Read Termanu KEJADIAN 6 Bible Online

KEJADIAN 6 - Termanu bible

KEJADIAN 6

¹Lelek hataholi daebafak-ka boetai namaba'uk-ka, ma ala tapasasala nai basa daebafak-ka lala'en-na, ma ala bongi ni'iana inaanak-kala

²boema, Manetualain anan-nala lita anafe'oanak sila-la, mata makeek mesa-mesan. Boema ala hii anafe'eoanak see soona, ala sao-lan.

³Boema MANETUALAIN nafa'da nae, “Au ta nau hataholi daebafak-ka naso'da losa dodoon-na fa; sila mahahaek manasapu-manalalok, de muse mate. Mulai besak ia, teun-nala, neukose ta lena neme teuk 120 mai fa.”

⁴Nai tepo-lelek ndia, ma tepo-lelek maneuk-ka boe, hapu hataholi ao matua ma mademaina, nai daebafak-ka. Hataholi sila-la tititi-nonosik neme hataholi daebafak-kala, anafe'oanan-nala mai, fo ala saoana loo Manetualain anan-nala. Hataholi ao matua ma mademaina sila-la nde been-na palani ta'ti batu-la nanseli, ma hataholi nananita-nalelak nai tepo-lelek makahulun eli.

⁵ MANETUALAIN nita hataholi daebafak-kala tatao-nono'i mangalaun-nala, ba'un-na seli nai daebafak-ka; dudu'a-aafin-nala mangalauk tataas esa.

⁶Manetualain boeo nasasale dale, nakadada'dik hataholi sila-la, de Ana fes ala leo nai daebafak-ka. Dalen-na ba'ihana nanseli,

⁷nalosa nafa'da nae, “Neukose, Au tao amopo-amate hataholi daebafak fo Au akadada'dik sila-la, ma basa manupui-la ma bana fe'ek-kala lala'en-na boe, nana Au asasale dale, akadada'dik basa hataholi sila-la so.”

⁸Tehu Noh nandaa no MANETUALAIN dalen-na.

⁹Noh tutuin-na nde ia. Ana toun telu, fo nde Sem, Ham ma Yafet. Noh ta tao salak fa, ma ndia ka'da hataholi esa mesa-mesak-kana, malole nai tepo-lelen-na. Naso'da teik esa-dalek esa no Manetualain.

¹¹Tehu basa hataholi fe'ek-kala, tatao-nono'in-nala mangalauk nai Manetualain mata memeten-na, ma tatao-nono'i ha'da hataholi taan-nala, hapun nai mamanak lala'en-na.

¹²Manetualain mete daebafak ndia, de nita ka'da tatao-nono'i mangalauk-ka mesak-kana, nana basa hataholi daebafak-ka maso'dan-nala mangalauk-ka.

¹³Boema, Manetualain nafa'da Noh nae, “Au aketu basa, soaneu tao ate'e basa mahahae maso'dak lala'en-na, so'dan-nala. Neukose, Au tao amopo-amates, sama-sama loo daebafak-ka, nanahu daebafak-ka henuk no sila tatao-nono'i ha'da hataholi taan-nala.

¹⁴Taom-ma, ofak esa soaneu o. Tao ofak ndia, neme ai matea mesa-mesan; tao kama-kama nai dalek, ma makadiditak ter nai dalek, ma nai deak.

¹⁵Ofak ndia nalun-na muse metel 133, loan-na metel duahulu dua ma deman-na metel sanahulu telu.

¹⁶Taom-ma ofak ndia mapunik, fo fe lelan-na senti haahulu haa, nai punin-na no papalan-na tala'da. Taom-ma ofak ndia, ta'dak telu, ma tao lelesu esa neu boboan-na.

¹⁷Te neukose, Au fe faa tuak-ka mai, fo ana tao namopo-namate basa mahahae maso'dak, fo laso'da nai daebafak-ka. Basa hata lala'en, fo manai daebafak-ka, neukose mate la'iesak-kasa,

¹⁸tehu Au sanga tao hehelu-balataak no o. Masok leo ofak ndia dalek, sama-sama moo o saoinam-ma, ma o anam-mala loo saoinan-nala.

¹⁹Ho'i meni manupui mata-matak-kala, ma bana fe'e-fe'ek-kala, ina-mane beke esak, leo ofak ndia dalek neu, fo ela boso mopo-mates.

²¹Boeo, ho'i meni nana'a-nininu mata-matak-kala, soaneu o, ma soaneu bana-manu sila-la.”

²²Noh tao basa hata lala'en, fo Manetualain paleta neun.