Read Termanu KEJADIAN 45 Bible Online

KEJADIAN 45 - Termanu bible

KEJADIAN 45

¹Yusuf ta nakatatakak-nala dalen-na so'on nai hataholi mana'a ngga'din-nala matan fa. Hu ndia de nadenus, fo ala la'oela mamanak ndia, fo ela ana hapu nafa'da tolanoon-nala tunga ndoon-na, see ndia.

²Lelek basa hataholi mana'a ngga'din-nala la'oela mamanak ndia boema, Yusuf dola-dola mesan, nalosa hataholi Masir manai deak-kala lamanenen, de halak ndia losa uma manek-ka.

³Yusuf nafa'da tolanoon-nala nae, “Au ia, Yusuf. Ama bei maso'dak do?” Tolanoon-nala lita ndia boema, ala bii lanseli, nalosa ala ta hapu lataa fa.

⁴Boema Yusuf nafa'das nae, “Mai leo ia mai.” Leu deka loon boema, nafa'da seluk nae, Au Yusuf, emi tolanoom fo emi mase'ohenin leo Masir neu-a.

⁵Boso bii do masasale dale, hu kande emi mase'oheni au so. Tunga ndoon-na, Manetualain mesak-kana nde nakahuluk noo au leo ia mai neme emi mai, soaneu soi-tefa hataholi ba'u.

⁶Besak ia, besak-ka teuk la'andoes ka dua, de nai teuk lima seluk dalen-na, neukose hataholi-a ta foi-fala do ketu-kolu fa.

⁷Manetualain noo au, nakahuluk neme emi mai, fo soi-tefa emi nenik enok fo dodoo doak-kana ia, ma soaneu nanea emi so'dam-ma, ma emi tititi-nonosim manamaik-kala.

⁸Da'di, tunga ndoon-na, ta hu kande emi, de au losa ia fa, tehu Manetualain dei. Ndia nde fe au da'di hataholi mana'a ngga'di mademaina neu mane Masir-ra so. Ana fe au koasa basa uma loon oe-isin, ma basa Masir lala'en-na.

⁹Besak ia, emi fali lai-lai leo ama meu, fo mafa'dan mae Yusuf, fo ndia anan-na, nafa'da nae leo ia, ‘Manetualain fe au da'di manakoasa neu basa Masir lala'en-na so; mai lai-lai leona.

¹⁰Ama bole leo nai nusa Gosyen-na, fo deka no au — ama no upu-anan-nala, bi'ilopo, bi'ihiik, sapi ma basa ama hata-heton lala'en-na.

¹¹Metema ama leo nai Gosyen soona, au hapu akaboboi ama. Tepo-lelek la'andoes-sa bei la'ok nakandoo teuk lima seluk, de neukose au sanga enok fo ela ama, ama umaisin-nala, ma bana-manun boso to'a-taa hata esa boen.’ ”

¹²Yusuf nafa'da seluk nae, “Besak ia, emi mita matam, boeo o Benyamin, mae te'e-te'e Yusuf nde au.

¹³Mafa'da ita aman mae, au koasang-nga ba'un-na seli nai Masir ia, ma tuin basa hata lala'en fo emi mitan. Boema moon lai-lai leo ia mai.”

¹⁴Basa ndia boema, ana holu-na Benyamin fo fa'din ndia, boema ana kii; Benyamin boeo ana kii, ma ana holu Yusuf boe.

¹⁵Basa boema, bei no kii-kiik, Yusuf holu na basa tolanoon-nala, de ana de'is. Basa ndia boema, ala mulai kola-kola loon.

¹⁶Lelek nai mane masir uma manen-na, halak-ka nananamanenek, lae Yusuf tolanoon-nala mai boema, manek-ka ma hataholi mana'a ngga'din-nala lamahoko tunga boe.

¹⁷Boema manek-ka nafa'da Yusuf nae, “Madenu o tolanoom sila, fo ala fua gandum neu sila keledein-nala lain, fo ala fali leo Kanaan leu,

¹⁸soaneu leu lala sila aman ma umaisin-nala fo ala lali mamanak leo ia mai. Neukose au fes dae neulauk nanseli nai Masir, fo dae ndia buna-boan taon-na so'dan-nala dai ma lena.

¹⁹Madenus fo ala ho'ileni kaleta de'ubee neme ia mai boe, soaneu leu lala sila saon-na, ma ni'iana kome'doana-la, ma sila aman.

²⁰Ta paluu sila dudu'a-dodoo, sila-la'oela sila bua-lo'an-nala no nakasetik fa, nanahu hata fo malole hiik nai Masir lala'en-na, neukose da'di sila nuun.”

²¹Yakob anan-nala tao tunga manek ndia paletan-na. Yusuf fes kaleta de'ubee, fo nandaa no manek-ka paletan-na, ma tua-lepa boe, fo la'a nai enok.

²²Boeo ana fe sila esan-na bua-lo'a beuk pasan esa, tehu soaneu Benyamin soona, ana fen doifulak natun telu, ma boalo'a beuk pasan lima.

²³Ana haitua fe aman bua-lo'a manahiik keledei sanahulu neme Masir mai, ma gandum keledei sanahulu seluk, loti ma nana'a-nininu fe'ek, fo la'a nai leleo-lala'on leo Masir leu.

²⁴Basa boema, neu nafuli tolanoon-nala, de nafa'das nae, “Boso male'a nai enok.”

²⁵Ala la'oela Masir de ala fali le'us leo Kanaan, fo leo sila aman Yakob leu.

²⁶Lafa'dan lae, “Yusuf bei maso'dak. Ndia manakoasa nai basa Masir lala'en-na!” Yakob namanene halak ndia boema, ma'dak halan-na, de ta namahele fas.

²⁷Tehu lelek ala tui basa hata fo Yusuf nafa'da neus, ma lelek nita Yusuf haitua kaleta soaneu leu lalan fo loon leo Masir neu boema, besak-ka dudu'a-aafin fali.

²⁸Nafa'da nae, “Au anang Yusuf bei maso'dak!” Ka'da ndia nde, au ahiik-kana! Au muse u, fo au itan, beidai au beita mate fa.