Read Termanu KEJADIAN 50 Bible Online

KEJADIAN 50 - Termanu bible

KEJADIAN 50

¹Yusuf bala aoinan-na neu aman lain boema ana kii ma ana de'in.

²Boema Yusuf nadenu hataholi fo ana lose mo'do-akidok neu Yakob popolan-na.

³Tataos ndia, na'a faik haahulu, fo nde faik fo biasa ala paluun soaneu lose mo'do-akidok neu hataholi manamatek-kala popolan-na. Hataholi Masir-ra falu Yakob mamaten-na, faik hituhulu dalen-na.

⁴Lelek basa fai fafaluk ndia boema, Yusuf nafa'da manek-ka hataholi mana'a ngga'din-nala nae, “Manduku-malosak hala-heheluk ka nde ia neu manek-ka mae,

⁵‘Lelek fo ata ma aman sanga deka maten boema, nadenu ata ma helu neun, nae neukose ata ma natoin nai lates fo ana sadia nan nai dae Kanaan so. Hu ndia de, fe ata ma loak soaneu ata ma neu natoi ata ma aman. Basa ndia soona, ata ma fali ma'in.’ ”

⁶Boema manek-ka nae, “Muu matoi o amam sama leo o helu basa neun so.”

⁷Boema Yusuf neu natoi aman leona. Basa manek-ka hataholi mana'a nga'di nala, basa uma manek-ka lasi-lasin-nala ma basa Masir hataholi matua-mademan-nala leu sama-sama loo Yusuf.

⁸Yusuf umaisin-nala, tolanoon-nala, ma tolano ka'a-fa'di fe'en-nala leu boe. Ela ka'da ni'iana kome'do anala ma sila bana manu nala lai nusa Gosyen na.

⁹Solda'du manasa'e kaleta ma manasa'e ndala la tunga boe, nalosa nonongok ndia nalu na seli.

¹⁰Lelek ala losa hataholi-la mamana fefepa gandum manai Goren-Haatad, fo nai Lee Yarden na boboan dulu boema, ala kii-makaleleu lapane'e no dale he'dik. Yusuf tao feta fafaluk faik hitu dalen-na.

¹¹Lelek laun Kanaan-nala lita fafaluk manai Goren-Haatad ndia boema, lafa'da lae, “Hataholi Masir sila-la fai fafalu ndia, dale he'dek nanseli!” Hu ndia de ala foi mamanak ndia na'de Abel-Mizraim.

¹²Leondiak, Yakob anan-nala tao tunga hata fo Yakob elu neus.

¹³Ala ko'oleni Yakob popolan-na leo Kanaan neu, de latoin nai Leak Makhpela dalek, fo nai Mamre boboan dulu, nai tina fo Abraham asan neme Efron fo hataholi Het ndia mai, soaneu ana taon da'di late mamanak.

¹⁴Yusuf natoi basa aman boema, ana fali leo Masir sama-sama no tolanoon-nala ma basa hataholi manatungan fo leu latoi aman ndia.

¹⁵Mate basa sila aman boema, Yusuf ka'an-nala beekola lae, “Leobeek, metema leouni ka Yusuf nape'da dalek fo anan nau balas makahulun-na ita tatao-nono'i mangalaun-na?”

¹⁶Hu ndia de, ala haitua hala heheluk-ka nde ia leo Yusuf neu, “Beita mate ita aman fa,

¹⁷nadenu ami fo mafa'da o mae leo ia, ‘Fe do'o do ampon neu salak fo makahulun-na o ka'am-mala taon neu o.’ Da'di, da'dileo Manetualain fo ita aman sene-do'ok-ka, atan-nala, ami dokodoe, fe do'o do ampon neu salak fo ami taon nana.” Yusuf kii, nai lelek ana sipo hala heheluk ndia.

¹⁸Boema Yusuf tolanon sila-la ala mai matan de ala senek leu matan-na boema lafa'da lae, “Ami ia, o atam.”

¹⁹Tehu Yusuf nafa'das nae, “Boso bii; nana Manetualain ta nde au fa.

²⁰Emi malahalak basa soaneu tao mangalauk neu au, tehu Manetualain nggati mangalauk ndia nenik malole, fo ela no manada'dik makahulun ndia, hataholi maso'dak makadotok, hapu nanasoi tefak.

²¹Boso bii. Te neukose au tao atetu emi ma emi ana mala paluun na.” Leondiak, ana kokoe-nanasis nenik dede'a-kokola mangana'uk, nalosa dalen-nala tu'da kasian.

²²Yusuf leo nahele neme Masir no tolano ka'a-fa'din-nala; naso'da losa teuk natun esa sanahulu.

²³Ana bei hapu loak nita Efraim upu-anan. Boeo ana bei hapu loak nakaboboi Makhir anan-nala, fo nde Manasye upun-nala da'dileo ndia ana bongin.

²⁴Nafa'da tolanoon-nala nae, “Au mamateng-nga deka so, tehu tao leo bee o, neukose Manetualain nakaboboi emi ma hela-nole emi kalua meme nusak ia mai, leo nusak fo Ana helu basan pake soo-supak neu Abraham, Isak ma Yakob.”

²⁵Boema Yusuf nadenu basa tolanoon-nala soo-supa. Nae, “Maheluk moo au, mae metema Manetualain hela-nole emi leo nusak ndia meu soona, emi mude meni au popolang-nga boe.”

²⁶Basa boema mate Yusuf nai Masir nai lelek teun 110. Ala lose mo'do-akidok neu popolan-na, de ala taon leo kopak dale neu.