Read Termanu KEJADIAN 5 Bible Online

KEJADIAN 5 - Termanu bible

KEJADIAN 5

¹Adam tititi-nonosin susulan-na nde ia. [Nai lelek Manetualain nakadada'dik hataholi daebafak-ka, nakadada'di-nalas, lupan-nala nahope no Manetualain lupan-na.

²Nakadada'dik touk ma inak. Boema, Ana ba'e-palas, ma Ana foi na'den-nala “Hataholi”.]

³Lelek Adam teun natun esa teluhulu boema, ana bongi anatouk, de mata-panan nahope no ndia mata-panan, boema ana foin na'de Set.

⁴Basa ndia boema, Adam bei naso'da teuk natun falu seluk, de ana bongi ana fe'e-fe'en-nala.

⁵Teun 930 boema maten.

⁶Nai lelek Set teun 105 boema, ana bongi ana touk esa, na'de Enos.

⁷Basa ndia boema, Set bei naso'da teuk 807 seluk, de ana bongi ana fe'e-fe'en-nala.

⁸Teun 912 boema maten.

⁹Nai lelek Enos teun siohulu boema, ana bongi ana touk esa, na'de Kenan.

¹⁰Basa ndia boema, Enos bei naso'da teuk 815 seluk, de ana bongi ana fe'e-fe'en-nala.

¹¹Teun 905 boema maten.

¹²Nai lelek Kenan teun hituhulu boema, ana bongi ana touk esa, na'de Mahalaleel.

¹³Kenan bei naso'da teuk 840 seluk, de ana bongi ana fe'e-fe'en-nala.

¹⁴Teun 910 boema maten.

¹⁵Nai lelek Mahalaleel teun 65 boema, ana bongi ana touk esa, na'de Yared.

¹⁶Basa ndia boema, Mahalaleel bei naso'da teuk 830 seluk, de ana bongi ana fe'e-fe'en-nala.

¹⁷Teun 895 boema maten.

¹⁸Nai lelek Yared teun 162 boema, ana bongi ana touk esa, na'de Hanok.

¹⁹Basa ndia boema, Yared bei naso'da teuk natun falu seluk, de ana bongi ana fe'e-fe'en-nala.

²⁰Teun 962 boema maten.

²¹Nai lelek Hanok teun 65 boema, ana bongi ana touk esa, na'de Metusalah.

²²Basa ndia boema, nai teuk natun telu dalen-na, Hanok naso'da nai nakabua-nakaesak-ka dalek no Manetualain. Ana bongi ana fe'e-fe'en-nala, de

²³teun-na losa teuk 365.

²⁴Hu kande Hanok naso'da teik esa-dalek esa no Manetualain, de nalosa mopok-kana, nanahu Manetualain ho'i-nan.

²⁵Nai lelek Metusalah teun 187 boema, ana bongi ana touk esa, na'de Lamek.

²⁶Basa ndia boema, Metusalah bei naso'da teuk 782 seluk, de ana bongi ana fe'e-fe'en-nala.

²⁷Teun 969 boema maten.

²⁸Nai lelek Lamek teun 182 boema, ana bongi ana touk esa.

²⁹Lamek nae, “Ni'iana ia, neukose lui namada'u bela-ba'uk nai lelek ita pusen-na ti'ti, no foi-fala dae fo, MANETUALAIN soo-supak-ka.” Hu ndia de, Lamek foi ni'iana ndia na'de Noh.

³⁰Basa ndia boema, Lamek bei naso'da teuk 595 seluk, de ana bongi ana fe'e-fe'en-nala,

³¹de teun 777 boema maten.

³²Lelek Noh teuk natun lima boema, ana bongin-na, ni'iana touanak telu, fo nde Sem, Ham ma Yafet.