Read Termanu 2 SEMUEL 15 Bible Online

2 SEMUEL 15 - Termanu bible

2 SEMUEL 15

¹Basa ndia boema, Absalom sadia-na kaleta musun esa no ndalan-na, boema hataholi limahulu fo ala tungan.

²Tunga faik, Absalom fo'a fafaianak, fo napadeik neu enok manadeka no uma manek-ka lelesuinan-na. Metema, hataholi sanga neu kalaak dede'an-na neu manek-ka soona, Absalom naloon fo natanen nae, “O leom-ma, leo beek?” Fo metema, hataholi ndia nataa nae, “Au eme leo ia, do leo ndia mai,”

³soona Absalom nafa'da nae, “Tunga hoholo-lalanek-ka soona, o la'en, tehu kasian la'iesak-kana, manek-ka limaboa konan ta, soaneu namanene o kalaam-ma.”

⁴Boema, nafa'da seluk nae, “So'ba, leounik-ka, au da'di manakee-manafula, soona hataholi manamale'a-mapilik do hataholi madede'ak-kala, ala mai leo au mai, fo au aketu dede'an-na, tunga ndoos ma matetuk.”

⁵Metema, hataholi fo ana deka no Absalom fo nakaluku-nakatele neun soona, Absalom look liman-na neu fo ana holu-nan ma ana de'in.

⁶Absalom tao leondiak neu basa hataholi Israel fo sanga neu kalaak dede'an-na leo manek-ka neu; no enok ndia, Absalom hapu ho'i hataholi Israel-la dalen-na.

⁷Basa teuk haa boema, Absalom nafa'da Mane Dauk-ka nae, “Ama, po'i au, fo au u leo Hebron u, fo au tao atetu au hehelu-balataang neu MANETUALAIN.

⁸Nana, nai lelek au bei leo eme Gesur, fo nusak Siria, au aheluk basa, neukose au u sene-do'ok neu MANETUALAIN nai Hebron, metema Ana po'i au fali leo Yerusalem u.”

⁹Boema, manek-ka nataa nae, “La'o no so'da-molek.” Boema Absalom neu leo Hebron neu.

¹⁰Tehu beita neu fa te, nadenu hataholi neni hala heheluk fe basa leo Israel-la nae, “Metema emi mamanene pupuuk-ka liin-na soona, maloo bou-bou leon mae, ‘Absalom da'di manek nai Hebron so!’ ”

¹¹Hataholi natun dua leme Yerusalem mai, ala tunga Absalom leo Hebron leu. Ala ta bubuluk hata-hata la'eneu nakabua makahatuk ndia fa, de basa-basas tunga leondiak mesan.

¹²Boema, Absalom bei tunu-hotu tutunu-hohotuk te, nadenu hataholi neu leo kota Gilo neu boe, fo naloo Ahitofel, fo Mane Dauk-ka hataholi manamanoli-mafa'dan esa. Leondiak, nakabua makahatuk, fo la'ban manek-ka ndia, boetai natea-nahele, ma hataholi manatunga Absalom-ma, boetai lamaba'uk-ka.

¹³Basa boema, hataholi maneni halak esa, nafa'da Dauk nae, “Hataholi Israel-la, look Absalom so.”

¹⁴Boema, Dauk nafa'da basa hataholi mana'a ngga'din-nala nae, “Mai fo talai leo mamana fe'ek teu. Ka'da no enok ndia mesak-kana, ita hapu taso'da teme Absalom mai. Ta dook-ka so'on te, neukose ana mai. Lai-lai leona, fo boso nalosak ana usi dai ita, fo ana sengi ita, nalosa ana taonisa basa laun manai kota lala'en-na!”

¹⁵Boema, lataa lae, “Hei, Ama Manek. Ami maheheleaom basa, soaneu tao beek boe, fo Ama Manek nahiik-kana.”

¹⁶Boema, manek-ka no teidalen-nala lala'en-na, ma hataholi mana'a ngga'din-nala, ala la'o, tehu ana la'oela sao makahatun sanahulu, fo lanea uma manek-ka.

¹⁷Nai lelek manek-ka no basa hataholi manatungan-nana, ala la'oela kota boema, ala hahae deka loo uma mate'ek-ka.

¹⁸Basa manek-ka hataholi mana'a ngga'din-nala lapadeik lai manek-ka boboan-na, nai lelek manek-ka solda'du manamanean-nala la'ok lakadadalak tunga matan-na. Ma solda'du natu ka neek fo manatungan neme kota Gat-ta mai, ala la'ok lakadadalak nai matan-na boe.

¹⁹Manek-ka nita boema, nafa'da Itai, fo solda'du natu ka neek sila mauli-malangan-na nae, “Tao le'e de, o tunga ami boe? Malole lenak, o fali mu'um-ma, fo leo moo mane beuk-ka. Ade, o ta nde hataholi nusa dea, fo o leo nai dook-ka neme o nusam-ma mai hetu?

