Read Termanu KEJADIAN 37 Bible Online

KEJADIAN 37 - Termanu bible

KEJADIAN 37

¹Yakob leo nahele nai nusa Kanaan, fo aman mamana leleon-na,

²ma Yakob teidale-bobongin tutuin-na nde ia: Nai lelek Yusuf, fo Yakob anan-na teun sanahulu hitu boema, ana mete-nakanae bi'ihii bi'ilopo bubuan-na la sama-sama no ka'an-nala, fo nde Bilha ma Zilpa fo aman sao makahatun duas anan-nala. Ana nafa'da aman, tatao-nono'i mangalauk fo ka'an-nala tao-no'in.

³Yakob sue Yusuf lena neme ana fe'e-fe'en-nala mai, nanahu bongi Yusuf nai lelek aman namalasi so. Faik esa boema, ana tao fe Yusuf ba'du manalu esa mana'ahiik nanseli.

⁴Lelek Yusuf ka'an-nala bubuluk lae sila aman sue Yusuf lena neme sila mai boema, lakamuu-lakadau Yusuf, nalosa ala ta nau kokolak loo fan.

⁵Nai le'odaek esa boema, Yusuf nalame'i, de lelek ana tui me'in ndia neu ka'an-nala boema, ala boetai lakamuu-lakadaun.

⁶Yusuf nafa'das dede'a ka nde ia nae, “So'ba mamanene!

⁷Au alame'i ita basa-basa tala bei puputu gandum nai tina, boema au gandum ma napadeik natetu. Emi gandum puputum-mala okofefeo la au gandum puputung-nga boema ala senek neun.”

⁸Ka'an-nala ka'in lae, “O maedaenga neukose o da'di manek fo o koasa ami do?” Boema ala boetai lakamuu-lakadaun, nanahu me'i nala ma nanahu hata fo nafa'dan.

⁹Basa boema Yusuf nalame'i seluk, de ana tuin neu ka'an-nala nae, “Au alame'i seluk de au ita le'do a, bula ka ma nduuk sanahulu esa senek neu au.”

¹⁰Ana tui me'is ndia neu aman boe, de aman ka'in nae, “Me'i leo beek ndia? Nai o dodoo ma, neukose au, o inam ma o ka'am-mala mai fo sene-do'ok neu o do?”

¹¹Yusuf ka'an-nala lape'da dalek neun, tehu aman dodoo nahele me'is ndia.

¹²Nai faik esa fo lelek Yusuf ka'an-nala leu leo Sikhem soaneu foo sila aman bi'ihii bi'ilopo bubuan-na la boema,

¹³Yakob nafa'da Yusuf nae, “Muu leo Sikhem muu, leo mamanak fo o ka'am-mala foo ita bi'ihii bi'ilopo bubuan-na la.” Boema Yusuf nataa nae, “Hei, Ama.”

¹⁴Aman nae, “Mete o ka'am-mala ma bi'ihii bi'ilopo bubua kala so'dan-nala tao leo beek, soona falima'i ma fo mafa'da au.” Boema ana po'i Yusuf la'oela Bafak Hebron na. Basa boema Yusuf losa Sikhem.

¹⁵Lelek ana bei la'ok neu-mai nai mook ka te, natongon-no touk esa natanen nae, “O sanga beek?”

¹⁶Yusuf nataa nae, “Au ka'ang-ngala. Ala foo bi'ihii bi'ilopo. Ama bubuluk-kasa lai bee boe do?”

¹⁷Hataholi ndia nae, “Ala la'o leme ia mai so. Au amanenes lafa'da lae ala sanga leu leo Dotan leu.” Boema Yusuf neu tunga ka'an-nala de ana hapus lai Dotan.

¹⁸Yusuf bei dook-ka te litan so, de ana beita losa matan-nala fa te, ala lalahalak soaneu taolisan.

¹⁹Esa nafa'da esa nae, “Mitak, tou tuka malame'ik ndia mai.

²⁰Ayo, ata taotisan fo tapa popolan-na leo oedolu ma'dak dale neu. Basa soona tafa'da tae bana makaak esa kaa nalan. Ata meten, neukse tao leo beek fo me'in sila-la ala da'di.”

²¹Ruben namanene sila dale tutu'un ndia, boema ana sanga enok soaneu soi-tefa na Yusuf. Ruben nae, “Boso taomisan.”

²²“Ka'da ata tu'un leo oedolu manai moo maloa ia dalek neu, tehu ata boso fepan do tao tahinan.” Nafa'da dedeak ndia, nanahu ana tutu'u nae ana soi-tefa na Yusuf fo nadenun fali ne'un leo uma neu.

²³Lelek Yusuf losa ka'an-nala boema, no balakaik ala o'duheni Yusuf ba'du manalun fo mana'ahiik nanseli ndia.

²⁴Boema ala loso lenin de ala tapan leo oedolu ma'dak dale neu.

²⁵Lelek ala bei la'a-linu te, no kaiboik lita hataholi Ismael bubuak esa sa'e onta bei lai leleo-lala'on-na la dalek leme Gilead leo Masir leu. Sila onta nala fua bumbu-bumbu, balsam ma luu-luu.

²⁶Boema Yehuda nafa'da tolanoon-nala nae, “Sosoak hata ita taotisa ita fa'di na ma ita tafuni kanisak ndia?

²⁷Mai fo ata tase'on leo hataholi Ismael sila-la neu. Ta paluu ita fen name'da he'dis fa. Tao leo beek boeo, ita fa'din ndia.” Tolanon-nala lakaheik,

²⁸de lelek manadangan Midian de'ubee la'ok tunga ndia boema, Yusuf ka'an-nala kaluahenin neme oedolu ndia dalek mai, boema lase'on leo hataholi Ismael ndia neu nenik doifulak duahulu. Basa boema manadangan sila-la loon leo Masir neu.

²⁹Lelek Ruben fali leo oedolu ndia neu te, ta nita Yusuf nai ndia so'on boema, ana sii sii-lulu'i bua-lo'an nanahu dalen-na he'di sa.

³⁰Ana fali leo tolanoon-nala neu de nae, “Ni'iana ndia taa kana ndia so! Hata fo au muse taon besak ia?”

³¹Boema ala do'do bi'ihiik esa de ala dope Yusuf ba'du manalun-na leo bi'ihiik ndia daan dale neu.

³²Basa boema ala ladenu leni ba'du manalu ndia leo sila aman neu no hala heheluk-ka nde ia nae, “Ami hele ma ba'du manalu ia. Ade ama anan-na nuun ia do?”

³³Yakob nalelak ba'du manalu ndia, boema nae, “Tete'ek-ka, au anang-nga ba'du manalun ia! Tao leo bee o bana makaak esa, kaa nalan so. Awii, bana ndia sii sii-lulu'enisa au anang Yusuf so!”

³⁴Yakob siiba'e bua-lo'an nanahu dalen-na he'di sa ma ana pake bua-lo'a manafaluk. Ana kii-makaleleu anan ndia fai-faik.

³⁵Basa anan-nala, nau touk do inak boe, ala mai kokoe-nanasin, tehu ana ta nau kokoe-nanasi fan. Nae, “Neukose au kii-makaleleu ahele au anang-nga losa au mate.” Leondiak ana falu nahele nanahu anan Yusuf.

³⁶Ndia te nai Masir, hataholi Midian nala lase'oheni Yusuf leo Potifar, fo manek-ka malanga solda'du matuainan esa ana da'di malangan neu manamanea uma manek-ka.