Read Termanu KEJADIAN 8 Bible Online

KEJADIAN 8 - Termanu bible

KEJADIAN 8

¹Manetualain ta nafandele heni Noh ma basa bana lala'en, fo sama-sama loon nai ofak ndia dalek. Manetualain fe anin-na mai, de nalosa oe ndia mulai ma'da.

²Ana kena basa oemata manai daebafak-ka buin-na ma basa lelesu oe manai lalai-a. U'dan-na lea,

³de oe-a, ana boetai ma'dan. Basa faik natun esa limahulu boema, oe-a ta madema so'on.

⁴Nai hataholi Yahudi-la bula ka hitun-na, fain sanahulu hitu boema, ofak ndia hala neme letelepak Ararat-ta poin-na.

⁵Oe ma'da nakandoo, de nai hataholi Yahudi-la bula ka 10-na, fain 1 boema, mulai lita letek-kala poin-nala.

⁶Basa faik haahulu boema, Noh soi heni ofak-ka jendelan esa,

⁷de ana po'i manupui kaa esa. Manupui ndia ta fali ma'in leo ofak-ka mai fa, te ana laa neu mai nakandoo, losa ma'da makandondook faa oek-ka.

⁸Basa boema, Noh po'i kalua sina esa neu, fo ana mete, ade oe ndia memak ma'dan so do beik.

⁹Tehu hu kande, oe-a bei potin-na daebafak-ka lala'en-na, de kalua sina ndia ta hapu mamanak fo ana sa'e fa. Boema, ana fali ma'in leo ofak-ka mai; Noh solok liman-na neu, de ana ko'o-nan, boema ana tao falik-kana leo ofak dale neu.

¹⁰Noh bei nahani faik hitu seluk, boema ana po'i seluk kalua sina ndia neu.

¹¹Le'donoso boema, manupui ndia, fali ma'in leo Noh mai te, ana kaa neni ai setun-na doon esa, bei momo'dok. Besak ia, Noh bubuluk nae oe ma'dan so.

¹²Noh nahani faik hitu seluk, boema ana po'i manupui kalua sina ndia, neu la'iesa seluk; de oek ia soona, manupui ndia ta fali ma'in leo Noh mai so'on.

¹³Nai lelek Noh teun 601, fo nai hataholi Yahudi-la bula ka esan-na, fain esa boema, oe-a ma'da henin tuu-tuu so. Boema Noh soi heni ofak ndia jendelan-nala, de ana mete leo boboa-kaisun neu. Ana mete te, dae-a ma'da henin tuu-tuu so.

¹⁴Neu hataholi Yahudi-la bula ka dua-na, fain duahulu hitu, te daebafak-ka ma'dak so.

¹⁵Boema, Manetualain nafa'da Noh nae,

¹⁶“O moo o saoinam-ma, o anam-mala loo saoinan-nala, kalua meme ofak ndia dalek mai leona.

¹⁷Kalua heni basa manupui-la, ma bana fe'e-fe'ek-kala, nau matua do ana boe, fo ala bisa lamade'u, fo ala tapasasala leo daebafak-ka lala'en-na leu.”

¹⁸Boema, Noh kalua neme ofak ndia dalek mai, sama-sama no saoinan-na, anan-nala loo saoinan-nala.

¹⁹Basa manupui-la, ma bana manai ma'dak lain-nala, ala kalua loo esa-esak nonoon.

²⁰Boema, Noh taon-na mei tunu-hotuk esa, soaneu MANETUALAIN. Ana ho'un-na manupui mata-matak-kala beke esak, ma bana fe'e-fe'ek fo bole na'a paan-na, beke esak, boema ana tunu-hotun da'di leo tutunu-hohotuk nanatunuk nai mei tunu-hotuk ndia lain.

²¹Tutunu-hohotuk ndia, boomenin-na tao namahoko MANETUALAIN dalen-na, boema Ana dodoo nai dalen dalen-nae, “Neukose Au ta soo-supa seluk daebafak ia so'on, hu kande hataholi daebafak-ka tatao-nono'in; Au bubuluk, hataholi daebafak-ka dudu'a-aafin ndia, mangalauk neme bei muli-solun-na mai. Neukose, Au ta tao amopo-amate basa mahahae maso'dak, fo bei kaso'dak-kala so'on, sama leo besak-ka Au taok ia.

²²Metema daebafak ia, beita mopo fan soona, neukose hapu tataas esa, no fai sele-nggalik ma fai ketu-koluk, fai makasufuk, ma fai mato'bik, fai hanas ma fai oefaak, lele'dok ma le'odaek.”