²⁰O leo nai ia, beita dook-ka fa, de masa bole au adenu o fo o tunga maleu-malaak moo au? Au boeo ta bubuluk, neukose au u leo bee u fa. O, ma o tia-laim fo emi leoina esa boe, fali me'um-ma leona, fo sa'di leo been-na, MANETUALAIN sue-lai emi, ma Ana lilineka no emi.”

²¹Tehu Itai nataa nae, “Ama Manek fo mandela-masa'ak, no MANETUALAIN fo maso'dak-ka na'den-na, ma no au Ama Manek maso'dan-na, au Ama Maneng neu leo bee neu boeo, neukose atam-ma tunga, leomae nasasalematak no mamates-sa boe.”

²²Dauk nataa nae, “Hei, tutulumatak makandoo!” Boema, Itai la'ok sama-sama no solda'dun-nala loo basa sila teidalen-nala lala'en-na.

²³Basa laun-na, ala kii de ala dolaheni basa halan-nala, nai lelek Dauk solda'dun-nala la'o ela kota. Basa boema, manek-ka no basa solda'dun-nala lena leo Leeanak Kidron-na selik leu, de leu leo moo solokaek-ka leu.

²⁴Imam Zadok, imam Abyatar, ma basa hataholi Lewi manandolo MANETUALAIN Peti Hehelu-balataan-na, lai ndia. Ala pe'da Peti Hehelu-balataak ndia de ala ta ndolo fan, losa laun-na lala'en-na la'oela kota ndia.

²⁵Boema, manek-ka nafa'da Zadok nae, “Meni falik Peti Hehelu-balataak ndia leo kota dale neu. Metema, MANETUALAIN sue-lai au soona, tao leo bee-o, neukose Ana po'i au fali, fo au ita seluk Peti Hehelu-balataak ndia, sama-sama no mamanan leleon-na.

²⁶Tehu metema, MANETUALAIN ta sue-lai au fa soona, au sadia sipok hata fo Ana taon la'eneu au aoinang-nga!”

²⁷Basa boema, manek-ka nafa'da seluk Zadok nae, “Leleko-ma, o anam Ahimaas ma Yonatan fo Abyatar anan-na, fo fali me'um-ma leo kota dale meu, no nee-nee lino-linok.

²⁸Neukose, au ahani deka mamana lelenak leo moo solokaek-ka neu, losa au sipo halak neme emi mai.”

²⁹Boema, Zadok no Abyatar leni falik Peti Hehelu-balataak ndia leo Yerusalem neu, de ala leo leme ndia.

³⁰Basa ndia boema, Dauk o'du heni ta'buein-na, de sama-sama no basa hataholi manatungan-nana, ala nda'e leo Pupuku Setun-na lain leu, boema ala kii ma ala poti ketu langan-nala, fo da'di neu ta'du-tana manasusak.

³¹Lelek Dauk hapu halak nae Ahitofel boeo ana tunga sama-sama nai Absalom nakabua makahatun-na dalek boema, Dauk hule-haladoi nae leo ia, “Ou MANETUALAIN, sa'di leo been-na, fe Ahitofel nanoli-nafa'dan manada'di tak!”

³²Nai lelek Dauk losa pupukuk lain, nai mamanak fo hataholi-a biasa sene-do'ok neu MANETUALAIN boema, tia-lain manalilinekan fo nde Husai, hataholi Arki ndia, sipok-kana. Husai siba'e bua papaken-na, ma ana nggali afu leo langan lain neu.

³³Dauk nafa'dan nae, “Metema, o tunga sama-sama moo au soona, o da'di lelepa mabela esa ba'eneu au.

³⁴Tehu o hapu tulu-fali au, metema o fali mu'um-ma leo kota muu, fo mafa'da Absalom, mae besak ia, o sanga malalau-maoono ndia no lilinekak, sama leo makahulun-na o malalau-maoono basa aman so. No enok ndia, o bisa taom-ma Ahitofel nanoli-nafa'dan lala'en-na, manada'di tak.

³⁵Imam Zadok-ka, ma Imam Abyatar-ra, lai naa boe. Mafa'das basa hata lala'en fo, o mamanenen nai uma manek-ka.

³⁶Ahimaas, fo Zadok anan-na, ma Yonatan, fo Abyatar anan-na boeo, ala tunga sila aman, de lai ndia boe. Ni'iana sila-la nde o madenus ala mai leo au mai, fo lafa'da au basa halak lala'en fo o mamanenen.”

³⁷Boema, Dauk tia-lain fo Husai, fali ne'un leo Yerusalem neu, nandaa no lelek Absalom losa kota ndia boe.