Read Termanu KEJADIAN 41 Bible Online

KEJADIAN 41 - Termanu bible

KEJADIAN 41

¹Basa teuk dua boema, manek Masir-ra nalame'i, nae ndia napadeik nai Lee Nil la su'un-na.

²No kaiboboianak sapi maao hitu loun-nala mangadilak, kalua leme lee ndia dalek mai, boema la'a na'u nai lee ndia su'un-na.

³Basa boema sapi fe'ek hitu to'da mai boe; bana sila-la mangalo'dok ma ela ka'da louk palu duik. Sapi mangalo'dok sila-la lapadeik lai sapi maao la boboan-na, nai lee ndia su'un-na.

⁴Basa boema sapi mangalo'dok kala la'aheni sapi maao la. Basa ndia boema, manek-ka fo'a neme susungun-na mai.

⁵Basa boema ana sungu de nalame'i seluk. Nai me'i na dalek, ana nita gandum maisik pulek hitu latu-latuk mesan moli lai gandum huuk esa.

⁶Basa boema gandum fe'ek pulek hitu moli boe, nalak mesa-mesan ma lamatuu nanahu anin moo maloa.

⁷Boema gandum nalak sila-la ko'do heni na'kasa gandum maisi pule ka hitu kala. Basa ndia boema, manek-ka fo'a de, name'da nae ana nalame'i so.

⁸Fafaik boema, manek-ka dalen-na ta tesa-tama fa, hu ndia de nadenu leu laloo basa manasiula-tongono kala ma hataholi malelaina manai Masir-ra. Boema ana tui mei na neus, tehu ta hapu hataholi esa boen hapu nafa'da mangalele'do sosoa-ndandaan fa.

⁹Basa boema manaito-ato nininuk-ka nafa'da manek-ka nae, “Faik ia, ata ma muse manaku ata ma sala na.

¹⁰Makahulun-na Ama Manek namanasa manaito-ato loti a ma neu ata ma, boema ami nanataok leo bui dale neu, fo nai malanga manamanea uma manek-ka uman.

¹¹Nai le'odaek esa boema, ami dua malame'i, de ami me'im ndia sosoa-ndandaan ta sama fa.

¹²Touanak Ibrani esa no ami nai ndia. Hataholi ndia, uma manek-ka manamanean-nala malanga malalau-maoonon ndia Ami tuin ami me'i ma, boema nafa'da mangalele'do me'is ndia sosoa-ndandaan.

¹³Tete'ek-ka basa-basan da'di sama leo hala nafafa'da na, fo nde: Ama Manek fe falik ata ma leo ue-le'di makasososan-na neu, tehu hukunisa manaito-ato loti ndia.”

¹⁴Boema manek-ka nadenu leu lala Yusuf, de no lai-laik nanakaluak neme bui a mai. Yusuf nggeu basa nggolomei na ma nggatiheni bua papaken-na boema, neu nataa manek-ka.

¹⁵Manek-ka nafa'dan nae, “Au alame'i so, de ta hapu hataholi esa boen hapu nafa'da mangalele'do sosoa-ndandaan fa. Hapu hataholi neni halak nae o hapu mafa'da mangalele'do mala me'is.”

¹⁶Yusuf nataa nae, “Au ta, Tuan, te Manetualain nde neukose nafa'da mangalele'do la'e nana.”

¹⁷Boema manek-ka nae, “Au alame'i me'i sa nae au bei apadeik nai Lee Nil la su'un-na.

¹⁸Boema sapi maao hitu loun-nala mangadilak, kalua leme lee ndia dalek mai, boema mulai la'a na'u nai lee ndia su'un-na.

¹⁹Basa boema sapi fe'ek hitu to'da mai, fo magalo'dok mesa-mesan ma ela ka'da louk palu duik. Beita la'iesa fo au ita sapi mangalo'dok leondia ka nai basa Masir lala'en-na fa.

