Read Termanu KEJADIAN 44 Bible Online

KEJADIAN 44 - Termanu bible

KEJADIAN 44

¹Basa ndia boema, Yusuf paleta malanga uma loon-na nae, “Taom-mahenu hataholi sila la lafa lapik nala nenik gandum, dede'un-na su'di de'ubee fo ala hapun lenin, ma tao falik sila esa-esak doi na leo ndia lafa lapik dale neu, nai gandum maa poin-na.

²Tao au nggalaa nininu lilofulang-nga leo sila fa'dim-mate'a teisu'u ka lafa lapik dale neu, sama-sama no doi baba'e gandum ma.” Malalau-maoono ndia nakalala'ok paleta ndia.

³Balahaa fafaik, fo bei fafaianak nanseli, te Yusuf nasi'da-naba'e no tolanoon-nala, boema ala loo sila keledein-nala la'o leona.

⁴Ala beita lala dook-ka neme kota ndia mai fa te, Yusuf nafa'da manamalanga uma loo na nae, “Lai-lai usi tunga hataholi sila-la. Metema o hapus soona, mafa'das mae, ‘Taole'e de emi balas malole a nenik mangalauk?

⁵Taole'e de emi mamanako meni au Ama Manek nggalaa nininu lilofulan-na? Nggalaas ndia ana paken soaneu ninu ma da'di neu bua siula-tongonok. Emi tao tatao-nono'i mangalauk matuaina so!’ ”

⁶Lelek malau-maoono ndia losa Yusuf tolanoon-nala boema, nafa'da hata fo Yusuf paleta neun.

⁷Ala lataan lae, “Tuan dudu'a na leobeek? Ami soo mae ami ta tao leondiak fa!

⁸Tuan mesak-kana nde bubuluk nae doik fo ami hapus lai ami lafa lapik mala dalek, nai gandum ma poin ndia, ami fe falik-kana leo Tuan neu so. Da'di, masa bole ami mamanako lilofulak do lilopilas neme filana la uman ma!

⁹Tuan, metema hapu buas sila-la lai ami hataholim esa soona, neme na fo hukunisan, ma ami da'di Tuan atan.”

¹⁰Malalau-maoono ndia nafa'da nae, “Hei; tehu hapu nggalaa nininuk ndia nai see soona, neukose ndia nde da'di au atang; fe'ek-kala bole fali.”

¹¹Boema no lai-laik sila esa-esak nakona lafa lapik na de ana se'in.

¹²Yusuf malalau-maoonon ndia, palisak besa-besa no lafa lapik sila-la, mulai neme ka'a uluk-ka lafa lapik na losa mate'a teisu'u ka lafa lapik na, de hapu nggalaa nininuk ndia nai Benyamin lafa lapik dale.

¹³Ka'an-nala susa lanseli, nalosa ala sisii-lulu'i bua papaken-nala. Ala fufua keledeim-nala de ala fali leo kota leu.

¹⁴Lelek Yehuda ma tolanoon-nala losa Yusuf uman te, Yusuf bei nai ndia, de ala senek neu matan-na.

¹⁵Boema Yusuf nafa'da nae, “Emi tao hata ndia? Emi ta bubuluk fa te, hataholi fo sama leo au ia, hapu bubuluk emi tatao-nono'i mangalau ma nenik siula-tongonok?”

¹⁶Yehuda nataa nae, “Ami bei kokolak mae leo bee bai Tuan? Tao leo bee fo ami hapu mase'i ma mafa'da mae ami ndoos? Manetualain natu'du basa ami sala ma so. Besak ia ami basa-basam-mala da'di Tuan atan, ta ka'da ndia fa te, neu see fo hapu nggalaa nininuk ndia.”

¹⁷Yusuf nae, “Ta, au ta nau tao leondiak fa! Ka'da see ndia fo hapu nggalaa nininuk ndia, neukose ana da'di au atang. Fe'ek kala bole fali no so'dak leo emi amam meu.”

¹⁸Boema Yehuda tutulumatak fo ana deka no Yusuf de nafadan nae, “Ampon, Tuan, fe ata ma loak kokolak seluk o Tuan. Boso mamanasa ata ma; nana Tuan nde been-na sama no manek Masir-ra.

¹⁹Tuan natane basa neu ami ia so nae, ‘Ade emi bei maamak do tolano fe'ek do?’

²⁰Ami mataa mae, ‘Ami amam namalasi so, de bongi ami fa'dim-ma nai lelek ama namalasi so. Ami ka'am fo ina esa no ami fa'dim ndia, maten so, da'di besak ia, neme sila dua mai a, ela ka'da ndia mesak-kana bei naso'da, de ama sue nan ba'un-na seli.’

²¹Tuan nadenu ami moon leo ia mai, fo ela Tuan hapu nita matan-na,

²²boema ami mataa mae ni'iana ndia ta hapu nasi'da neme aman mai fa; metema nasi'da neme aman mai soona, neukose mate ama.

²³Basa boema Tuan nae, ‘Emi ta bole mai mataa seluk au, metema emi ta moo emi fa'dim ndia mai fa.’

²⁴Lelek ami falime'u ma leo ami amam meu boema, ami manduku-malosak Tuan hala-kokolan ndia neu ama.

²⁵Basa boema ami amam nadenu ami seluk leo ia mai fo asa nana'ak.

²⁶Tehu ami mataa mae, ‘Ami ta bisa meu leo naa meu fa, nana ami ta bole meu mataa filana la fa, metema ami fa'dim mate'a teisu'u ka ta tunga fa. Ka'da ami hapu meu leo naa meu, metema ndia neu boe.’

²⁷Basa boema ami amam nae, ‘Emi bubuluk mae au saong Rahel anan ka'da dua.

²⁸Fo makasososak-ka ana la'oela au so. Tao leo bee o bana makaak-kala kaa lan so, nanahu losa besak ia au ta itan so'on.

²⁹Metema emi ho'i ma ni'iana mate'a teisu'uk ia neme au mai, fo hata da'din soona, dale he'dik fo emi fen neu au ndia, neukose neni mamates fe au, nanahu au ia amalasi so.’ ”

³⁰Yehuda nafa'da Yusuf nae, “Hu ndia Tuan, metema ata ma fali leo ami amam meu te ami ta moo ami fa'dim ndia fa soona, tao leo bee o neukose mate ami amam. So'dan-na namahena neu ka'da ni'iana ndia, ma namalasin-nanseli so, de nalosa dale he'dik fo ami meni fen ndia, neukose neni mamates fen.

³²Nakalenak bai, ata ma helu basa neu ata ma amam ae ata ma da'di bua pepe'dak esa neu ni'iana ndia. Ata ma nafa'dan nae metema ata ma ta no ni'iana ndia fali leo ndia neu fa soona, neukose ata ma nde lu'a-lepa huhukuk losa mate.

³³Da'di, ata ma dokodoe, Tuan, fe ata ma loak leo nai ia fo da'di Tuan atan nggati ami fa'dim ia; neme na fo ana fali sama-sama no ka'an-nala.

³⁴Tao leo beek fo ata ma fali leo ami amam meu, metema ni'iana ndia ta tunga fa? Ata ma ta nakatatakak mete soe fo neukose ana tuni na ami amam ndia.”