhulu, sapi ina haahulu, sapi mane sanahulu, keledei ina duahulu, ma keledei mane sanahulu.

¹⁶Ana ba'e bana sila-la, neu bubuak de'ubee, de ana fes leo atan-nala neu, de esan-na, bubuak esa. Nafa'das nae, “Emi la'ok makahuluk, ma manea, fo daenga boso la'ok makabubua.”

¹⁷Yakob paleta atan makasososak-ka nae, “Metema au ka'ang Esau natongon-no o, fo natane nae, ‘O tuam-ma nde see? O sanga leo bee muu? O foo bana ia-la, lamatuan-na nde see?’

¹⁸Soona mataa mae, ‘O atam, Yakob bana-manun ia-la. Ana haitua bana-manu ia-la da'dileo fee feek esa neu ndia tuan Esau. O atam Yakob bei nai dea.’ ”

¹⁹Ana fe paleta matak esa neu atan ka dua, ka telu, ma neu basa hataholi fo, mana ito-ato bana-manun sila-la. Nana Yakob dodoo, nae ana hapu kokoe-na Esau, nenik fee feek sila-la, fo ela metema natongon-no Esau soona, ana nau fe do'o do ampon neun.

²¹Da'di, ana haitua nakahuluk fee feek sila-la, te le'odaek ia, ana bei sungu nai uma ofu.

²²Yakob fo'a nai le'odaek ndia boe, boema no sao ka dua-nala ma sao ka telu ma ka haan-na boema ana ka sanahuluesan-nala, de ala lena Lee Yabok-ka.

²³Nakalelenak basas boema, ana fali, de nakalelenak basa hata-heton lala'en-na leo selik neu.

²⁴Tehu elan mesak-kana neme ndia. Boema touk esa mai, de naho'uk no Yakob, losa lolebalahaak.

²⁵Lelek hataholi ndia name'da, nae neukose ndia kala nai naho'uk ndia dalek boema, ana fepan neu Yakob kale'bon-na, de nalosa kosikheni dui kale'bon-na.

²⁶Boema, hataholi ndia nae, “Po'i au; te ba'ihanak seluk faa bai te, le'do-a tii.” Yakob nataa nae, “Neukose au ta po'i Tuan fa, ta'da fe'e, metema Tuan ba'e-pala au.”

²⁷Hataholi ndia, natane nae, “O na'de see?” Boema Yakob nataa nae, “Au na'de Yakob.”

²⁸Hataholi ndia, nataa nae, “O na'dem-ma, ta na'de Yakob so'on. Nana o maho'uk basa moo Manetualain ma moo hataholi daebafak-ka, de o sengi so; hu ndia de, o na'de Israel.”

²⁹Boema Yakob nae, “Tuan mafa'da na'dem-ma dei.” Tehu hataholi ndia nataa nae, “Ta paluu o matane, au na'de see fa!” Boema, Ana ba'e-pala Yakob.

³⁰Basa boema, Yakob nae, “Au atongo o Manetualain, matak no matak so, te au bei aso'da.” Hu ndia de, ana foi mamanak ndia na'de, Pniel.

³¹Lelek le'do-a tenak, boema Yakob la'oela Pniel, tehu ana da'di eihelak, nanahu kosik heni duik manai kale'bon-na.

³²Losa besak ia boe, Israel tititi-nonosin ta la'a paa kale'bok fa, nanahu Yakob hapu fefepak neu kale'bon-na.