Read Termanu 2 SEMUEL 1 Bible Online

2 SEMUEL 1 - Termanu bible

2 SEMUEL 1

¹Mate basa Saul boema, Dauk fali ma'in neme natee-natatik fo, ana sengi hataholi Amalek-kala, boema nahele neme Ziglak, faik dua dalen-na.

²Balahaa boema, ta'eanak esa, ana mai neme Saul mamana ofun-na mai. Ana siba'e bua papaken-na, ma ana tao dae leo langan lain neu, fo da'di leo ta'du-tana manasusak. Neu leo Dauk neu, de ana senek neu Dauk matan-na.

³Boema, Dauk natanen nae, “O meme bee mai?” Boema ta'eanak ndia nataa nae, “Atam-ma, hapu naladeak neme hataholi Israel-la ofun-na mai.”

⁴Dauk natanen nae, “Tui au, hata da'di so!” Boema ta'eanak ndia, nataa nae, “Ami solda'dum-mala, lalai leme natee-natatik dale mai, boema mate makadotok, ma mate Saul no Yonatan boe.”

⁵Boema, Dauk natanen nae, “Te tao leo beek de, o bubuluk?”

⁶Ta'eanak ndia nataa nae, “Nai lelek ndia, nandaa no atam-ma nai Letek Giboa lain, boema au ita Saul nasala'da teen-na, te kaleta musu-la, ma solda'du manasa'e ndala-la, ala deka fo sanga lakahapi-lan so.

⁷Saul lipa leo dea neu, de nita atam-ma, boema naloo atam-ma, de atam-ma nataa nae, ‘Ou, au Ama Maneng.’

⁸Boema natane, see atam-ma, de atam-ma tuin nae atam ia, hataholi Amalek.

⁹Boema nafa'da atam-ma nae, ‘Mai fo taomisa au leona! Au akahina belak, de au sanga mate ia so.’

¹⁰ Boema, atam-ma neu de atam-ma taonisan, nana atam-ma bubuluk nae, metema ana ta bisa napadeik so'on, de ana tu'u neu soona, tao leo bee-o, neukose maten boe. Boema, atam-ma ho'in-na ti'ilanga manek-ka neme langan lain, ma suek-ka neme lima lesun-na mai, de atam-ma nenin leo ia mai, fo fen leo au Ama Maneng neu.”

¹¹Dauk namanene boema, ana siba'e bua papaken-na, nanahu dalen-na he'dis-sa, ma solda'dun-nala boeo ala tao leondiak.

¹²Ala makaleleu ma ala susa, boema ala okaaon-nala, soaneu Saul ma Yonatan, ma soaneu laun Israel-la, soaneu MANETUALAIN anan-nala, nana mate hataholi makadotok nai natee-natatik ndia dalek.

¹³Basa boema, Dauk natane ta'eanak maneni halak ndia nae, “O momoli-dada'dim neme bee mai?” Boema nataa nae, “Atam ia, hataholi Amalek, hataholi maleu-malaak esa nai au Ama Maneng-nga nusan-na.”

¹⁴Boema Dauk nae, “O mapalani manseli, taomisa manek fo MANETUALAIN helek-ka!”

¹⁵Boema, naloo-na solda'dun esa, de ana fen paleta nae, “Taomisa hataholi ia!” Boema solda'du ndia, tatenisa ta'eanak Amalek ndia.

¹⁶Dauk nafa'da ta'eanak Amalek ndia nae, “O nde maketu aom huhuku nisak ia, soaneu o aoinam-ma, nana o manaku mae o taomisa manek, fo MANETUALAIN helek-ka!”

¹⁷Basa ndia boema, Dauk nakamee kikii-makaleleuk soaneu Saul ma Yonatan,

¹⁸ ma ana fe paleta, fo nanoli leo Yehuda, nakameek ia. (Nakameek ia, nanasulak nai Yasar Susulan dale).

¹⁹“Israel nai O pupukum-mala lain, fo nai dook eli palani ta'ti batu-la, mates, mate heni basa ta'eanak nusaina-la, da'di leo bunga leoina.

²⁰Sa'di leo been-na, hataholi Gat-tala, ta lamanene manada'dik ndia fa. Sa'di leo been-na, mangalolok Askelon-nala, ta hapu halak la'eneu dede'ak ndia fa. Boso nalosak ina Filistin-nala eeki-latadale boso nalosak, ina dinitiu-la lakalupu-lakasee.

²¹Hai, pupukuk Gilboa-la lemin, mamanene au hala naloong-nga: Boso nalosak, dinis-sa ma u'dan-na nakadoe emi! Nemen-na, fo emi tinam-ma, ma emi moo-mala lamatuu ma tokotiik. Nana nai naa, palani ta'ti batu-la babaa fanan-nala, ala besenggela. Ma Saul babaa fanan-na boeo, nalulutu, ta lose mina neu so'on.

²²Yonatan kokou mahelen-na, nanisa. Saul tafainan fo ta nalelak dale kasian-na, taonisa musu-a, ma tao namopo-namate musu nook-ka.

²³Saul ma Yonatan hala-kokola mangana'uk, ma nanasue-laik; dalek esa-teik esa tataas esa, nai maso'dak ma mamates-sa dalek; sila nasafelon-na, lena heni manupui kaka'ka, be'i-balakain lena heni singa molisoluk.

²⁴Hai, ina Israel-la lemin, kii-makaleleu mane Saul-la leona! Fo manapake-nggao emi nenik bua-lo'a pilas mabelik malole-mana'a, ma ana balias emi nenik lilopila poemata mana'ahiik.

²⁵Basa palani ta'ti batu-la, ala kono-mo'u so ala tu'da lai natee-natatik dale ma nai pupuku nee-nee lino-linok lain, Yonatan nanado'dok de maten.

²⁶Hai au tolanoong Yonatan, au daleng-nga, he'dis nanseli, nana o belim-ma, ba'un-na seli ba'eneu au. O susue-lalaim neu au-a, ba'u nanseli no dale katemak lena heni inak-ka susue-lalain.

²⁷Basa leoina-la palani ta'ti batun-nala mates-so. Tafa-sisilon-nala, sosoa-ndandaa tak-kala!”