Read Termanu 2 SEMUEL 14 Bible Online

2 SEMUEL 14 - Termanu bible

2 SEMUEL 14

¹Yoab bubuluk nae Mane Dauk-ka, nahiik nanseli nita Absalom,

²hu ndia de, nadenu hataholi neu nala ina dodole da'uk esa, ana leo nai Tekoa. Lelek, inak ndia losa boema, Yoab nafa'dan nae, “Ina muse tao nono'kabai ina susa; fo ina pake bua-lo'a manasusak, ma boso pake mina kaboomenik. Tao sama leo inak fo ana kii dook-ka so, nana mate ina hataholi susuen esa.

³Basa soona, muu leo manek-ka muu, fo mafa'dan mae leo ia.” Boema Yoab nafa'dan hata fo muse nafa'dan.

⁴Boema, inak ndia neu leo manek-ka neu, de ana senek boema nae, “Au Tuang Fo Mandela-masa'ak, tulu-fali atam-ma dei!”

⁵Boema, manek-ka natanen nae, “Te beek ndia?” Boema inak ndia nataa nae, “Atam ia, inafalu esa, nuu-taa hata-taak. Mate atam-ma saon-na so.

⁶Atam-ma anatoun dua, de faik esa boema, duas lale'a neme mook-ka. Hu kande, ta hapu hataholi neu la'e fas, de esak-ka taonisa tolanoon-na.

⁷De besak ia, atam-ma teidalen-nala lala'en-na, ala musu loo atam-ma, de lakaseti atam-ma, fo daenga atam-ma fe atam-ma ana kanisan ndia, leo sila neu, fo ala hukun nenik huhuku mamates, nana ana taonisa tolanoon-na so. Metema, atam-ma fe ni'iana ndia neu soona, ela ka'da atam-ma, mesa-mesak-kana so. Ala sanga tao lamopo bei ela au tititi-nonosing ndia, fo mopo atam-ma saon-na na'den-na, ma tititi-nonosin nai daebafak ia poin-na.”

⁸Boema, manek-ka nataa nae, “Fali leona, de'ifo au ito-ato dede'ak ndia.”

⁹Boema inak ndia nae, “Au Tuang Fo Mandela-masa'ak, neukose au Ama Maneng tao su'di beek-ka, tehu atam-ma no atam-ma teidalen-nala nde lu'a-lepa buna-boan; te au Ama Maneng no au Ama Maneng teidalen-nala salan ta.”

¹⁰Manek-ka nataa nae, “Metema, hapu hataholi nakabibiik o soona, moo hataholi ndia leo au mai, soona neu fai makabuin te, neukose ana ta nakabibiik o so'on.”

¹¹Boema inak ndia nae, “Sa'di leo been-na, au Tuan-nga hule-haladoi neu au Ama Maneng MANETUALAIN fo ela hataholi fo, ana sanga balas au anang-nga mamaten ndia, boso nalosak ana tao tatao-nono'i mangalauk lena seluk bai, nenik ana taonisa seluk au anang esak-ka bai.” Boema Dauk nataa nae, “No MANETUALAIN fo maso'dak-ka na'den-na, neukose ala ta tao o anam ndia le'e fa, leomae ala kei la'en ka'da faaanak boeo, ta.”

¹²Boema, inak ndia nafa'da nae, “Au Tuang Fo Mandela-masa'ak, sa'di leo been-na, fe atam-na loak kokolak seluk faa anak dei.” Boema Manek-ka nataa nae, “Hei.”

¹³Boema inak ndia nae, “No au Ama Maneng kokolan ndia de, au Ama Maneng manaku basa nae, au Ama Maneng nde nasala, nanahu au Ama Maneng ta nau fe au Ama Maneng anamanen-na loak, fo ana fali ma'in fa. Tao le'e de, au Ama Maneng tao salak leondiak-ka, soaneu Manetualain anan-nala?

¹⁴Neukose, ita basa-basa-tala manamatek mesa-mesan; nana ita ia, sama leo oe fo po'a henin leo dae lain neu, fo ta hapu aso falik-kana so'on. Manetualain boeo, neukose Ana ta tao naso'da falik hataholi manamate basak-ka so'on; hu ndia de, sa'di leo been-na, au Ama Maneng sanga enok, fo ela hataholi nanatu'u-tapa henik-ka, bisa fali ma'in seluk.

¹⁵Atam-ma mai nataa au Ama Maneng, nanahu hataholi-la lakabibiik atam-ma. Boema, atam-ma dudu'a-dodoo nae, malole lenak atam-ma kokolak no au Ama Maneng no namahehenak, neukose au Ama Maneng sipok atam-ma nonoken ia.

