Read Termanu 2 SEMUEL 12 Bible Online

2 SEMUEL 12 - Termanu bible

2 SEMUEL 12

¹ Basa ndia boema, MANETUALAIN nadenu Nabi Natan-na neu natongo no Dauk. Natan neu de nafa'dan nae, “Hapu hataholi dua, ala leo lai kota esa dalek; esa kamasu'i-makabetek, ma esa nuu-taa hata-taak.

²Tou kamasu'i-makabetek-ka, bana-manun makadotok nanseli, ma mabi'ilopok,

³tehu tou nuu-taa hata-taak-ka, nanuu bi'ilopoana ka'da esa, fo ana asan-na bi'ilopoana ndia boe. Nakaboboi bi'ilopoana ndia, losa namatua sama-sama no touk ia anan-nala nai uman dale. Ana fe bi'ilopoana ndia, na'a neme ndia nana'an-na mai, nakalenak bai, ninu neme ndia mango teen-na mai, ma ana sungu nai ifan lain; ho'ike'uk, ana taon da'di ndia anainan.

⁴Faik esa boema, tou kamasu'i-makabetek-ka, ana hapu fui. Tou kamasu'i-makabetek-ka, ta nau do'do ndia bi'ilopon, do ndia sapi mesan fe fuin-na fa. Tehu neu ho'un-na, tou nuu-taa hata-taak-ka bi'ilopoanan ndia, de ana do'do fen neu ndia fuin-na.”

⁵Dauk namanene tutuik ndia boema, namanasa nanseli, nanahu tou kamasu'i-makabetek-ka tatao-nono'in ndia, de nafa'da nae, “Hataholi kamasu'i-makabetek ndia, dale susue-lalain ta faa anak boen! No MANETUALAIN fo maso'dak-ka na'den-na, hataholi ndia muse nggati falik bi'ilopoana 4, ma muse hukunisan!”

⁷Boema, Natan nafa'da Dauk nae, “Ama Manek nde hataholi ndia! De MANETUALAIN Manakoasa, fo Israel Manetualain-na, nafa'dak-ka nde ia nae, ‘Au so'u basa o da'di manek neu Israel, ma Au soi-po'i o neme Saul mai so.

⁸Au fe basa Saul no saon-nala leo o neu so, nakalenak, Au so'u o da'di manek neu Israel ma Yehuda bai. Leounik-ka, ndia beita dai fa soona, tao leo bee-o, neukose Au fe seluk o, de'u ndia boe.

⁹Tao le'e de, o ta nau taoafik neu Au paletang-ngala fa? Tao le'e de, o tao-no'i tatao-nono'i mangalauk ndia? O taomisa Uria neme natee-natatik dale; o po'ilotak hataholi Amon-nala taolisan, de o ho'i-ma saon-na!

¹⁰Hu kande, o ta nau tunga Au fa de, o ho'i-ma Uria saon-na, hu ndia de, nai o tititi-nonosim-ma dalek, neme bobongik leo bobongik neu, hapu nggelok mate nisalal.

¹¹Au soo, neukose o teidalem-mala leni fe o, susa-soe. Neukose, nai o matam, Au ho'i-a o saom-mala, fo Au fes leo hataholi fe'ek neu, fo ala sungu los nai le'dohana nees.

¹²O tao basa sala-singok no denge-dengek so, de nasafalin-na, neukose Au afa'da Au nakeketung-nga no mangale'dok nai hataholi Israel lala'en-na matan.’ ”

¹³Boema, Dauk nafa'da Natan nae, “Au asala-asingo basa neu MANETUALAIN so.” Boema Natan nataa nae, “MANETUALAIN fe do'o do ampon neu Ama Manek so; da'di neukose ta mate Ama Manek fa.

¹⁴Tehu, hu kande Ama Manek nakamumulu-nakamamaek basa MANETUALAIN nenik tatao-nono'ik ndia, de neukose mate Ama Manek anatouanan fo besak-ka bongin ndia.”

¹⁵Basa ndia boema, Natan fali ne'un leo uman neu. No MANETUALAIN hihii-nanaun, de Dauk anamanen fo Uria manamatek-ka saon Batsyeba bongik-ka, ana tu'u he'dis.