²⁰Sapi mangalo'dok sila-la la'aheni sapi maao ka hituk na'kasa.

²¹Tehu basa ndia boema, sapi mangalo'dok sila-la bei mangalo'dok lahele. Boema au fo'a eme au susungung-nga mai.

²²Basa boema au sungu de au alame'i seluk, nae au ita gandum maisik pulek hitu latu-latuk mesan, ala moli lai gandum huuk esa.

²³Boema gandum pulek hitu moli boe te nala-nalak mesan ma lamatuu nanahu anin moo maloa.

²⁴Gandum nalak sila-la ko'do heni gandum maisik na'kasa. Au tui basa au me'ing ka duang sila-la neu basa manasiula-tongono kala, tehu ta hapu hataholi esa boen hapu nafa'da mangalele'do sosoa-ndandaan fa.”

²⁵Boema Yusuf nafa'da manek-ka nae, “Me'i ka duak sila-la, sosoa-ndandaan matak esa; Manetualain nafa'da basa Tuan, hata fo neukose Ana taon so.

²⁶Sapi maao ka hituk sila-la nde teuk ka hituk-ka, ma gandum pule ka hituk sila-la nde teuk ka hituk-ka boe; duas sosoa-ndandaan matak esa.

²⁷Sapi mangalo'do ka hituk fo makabuin-na ala to'da mai, boema gandum ka hituk nalak ma lamatuu nanahu ani moo maloa ndia, nde tepo lelek la'andoes teuk ka hituk-ka dalen-na.

²⁸Sama leo hata fo ata ma nafa'da basan neu Tuan ae, Manetualain nafa'da basan neu Tuan, hata fo neukose Ana taon.

²⁹Mahani te, neukose teuk hitu mai fo henuk no su'i-betes sa nai basa nusa Masir-ra lala'en-na.

³⁰Basa ndia soona, neukose teuk ka hituk-ka mai fo teuk la'andoes ndia, de tepo lelek fo henuk no su'i-betes ndia, neukose ta nananafandendelek makandondook so'on, nanahu tepo lelek la'andoes ndia neukose ba'un-na seli, nalosa nusak ia da'di dae tokotiik.

³¹

³²Au Ama Manek me'i ndia ana da'di la'i dua, de ndia sosoan-na nae dede'ak ndia nana naketu basak neme Manetualain mai so ma nae neukose Manetualain nakalala'o kana no lai-laik.

³³Hu ndia de, malole lenak au Ama Manek hele na hataholi dodole neuk ma manatee tenok esa fo fen koasa soaneu ito-ato nusak ia.

³⁴Boeo au Ama Manek muse so'u hataholi mana'a ngga'di fe'ek-kala, fo fes koasa soaneu leu susu gandum baba'ek esa neme baba'ek liman-nai teuk-ka hituk fo henuk no su'i-betes ia dalen-na, fo pe'da lakabubuas nai kota-kota la boema lanean.

³⁵

³⁶Gandum sila-la, neukose ala da'di nana'a nanasadiak nai teuk-ka hituk fo tepo lelek la'andoes fo neukose ana da'di nai Masir. No enok ndia, neukose laun-na ta mate no la'as sa fa.”

³⁷Manek ma basa hataholi mana'a ngga'din-nala lakaheik tunga Yusuf dale tutu'un ndia.

³⁸Boema manek-ka nafa'das nae, “Tao leo bee o ita ta hapu hataholi fe'ek fo nandaa lena neme Yusuf mai fa, nana Manetualain hela-nolen.”

³⁹Boema manek-ka nafa'da Yusuf nae, “Manetualain nafa'da basa dede'ak ia la neu o so, da'di mangale'dok so nae o dodole neuk ma manatee tenok lena neme su'di see mai boe.

⁴⁰Neukose au so'u o da'di filana, ma basa au laung lala'en-na neukose ala tunga o paleta ma. Ka'da au mesang-nga nde anuu koasa lena neme o mai.”

