Read Termanu 2 SEMUEL 10 Bible Online

2 SEMUEL 10 - Termanu bible

2 SEMUEL 10

¹Basa boema, mate Nahas, fo mane Amon-na, de anamanen Hanun, ana nggatin da'di manek.

²Boema, Mane Dauk-ka nafa'da nae, “Nahas nde been-na, au tia-lai manalililnekang. Da'di, au muse tao tia-laik o anamanen Hanun boe.” Hu ndia de, nadenu hataholi neu leo nusa Amon-na neu, fo ana kokoe-nanasi Hanun, nanahu aman mamaten-na.

³Lelek ala losa Amon boema, nusak ndia, mauli-malangan-nala lafa'da Hanun lae, “Ama Manek boso dodoo-dudu'a mae Dauk nadenu hataholi sila-la ala mai, hu ka nde ana nau fe ha'da-holomata neu Ama Manek aman! Te nadenu hataholi sila-la, ala mai leo ia mai, fo ala da'di manamakuk soaneu ala palisak lutu-lutuk nusak ia, fo ela bisa nangatuu-nan.”

⁴Boema, Hanun ho'un-na Dauk nadenu hataholi sila-la, de ana nggeu heni nggolomein-nala seli, ana kee keke'u bua papaken-nala losa kalebon-nala, de nadenus fo ala la'o.

⁵Tehu ala mae, fali le'us leo sila nusan-na leu. Lelek hataholi nafa'da manada'dik ndia neu Dauk boema, ana haitua hala heheluk, fo daenga nadenu hataholi sila-la, fo ala leo leme Yerikho, losa nggolomein-nala moli seluk.

⁶Basa boema, hataholi Amon-nala, lame'da lae sila tatao-nono'in ndia, tao-na Dauk musu no sila. Hu ndia de, ala se'ba solda'du Siria fo manaleo nai Bet-Rehob ma Zoba, lifun duahulu, ma solda'du Tob lifun sanahulu dua boe, boema nusa Maakha manen-na, no solda'dun lifun esa.

⁷Lelek fo Dauk namanene dede'ak ndia boema, nadenu Yoab no basa solda'dun-nala lala'en-na, fo leu la'ban musu-a.

⁸Hataholi Amon-nala kalua mai de, ala atol sila solda'dun-nala lai Raba, fo sila kotan-na polon-na, lelesuinan-na matan, te hataholi Siria, hataholi Tob ma hataholi Maakha-la, ala atol sila solda'dun-nala, lai mook-ka.

⁹Yoab bubuluk solda'du musu-la lakahapi-lan neme uluk ma neme dea mai so. Hu ndia de, ana helen-na solda'du Israel palani-la, de ana fes lisik mata, fo lasasalematak loo solda'du Siria-la.

¹⁰Ana fe bei ela solda'du Israel-la, leo fa'din Abisai neu, fo lasasalematak loo solda'du Amon-nala.

¹¹Yoab nafa'da fa'din ndia nae, “Metema au asasalematak o solda'du Siria-la, fo au ta bole fas soona, lai-lai mai fali au; boema, metema o ta makatatakak la'ban solda'du Amon-nala fa soona, neukose au ne'i fali o.

¹²Matetea-mahehele o dalem-ma! Mai fo tatee-tatati no napalanik, soaneu ita leoinan-na, ma soaneu ita Manetualain kotan-nala. Sa'di leo been-na, MANETUALAIN tao su'di beek fo nahiik-kana.”

¹³Yoab no solda'dun-nala tutulumatak, de ala sapu leona, nalosa solda'du Siria-la lalai.

¹⁴Lelek solda'du Amon-nala lita solda'du Siria-la lalai boema, sila boeo lalai leme Abisai mai, de lakadedeak leo kota dale leu. Yoab natee-nata'ti basa no hataholi Amon-nala boema, ana fali ne'un leo Yerusalem neu.

¹⁵Hataholi Siria-la lame'da lae, hataholi Israel-la sengi sila so; hu ndia de, laloo basa sila solda'dun-nala, fo lakabubua seluk.

¹⁶Boema, Mane Hadadezer-ra, nadenu hataholi neu naloo hataholi Siria manaleo nai Lee Efrat-ta boboan dulu, boema Mane Hadadezer-ra neme Soba mai, malanga solda'du matuainan Sobakh, nauli-nalangas de ala mai leo Helam mai.

¹⁷Dauk namanene dede'ak ndia boema, no lai-laik, naloo nakabubua basa solda'du Israel-la lala'en-na, de ala lena leo Lee Yarden-na selik leu, basa boema, ala tutulumatak leo Helam leu. Hataholi Siria-la, ala atol sila solda'dun-nala lai ndia, boema ala tutulumatak, de ala sapu-la Dauk solda'dun-nala.

¹⁸Tehu hataholi Israel-la, sengi solda'du Siria-la. Dauk no solda'dun-nala, taolisa hataholi manaho'u kaleta musu, natun hitu, ma solda'du manasa'e ndala, lifun haahulu; fe'ek neme ndia mai, Sobakh, fo musu-a malanga solda'du matuainan-na boeo, nakahina belak, nalosa maten neme natee-natatik dale.

¹⁹Lelek Hadadezer koasa-na basa manek-kala lita solda'du Israel-la sengi sila so boema, loke dame, de lakatele neu Israel. Mulai neme ndia mai boema, hataholi Siria-la ta lapalani tulu-fali hataholi Amon-nala so'on.