Read Termanu KEJADIAN 34 Bible Online

KEJADIAN 34 - Termanu bible

KEJADIAN 34

¹Nai faik esa boema Dina fo Yakob no Lea anan-na, donge-dama ina Kanaan de'ubee.

²Lelek Sikhem fo Hewi hataholi Hewi anan-na, fo ana da'di manek nai nusak ndia, nita Dina boema, nalai no anafe'oanak ndia, de ana sungu non.

³Tehu nahiik nanseli no Dina, nalosa susue ina anafe'on-na tu'da neun, de ana sanga enok, fo ela anafe'oanak ndia susue tou ta'en-na tu'da neu ndia boe.

⁴Sikhem nafa'da aman nae, “Au dokodoe, fo Ama sanga enok soaneu fe anafe'oanak ndia neu au. Au hii ana da'di au saong.”

⁵Yakob namanene lae nalutu anafe'on-na na'de anafe'oanan-na so, tehu hu kande anan-nala bei lanea bana-manun nai mook-ka, ma ala beita fali ma'is fa de, ana ta hapu ho'i nakeketuk hata esa boen.

⁶Hemor, fo Sikhem aman, neu leo Yakob neu, fo ana sanga kokolak non.

⁷Nandaa no faik ndia, Yakob anan-nala fali ma'is leme mook-ka mai. Lamanene manada'dik ndia boema, ala nggenge ma lamanasa lanseli. Nana no tou maho'u inak-ka ho'u Yakob anan ndia, de Sikhem nakamumulu-nakamamaek basa hataholi Israel-la.

⁸Hemor nafa'da Yakob nae, “Au anang Sikhem susue ina anafe'on-na tu'da neu Tolanook-ka anan-na; au dokodoe fo ela Tolanok-ka fe au anang-nga loak sao nan.

⁹Mai fo ata tao nakeketuk, tae Tolanook-ka leoinan-na ma ami leoinam-ma bole sao sese'do-babalik.

¹⁰Soona Tolano-tolanook-kala bole leo sama-sama moo ami nai nusak ia; tolanook-ka hii leo su'di nai bee boe. Tolano-tolanook-kala bole leo mahele su'di nai bee nai nusak ia dalek, ma bole manuu hata-heto.”

¹¹Basa boema, Sikhem nafa'da Dina aman, ma ka'an-nala nae, “Metema emi sipok au nonoken ia, soona leomae emi mahiik su'di beek ndia boe, neukose au fe.

¹²Mafa'da palsen beek kande emi mahiik-kana, ma maketu memak belipaas. Emi moke su'di beek ndia boe, neukose au fe, sa'di emi nau, au sao anafe'oanak ndia.”

¹³Nanahu Sikhem tao nanggenggeo basa sila fa'din Dina na'den-na boema, Yakob anan-nala lasapepeko-lasandandali neu Sikhem ma aman Hemor.

¹⁴Ala lafa'da hataholi ka duak sila-la lae, “Ami ta nau ami fa'dim-ma sao hataholi fo ta nanasunat fa.

¹⁵Ami nau sipok o nonokem ndia, ka'da nenik nonokek esa, fo nde: Emi muse da'di sama leo ami, fo sosoan-na nae, basa touk manai emi dalek-kala muse nanasunat.

¹⁶Basa ndia soona, neukose ami sipok o nonokem la'eneu sasao sese'do-babalik ndia. Neukose ami leo mahele nai emi tala'da heom, ma ami da'di leoina esa moo emi.

¹⁷Tehu metema emi ta nau sipok ami nonokem-mala, ma ta nau nanasunat fa soona, neukose ami ho'i-ma falik ami fetom-ma fo ami la'o.”

¹⁸Hemor ma Sikhem lame'da nana, nonokek sila-la landaa,

¹⁹de no lai-laik Sikhem sadia tao natetu nonokek sila, nanahu ana sue Dina. Nai basa teidale-bobongin lala'en-na dalek, Sikhem nde nananita-nalelak nanseli-a.

²⁰Basa boema, Hemor ma Sikhem leu leo mamana natotongok-ka nai kota lelesuinan-na, de ala kokolak loo laun manai sila kotan-na, lae leoia,

²¹“Hataholi Israel sila-la, ita tia-lain. Da'di, nemen-na fo ala leo sama-sama loo ita nai nusak ia, boema po'ilotak-kasa leu leo su'di bee leu fo lahiik-kana. Nusak ia loan-na dai, ba'eneu sila boe. Ita bisa sao sila anafe'oanan-nala, ma sila boeo bisa sao ita anafe'oanan-nala.

²²Tehu hataholi sila-la ka'da nau leo sama-sama loo ita, ma da'di leoina esa loo ita, no nonokek esa, fo nde: basa touk manai ita dalek-kala muse nanasunat sama leo sila.

²³Mahani te, basa sila bana-manun, ma hata-heton-nala lala'en-na da'di ita nuun. Da'di mai fo ata sipok sila nonoken-na, fo ela ala leo sama-sama loo ita.”

²⁴Basa laun kota fo manalakabubua lai ndia, sipok Hemor ma Sikhem nonoken ndia, boema basa tou touinak manai kota ndia nanasunat.

²⁵Basa faik telu, fo nai lelek touk sila-la bei lame'da he'dis nanahu sunat-ta boema, Dinak-ka'an fo mana'de Simeon ma Lewi ho'i-la sila tafainan-nala, de no denge-dengek, ala masok leo kota dale leu. Basa boema, ala taolisa basa touk manai sila-la,

²⁶de Hemor ma Sikhem lai dalek boe. Boema ala leu ho'i-la Dina neme Sikhem uman mai, de ala la'o.

²⁷Basa nado'do-napauk ndia boema, Yakob ana fe'en-nala, leu kae kota ndia, da'dineu ala balas sila nape'da dalen-nala nanahu ala tao langgenggeo sila fa'din-na na'den-na.

²⁸Ala foo leni bi'ihiik bi'ilopo bubuak-kala, sapi, keledei, ma basa hata fo manai kota dale, ma manai mook-ka lala'en-na.

²⁹Ala ho'i-la basa bua kabelik-kala, foo leni basa inak-kala ma ni'iana la, ma loso leni uma-uma manai kota ndia oe-isin lala'en-na.

³⁰Yakob nafa'da Simeon ma Lewi nae, “Emi tao susa au. Besak ia, hataholi Kanaan-nala ma hataholi Feris-sala, ma basa nusak ia laun-nala, neukose lakamuu-lakadau au. Ita hataholin-nala ta ba'uk-ka fa; de metema basa laun-na teik esa-dalek esa, fo ala la'ban ma sapu-la au soona, basa ita teidalen-nala lala'en-na, neukose nanatao namate-namopok.”

³¹Tehu lataa lae, “Ami ta nau po'ilotak ami fa'dim-ma nanataok da'dileo manasosoa-piaok fa.”