¹⁶Atam-ma dodoo nae, neukose au Ama Maneng namanene fo soi-tefa-na atam-ma neme hataholi fo, ana sanga enok sanga taonisa atam-ma, ma atam-ma anan-na. Ala tutu'u basa, fo ala usi heni ami neme dae fo Manetualain fen neu anan-nala ndia.

¹⁷Atam-ma namahele te'e-te'e, nae au Ama Maneng hehelu-balataan ndia, neukose neni so'da-molek fe atam-ma, nana au Ama Maneng nde been-na, sama leo Manetualain ata nusa so'dan-na, fo ana hapu mete kofe'ek, beek-ka nde malole, ma beek-ka nde mangalauk. Sa'di leo been-na, MANETUALAIN fo au Ama Maneng Manetualain-na, nok au Ama Maneng!”

¹⁸Boema Manek-ka nataa nae, “Au sanga atane o hata esa, fo mataa tunga ndoon-na.” Boema, inak ndia nataa nae, “Au Ama Maneng mafa'dan leona.”

¹⁹Boema, manek-ka nae, “Yoab nde nadenu o-a do?” Inak ndia nataa nae, “No au Ama Maneng maso'dan-na, atam-ma muse nataa au Ama Maneng natatanen-na. Memak tete'ek-ka Ama Manek, Yoab nafa'da basa atam-ma, hata fo atam-ma muse taon, ma atam-ma nafa'dan.

²⁰Tehu ana tao leondiak fo, dede'ak ndia basan no malole. Au Ama Maneng nde been-na manatee-tenok, sama leo Manetualain ata nusa so'dan-na, nalosa ana bubuluk basa hata manada'dik lala'en-na.”

²¹Basa ndia boema, manek-ka naloo Yoab, de nafa'dan nae, “O dale hihiim ndia, neukose au tao atetun. Muu mala Absalom leona, fo moon leo ia mai.”

²²Yoab senek neu Dauk matan-na, boema nae, “Sa'di leo been-na, Manetualain fe Ama Manek, baba'e-papalak! Besak ia, atam-ma bubuluk nae Ama Manek sue-lai atam-ma, nanahu Ama Manek tao natetu atam-ma dokodoen-na.”

²³Boema, Yoab neu leo Gesur neu, fo neu nala falik Absalom leo Yerusalem neu.

²⁴Tehu, manek-ka ta fe Absalom loak ana leo nai uma manek-ka fa. Manek-ka nafa'da nae, “Au ta hii mete matan-na fa.” Da'di, Absalom fali tu'tik leo uman-na neu, de ana ta neu nataa manek-ka fa.

²⁵Absalom nanakoa-nanakiok da'di leo hataholi mata-pana mana'ahik nanseli, nai basa Israel-lala'en-na. Ta hapu hataholi mata makeen-na, lena neme Absalom mai fa. Ta hapu bu'u-ba'ek faaanak boen, mulai neme eidalen-na mai losa langadoo pe'dan-na.

²⁶Langa doon-na, katen-na seli, de teuk esa soona, muse ana ngguten la'i esa, nana name'da langan-na belan-na seli. Langa doon nananggute henik ndia, tunga manek-ka tatain-na soona, belan-na lena neme kilo dua mai.

²⁷Absalom anatoun telu, ma anainan esa mata makeek nanseli, na'de Tamar.

²⁸Absalom leo nai Yerusalem, teuk dua so, tehu beita natongo no manek-ka boen.

²⁹Hu ndia de, faik esa boema naloo Yoab, fo nadenun neu nataa manek-ka, tehu Yoab ta nau mai fa, boema Absalom naloo la'i esa seluk-kana, tehu Yoab ta nau mai boen.

³⁰Basa boema, Absalom nafa'da atan-nala nae, “Emi bubuluk Yoab tinan-na, nai au tinang nanasele gandum-ma, boboan-na hetu? Meu hotu heni tina ndia.” Boema, leu leona, de ala hotu henin.

³¹Boema, Yoab neu leo Absalom uman neu, de natane nae, “Tao le'e de, o atam-mala hotu heni au tinang-nga?”

³²Absalom nataa nae, “Nana nai lelek au aloo o, o ta nau mai fa. Au sanga adenu o, fo muu leo manek-ka muu, fo manduku-malosak au natataneng-nga nde ia nae, ‘Sosoak hata, au la'oela Gesur fo au fali ma'ing-nga leo ia mai? Malole lenak, au leo ka'da naa.’ ” Ma Absalom nafa'da seluk nae, “Sanga enok, fo ela au hapu atongo o manek-ka, fo metema bei nafa'da nae au masalak soona, au sadia basa hukumisa au.”

³³Basa boema, Yoab neu leo Mane Dauk-ka neu, de nanduku-nalosak Absalom dokodoen-na. Boema, manek-ka naloo Absalom, de Absalom mai de ana sene-do'ok neu manek-ka matan-na. Boema, manek-ka sipok-kana nenik dede'ik.