¹⁶Boema, Dauk hule-haladoi neu MANETUALAIN fo ela ni'iana ndia lea-hai. Ana oka aon-na, ma tunga-tunga le'odaen-na, nangape'uk nai kaman dale, tehu nai dae lain.

¹⁷Boema, uma manek-ka hataholi matua-mademan-nala leu kokoen, fo daenga ana fo'a, tehu ana ta nau fa, ma ana ta nau na'a-ninu sama-sama no fas.

¹⁸Basa mamasok esa boema, mate ni'iana ndia, tehu Dauk atan-nala bii de ta lafa'da fan. Lafa'da lae, “Lelek ni'iana ndia bei naso'da, metema ita kokolak ton soona, ana ta nau namanene fa. Muda hata no besak ia, mate basa anan-na ia bai! Boso nalosak, ana sanga tao susa aoinan-na!”

¹⁹Lelek Dauk nita atan sila-la, lamakukutuk boema, name'da nae mate ni'iana ndia so. Boema natanes nae, “Ade, mate ni'iana ndia so do?” Boema lataa lae, “Maten so, Ama Manek.”

²⁰Boema, Dauk fo'a neme dae lain mai, de nadiu oe, ma ana sau langan-na, ma ana nggati bua papaken-na. Basa boema, neu hule-haladoin-nai MANETUALAIN Uman. Basa ndia boema, ana fali ma'in leo uma manek-ka mai, de noke sadia fen nana'a-nininuk, fo na'a-ninu.

²¹Basa atan-nala lita boema, lafa'dan lae, “Ami ta bubuluk Ama Manek dudu'an-na fa. Lelek ni'iana ndia bei naso'da, Ama Manek oka aon-na, ma kii-makaleleun, tehu mate basan boema, Ama Manek fo'a de na'a-ninu!”

²²Boema, Dauk nataa nae, “Hei, memak nai lelek ni'iana ndia bei naso'da, au oka aong, ma au kii-makaleleun, nana au dodoo ae: Fafa'kama, MANETUALAIN Manakoasa, neukose dalen-na tu'da kasian neu au, fo Ana fe ni'iana ndia naso'da.

²³Tehu besak ia, maten so, de sosoak hata, au oka aong akandoo? Ade, au bisa tao aso'da falik-kana do? Neu mate'en-na te, neukose au boeo, u leo mamanak fo ndia nai mamanak-ka boe, tehu besak ia, neukose ana ta fali ma'in leo au mai so'on.”

²⁴Basa boema, Dauk kokoe-nanasi saon Batsyeba dalen-na, boema ana sungu non. Batsyeba bongi ni'iana touanak esa, de Dauk foin na'de Salomo. MANETUALAIN sue-lai ni'iana ndia,

²⁵de nadenu Nabi Natan-na, fo ana foi ni'iana ndia na'de Yedija, nanahu MANETUALAIN sue-lain.

²⁶Ndia te, Yoab bei natee-nata'ti la'ban Rama, fo nusa Amon kotan-na polon-na, de hihii nae nangatuu-nan so.

²⁷Boema, nadenu hataholi neu leo Dauk neu, fo nafa'dan nae, “Au sapu-a Raba so, de au loso-ala oe nininun-nala so.

²⁸Besak ia, sa'di leo been-na, Ama Manek maloo makabubua, bei ela ita solda'dun-nala, fo boema mauli-malangas soaneu mangatuu-ma kota ndia. No enok ndia, mahani te hataholi-la lafa'da lae, au ta nde angatuu-a kota ndia fa.”

²⁹Boema, Dauk naloo nakabubua basa solda'dun-nala lala'en-na, de leu sapu-la Raba, de ala sengin.

³⁰Dauk ho'in-na ti'ilanga manek-ka, neme sila manen-na langan lain mai, de ana paken. Ti'ilanga manek ndia belan-na, fafa'kama kilo teluhulu lima, ma la'en nenik poemata manahiik. Dauk boeo, ho'i neni bua kakalok makadotok nanseli neme kota ndia mai.

³¹Fe'ek neme ndia mai, ana foo neni laun-nala, de nadenus ho'i leni hoholok, tata'tis, ma taka besi, fo nadenus tao bela-ba'uk nai mamana tao batu bata boe. Laun manai Amon kota fe'en-nala boeo, ana tao taos leondiak boe. Basa ndia boema, Dauk no solda'dun-nala lala'en-na, fali le'us leo Yerusalem leu.