⁴¹Basa ndia boema, manek-ka o'du na ndeli nanadoki-dulak nenik cap nusak-ka neme lima ku'un-na mai, boema ana o'dun neu Yusuf lima ku'un-na ma nae, “No enok ia, au so'u o da'di filana neu basa Masir lala'en-na.” Basa boema ana o'du ba'du manalu aba lutu esa neu Yusuf, ma ana o'du lilo dook esa neu Yusuf botoliin-na.

⁴²

⁴³Boema ana fe kaleta manek ka dua neu Yusuf soaneu kaleta sasa'e na, de manek-ka manamanea ha'da-holomatan-nala la'ok nai kaleta ndia uluk, boema laloo bou-bou lae, “Masingok! Soi enok! Soi enok!” Yusuf nanandoo eik da'di filana neu Masir lala'en-na leondiak.

⁴⁴Manek-ka nafa'dan nae, “Au nde manek-ka — de au po'a-benga ae, metema o ta fe loak fa soona, hataholi esa boen nai Masir lala'en-na ta bole tao hata-hata fa.”

⁴⁵Boema manek-ka fe na'de Masir esa neu Yusuf, fo nde Zafnat-Paaneah. Ana fen saoinak esa boe, na'de Asnat, Potifera anan-na fo ana da'di imam nai kota Heliopolis. Yusuf teun teluhulu nai lelek ana mulai naue-nale'di soaneu manek Masir-ra. Boema Yusuf la'o neme uma manek-ka mai de ana la'ok okofefeo basa nusak-ka lala'en-na.

⁴⁶

⁴⁷Nai tepo lelek teuk-ka hituk fo henuk no su'i-betes ndia dalek-ka, dae isi-minan sasi kao-kao.

⁴⁸Yusuf nakabubuan-na basa gandum sila-la boema ana pe'dan nai kota-kota la. Nai kota la esa-esak dalek, ana pe'da gandum manai kota ndia boboa-kaisun-nala.

⁴⁹Gandum fo Yusuf tao nakabubuak sila-la, makadotok nanseli, nalosa hataholi-la hahae uuku-dodoun, nanahu dede'un-na sama leo solokaek manai tasi su'un-na.

⁵⁰Tepo lelek la'andoes ndia beita losa fa te, Yusuf saon Asnat ana bongi ana touk dua.

⁵¹Yusuf nae, “Manetualain tao na au afandele heni basa au doi-dosong lala'en-na ma au amang teidale-bobongin so.” Hu ndia de, ana foi ana makasososan-na na'de “Manasye”.

⁵²Yusuf nafa'da seluk nae, Manetualain fe basa au anak nai au toto'a-tataa taang dalek so, “Boema ana foi ana ka duan-na na'de Efraim.”

⁵³Teuk hitu, nusa Masir-ra name'da nita tepo lelek fo henuk no su'i-betes ndia, nate'e.

⁵⁴Boema tepo lelek la'andoes teuk-ka hitu ka mai, nandaa no hata fo Yusuf nafa'da basan so. La'andoes-sa, da'di nai basa daebafak-ka lala'en-na, tehu nai Masir lala'en-na hapu nana'ak ba'uk ka.

⁵⁵Lelek laun Masir-ra mulai doidoso no la'andoes-sa, ala loke manek-ka nana'ak. Boema manek-ka nadenus leu leo Yusuf leu, ma ala tunga basa hata lala'en fo Yusuf paleta neus.

⁵⁶Lelek la'andoes-sa boetai namatua ka, de nafeo basa nai basa nusak-ka lala'en-na, Yusuf soi basa mamana pepe'da nana'ak kala de nase'o gandum neu hataholi Masir ala.

⁵⁷Hataholi la mai leme basa daebafak-ka lala'en-na soaneu asa gandum neme Yusuf mai, nanahu la'andoes matuaina nai mamanak lala'en-na.