Read Termanu KEJADIAN 49 Bible Online

KEJADIAN 49 - Termanu bible

KEJADIAN 49

¹Basa boema, Yakob naloo anan-nala, de nafa'da nae, “Makabubua mai ia, deka moo au. Au sanga afa'da emi, hata fo neukose emi la'ola'din nai fai makabuin:

²Makabubua leon, hei Yakob anan-nala lemin, mamanene Israel, fo emi amam.

³Ruben, fo au ana ulung-nga, o nde au be'i-balakaing, boa sosak fo au palani tatibatung-nga, O nde ao makadelek, ma mabe'i-balakai manituk nai basa au anang-ngala dalek.

⁴Mu'dak la'iesak-kana, o mako'ba sama leo oe-a, nalosa o ta nde makasososak-ka fa; nana o sungu moo au sao makahatung-nga, o tao manggenggeo o amam pepe'un-na.

⁵Simeon ma Lewi tolanook-kala; sila taka besi nde buas naseti-nalakak.

⁶Au ta tunga nai sila lalahalan-na dalek fa, ma boeo, ta nai sila nakabubuan-na dalek fa. Nana sila lanisa nai nasa-meluk-ka dalek, ala ke'di ketu meoasu ei uan-na hu kande namahoko-setelek-ka.

⁷Sila nasa-melun, nanasoo-supak leona, nanahu nasa-melun ba'un-na seli. Sila nasa-melu mangalaun-na, nanasoo-supak leona, nanahu dale susue-lalai taak-kala. Neukose Au tao tapasasalas nai basa Israel lala'en-na. Neukose Au nggenggela-ngganggalis lai leoina lala'en-na tala'da.

⁸Yehuda, neukose o kaa-ma o musum-ma, kandoun-na; neukose o tolanoom-mala koa-kio o, ma ala senek nai o matam-ma.

⁹Yehuda sama leo singa molisoluk; ana taonisa musun-na, boema ana fali leo ndunun dale neu; nananaua, boema nangape'uk ma ta hapu hataholi esa boen, napalani fafae fan.

¹⁰Neukose Yehuda ho'u aitete'e nusak-ka, neukose tititi-nonosin paleta losa dodoon-na. Neukose leoina-kala leni bea mai, ma ala senek ma lakatele nai matan-na.

¹¹Keledei anan-na, nanapa'ak neu ai, ai angol fo malole nanseli. Ana safe bua papaken-na nenik angol, angol-la, pilas leo daak-ka.

¹²Matan-na pilas, nanahu ninu angol, nisin-na fulak, nanahu ninu kapaoe.

¹³Neukose Zebulon leo deka no tasi-a; neukose ofak-kala see nai namo see seen-na; losa nusa Sidon-na dae toon-na.

¹⁴Isakhar ndia sama leo keledei balakaik fo nakandondoo nai lepeneun-nala tala'da.

¹⁵Ana nita mamanak ndia malole na seli ma nusak ndia lole na seli boema nakatele, fo ana nau fua bua-lo'as neu alun lain ma lakasetin naue-nale'di da'di leo ata.

¹⁶O Dan, neukose o maketu-mala'di o leoinam o da'di leo esa sama leo fe'ek manai Israel-la.

¹⁷O sama leo menge nai enok-ka su'un-na, menge malasok-ka, nai mangalolok-ka su'un-na, fo ana kaa ndala eitingan-na losa hataholi manasa'ek-ka busuhenin.

¹⁸Ou MANETUALAIN, au ahani talu-talu neu so'da-molek fo, O fee-ka.

¹⁹Gad, neukose nakodaa-la sapu-la o, tehu neukose o lepos fali, fo o mamanako masafali seluk-kasa.

²⁰Asyer, o nana'a-nininum sasi kao-kao ma mala'da hiik, neukose o sadia nana'a-nininuk ba'eneu mane-manek-kala.

²¹Naftali, sama leo nusa nanapo'ihenik-ka anan-nala mata makeek-kala.

²²Yusuf sama leo keledei ana keledei fuik-ka, deka no oemata, nalaik nai letek-ka huun-na.

²³Musu sapu neni momopo-mamaten, Ana usin nenik kokouk ma kokouisik.

²⁴Tehu Yusuf alun-na natea nahele, kokouisin-na natea nahele, nanahu Manafoo Mabe'i-balakai lea, Yakob Manetualain-na, Israel Manamasulu-mahapan-na, koasan-na.

²⁵O amam Manetualain, tulu-fali o, Fo Manakoasa, ba'e-pala o, nenik u'dan-na neme lalai mai, ma oe-a neme dae buin-na mai. Nenik ni'iana ma sapi,

²⁶gandum ma bunga, O amam Manetualain baba'e-papalan lena heni lete-letek fo, lamalasi lanseli-a su'i-beten-nala. Ela leo been-na, basa baba'e-papalak sila-la, kona neu Yusuf langan lain, neu dedein lain. Ndia nde malole lena neme tolanoon-nala mai.

²⁷Benyamin nde been-na, busa fui makaa-makisu mangalauk. Ana kaa-na nana'an-na nai fai fafain-na. Ana baba'en nai fai le'odaen-na.”

²⁸Israel leo ka sanahulu duan-nala nde sila, ma hala heheluk fo sila aman kokolak-kana, nai lelek ana fe nate'a nasi'da-naba'ek-ka neu sila esa-esak.

²⁹Basa boema, Yakob helu anan-nala nae, “Ba'ihanak seluk bai te, neukose au fali sama leo au bei-ba'i kaing-ngala. Soona matoi au nai sila boboan-na, nai leak Makhpela dalek, nai Mambre boboan dulu, fo nai dae Kanaan-na. Abraham asan-na leak ma tina manai boboa kaisun, neme Efron, hataholi Het ndia mai so, fo ana taon da'di mamana natoi mamates.

³¹Abraham ma Sara, Isak ma Ribka, nanatoi-natonok lai ndia; ma au atoi-atono Lea nai ndia boe.

³²Tina ma leak manai ndia, nanaasa basak neme hataholi Het-ta mai so. Matoi-matono au nai ndia.”

³³Lelek Yakob helu basa anan-nala boema, nangape'uk de maten leona.