Read Termanu KEJADIAN 4 Bible Online

KEJADIAN 4 - Termanu bible

KEJADIAN 4

¹Basa boema, Adam sungu no Hawa fo saoinan-na, de inak ndia nailu. Ana bongin-na ni'iana touanak esa, boema nafa'da nae, “No MANETUALAIN tutulu-fafalin, de au hapu ni'iana touanak esa so.” Boema, ana foi ni'iana ndia na'de Kaen.

²Boema Hawa bongin-na, ni'iana touanak esa seluk, na'de Habel. Habel da'di manafoo bi'ilopo, tehu Kaen da'di hataholi manatao tina-osi.

³Faik de'u bee makabuin-na boema, Kaen ho'i-na tina-osin buna-boan seli, de ana tunu-hotu fen neu MANETUALAIN.

⁴Habel boeo, ho'un-na bi'ilopon esa ana ulun-na, de ana do'don, boema ana ho'i-na paa neulauk-kala, de ana tunu-hotu fen neu MANETUALAIN. Boema MANETUALAIN namahoko nanseli neu Habel no tutunu-hohotun,

⁵tehu Ana ta sipok Kaen no tutunu-hohotun fa. Kaen namanasa nanseli, de mata panan makei.

⁶Boema MANETUALAIN nafa'da Kaen nae, “Tao le'e de, o mamanasa? Tao le'e de, o mata-panam makei?

⁷Metema, o tao malole soona, tao leo bee-o, o hika-hume; tehu metema, o tao tatao-nono'imangalauk, soona sala-singok nahani, fo ana masok leo o dalem dale neu. Sala-singok sanga koasan-na o aoinam-ma, tehu o muse sengin.”

⁸Boema Kaen nafa'da fa'din Habel nae, “Mai fo, ata teu leo tina teu.” Lelek ala losa tina boema, Kaen sapun-na fa'din Habel, de ana taonisan.

⁹MANETUALAIN natane Kaen nae, “O fa'dim Habel nai bee?” Kaen nataa nae, “Au ta bubuluk fa. Au muse anea au fa'ding-nga do?”

¹⁰Boema, MANETUALAIN nae, “Tao le'e de, o tao tatao-nono'ik fo maneni bibii-namata'uk ndia? O fa'dim-ma, daan-na naloo bou-bou neu Au, neme dae lain mai, sama leo halak esa noke balas.

¹¹O nanasoo-supak, de nalosa o ta bisa foi-fala seluk dae-a so'on. Dae ndia, musi-na o fa'dim-ma daan-na, nono'kabai, napook bafan-na, fo ana ko'do-na, o fa'dim-ma daan ndia, nai lelek o taomisan-nana.

¹²Metema o tao tina-osi soona, neukose dae-a ta fe buna-boak hata esa boen; neukose o da'di maleu-malaak, fo ta nanuu mamana leleok nai daebafak-ka fa.”

¹³Boema, Kaen nafa'da MANETUALAIN nae, “Huhukuk ndia, bela-na seli, de au ta hapu lu'a-lepa abe'i fan.

¹⁴O usi heni au eme dae ia mai, de au dook-ka neme O matam-ma mai. Neukose, au da'di maleu-malaak, fo au ta anuu mamana leleok nai daebafak-ka fa, de su'di see natongon-no au soona, ana taonisa au.”

¹⁵Tehu MANETUALAIN nae, “Ta. Metema, hataholi taonisa o soona, hataholi manataonisa o ndia, ana hapu babalak diku la'i hitu.” Basa boema, MANETUALAIN tao ta'du-tana neu Kaen, fo ela su'di see natongon-no n soona, boso taonisan.

¹⁶Boema Kaen la'o neme MANETUALAIN matan-na mai, de ana leo nai dae fo mana'de “Maleu-malaak” nai Eden boboan dulu.

¹⁷Kaen no saoinan-na bongi anatouk esa, de ala foin na'de Hanok. Basa boema, Kaen napadedeik na kota esa, de ana foi kota ndia na'den-na, tunga anan ndia na'den-na.

¹⁸Irad aman nde Hanok. Mehuyael aman nde Irad. Metusael aman nde Mehuyael, ma Lamek aman nde Metusael.

¹⁹Lamek saoinan dua, fo nde Ada ma Zila.

²⁰Ada bongi Yabal, de Yabal tititi-nonosin-nala nde leoina fo, manamaka boboi bana-manu, ma ala leo nai lalaa temak-kala dalek.

²¹Fa'din-na na'de Yubal, de Yubal tititi-nonosin-nala nde been-na, manamakaminak sasanu ma kinuk.

²²Zila bongi Tubal-Kaen, de tititi-nonosin-nala tao taka-besi mata-matak lala'en-na, neme liti ma besi. Tubal-Kaen fa'di inaanan-na, na'de Naama.

²³Lamek nafa'da saoinan duas nae, “Ada ma Zila, mamanene dei! Au taoisa touana muli-soluk esa, nanahu ana tao nakahina au so.

²⁴Nana, metema hataholi manataonisa Kaen-na, muse ana hapu babalan-na diku la'i hitu, soona hataholi manataonisa Lamek-ka, muse ana hapu babalan-na diku la'i hituhulu hitu.”

²⁵Adam no saoinan-na, bongi anatouk esa seluk. Boema Hawa nae, “Manetualain fe basa au, ana touk nggati Habel, fo Kaen taonisan so.” Hu ndia de, Hawa foi ni'iana ndia na'de Set.

²⁶Set bongin-na anatouk esa, de ana foin na'de Enos. Nai tepo-lelek ndia, nde hataholi-a mulai seseik MANETUALAIN na'den-na, metema ala sene-do'ok neu Manetualain.