Read Termanu 2 SEMUEL 17 Bible Online

2 SEMUEL 17 - Termanu bible

2 SEMUEL 17

¹Basa ndia boema, Ahitofel nafa'da seluk Absalom nae, “Fe au loak, fo au hele-a hataholi lifun sanahulu dua. Fo le'odae soona, neukose au u usi Dauk.

²Neukose, au u sapu-alan, nai lelek ana sota-mangu, ma aon-na ma'as-sa. Neukose, au tao anggengek-kana, nalosa basa solda'dun-nala lala'en-na lalai. Soona neukose, au taoisa ka'da Dauk mesak-kana.

³Tehu neukose, au fe falik basa solda'dun-nala lala'en-na leo Tuan mai, sama leo manaka'bing inak-ka, ana fali ne'un leo saotoun-na neu. Ade, Tuan nape'da dale nasak ka'da hataholi esa mesak-kana samanen-na fa hetu? Neukose fe'ek-kala, ala ta taos le'e esa boen.”

⁴Absalom no basa mauli-malanga Israel-la sipok nanoli-nafa'dak ndia no malole.

⁵Leomae leondiak boe, Absalom nafa'da nae, “Besak ia, maloo Husai fo ndia hahapun-na leo beek soona, tamanenen leona.”

⁶Lelek Husai mai boema, Absalom nafa'da Ahitofel dale tutuun-na, boema nafa'da nae, “Ade, neukose ami tunga nanoli-nafa'dak ndia do? Metema ta soona, fe hahapu fe'ek bai.”

⁷Boema, Husai nataa nae, “Oek ia, Ahitofel nanoli-nafa'dan ta malole-a fa.

⁸Tao leo bee-o, Ama Manek bubuluk nae Dauk no solda'dun sila-la nde been-na, manamatee-matati palani-la. Sila napalanin-na, sama leo meoasuina manamopo anak-ka. Bai te, Dauk nde been-na, solda'du esa, malelan-na seli, de ana beita sungu hai no solda'dun-nala fa.

⁹Fafa'kama, nai hatematak ia boe, ana bei ke'ke nai leak esa dalek, do nai mamana fe'ek. Da'di, leounik-ka, Dauk sapu-na Ama Manek solda'dun-nala, fo ana taonisa nggelok, soona su'di see fo namanene dede'ak ndia, neukose nafa'da nae Absalom solda'dun-nala kala so.

¹⁰Soona, leomae hataholi palani ta'ti batu, ma hataholi ao makadelek sama leo singa boeo, tao leo bee-o, neukose ana bii boe. Nana basa hataholi Israel-la, ala bubuluk lae Ama Manek aman ndia nde been-na, palani ta'ti batu, ma lae solda'dun-nala nde been-na, matee-mata'ti palani-la.

¹¹Hu ndia de, au nanoli-nafa'dang leoiak: Maloo makabubua basa hataholi Israel-la leme basa nusak-ka lala'en-na mai, fo ela dede'un-na, de'u solokaek manai tasi su'un-na. Boema, Ama Manek nde nauli-nalangas leo natee-natatik dale leus.

¹²Neukose, ita tatongo too Dauk su'di nai bee boe, soona ata sapu-tan, beidai ana beita bubuluk hata fo ana da'di so. Neukose, ta hapu esa nala deak boen, nau Dauk do solda'dun-nala boe.

¹³Metema, nalai leo kota esa dalek neu soona, ita laun-nala lala'en-na, neukose ala ho'i tula-tali fo, ala pa'a-la kota ndia, boema ata lele'a-loloso kota ndia, fo ata bakandebak-kana leo bafak manadekak-ka dalek neu. Neukose, ta ela batu esa boen, nai pupukuk ndia lain fa.”

¹⁴Absalom no basa mauli-malangan Israel-la, lamanene dede'ak ndia boema, lafa'da lae, “Husai nanoli-nafa'dan malole lena neme Ahitofel nanoli-nafa'dan mai.” Memak, MANETUALAIN naketu basa, soaneu Ana taon-na, Ahitofel nanoli-nafa'da malolen ndia ta da'di fa, fo ela susa-soe tuni-ndeni-na Absalom.

¹⁵Basa ndia boema, Husai nafa'da Imam Zadok-ka no Imam Abyatar-ra, Ahitofel nanoli-nafa'dan, ma ndia nanoli-nafa'dan neu Absalom no basa mauli-malangan Israel-la.

¹⁶Husai nae, “Lai-lai! Mafa'da Dauk, fo ela ana boso sungu nai mamana lelenak leo lee selik fo nai moo solokaek-ka. Muse no lai-laik, ana lena leo Lee Yarden-na selik neu. Metema ta soona, no solda'dun-nala lala'en-na, neukose lakalulutuk.”

¹⁷Ndia te, Yonatan, fo Abyatar anan-na, ma Ahimaas, fo Zadok anan-na, bei lahani nai mamanak manadeka no oemata En-Rogel-la, nai kota Yerusalem-ma, su'un-na. Ta lapalani masok leo kota dale leu fa, nana ala bii hataholi-la litas. Sama leo biasa-na, ata inak esa nafa'das halak fo, halak ndia muse nafa'dan neu Mane Dauk-ka.

¹⁸Tehu oek ia soona, sanga tao leondia de, ata touk esa nitas de nafa'da Absalom. Da'di, ala la'o no lai-laik, de leu ke'ke nai laun esa uman-na, nai nggolok Bahurim-ma. Oedolu esa deka no laun ndia uman-na, de ala masok leo oedolu ndia dalek leu.

¹⁹Mano umak ndia, saoinan-na bela si'di esa neu oedolu ndia bafan-na, boema ana nggenge-la gandum neu si'di ndia lain, nalosa ta lita oedolu ndia fa.

²⁰Absalom nadenu hataholi-la leu leo uma ndia leu, de latane inak na'kasa ndia lae, “Ahimaas no Yonatan lai bee?” Boema inak ndia nataa nae, “Besak-ka, ala lena leo lee selik leu.” Ala sanga touana ka duak sila-la, tehu ala ta hapu fas, boema ala fali le'us leo Yerusalem leu.

²¹Ahimaas ma Yonatan kalua leme oedolu ndia dalek mai boema, no lai-laik leu leo Mane Dauk-ka leu, de lafa'dan basa manada'dik sila-la. Lafa'da lae, “Ahitofel fe nanoli-nafa'dak, soaneu sapu-la Ama Manek. Da'di, la'o besak ia boe, fo lena leo lee ia selik muu.”

²²Boema, Dauk no solda'dun-nala lena leo Lee Yarden-na selik leu, de lolebalahaak boema, ala losa lee selik.

²³Lelek Ahitofel bubuluk nae ala ta tunga ndia nanoli-nafa'dan fa boema, ana bela ne'a sa'e ndalan-na neu keledein lain, de ana fali ne'un leo ndia kotan-na neu. Ana pe'da-fua matalolole hata-heton lala'en-na boema, ana lonaaon de maten, de latoin nai teidalen-nala loo-laten.

²⁴Dauk losa Mahanaim, nai lelek Absalom no hataholi Israel-la lena lala Lee Yarden-na selik. (

²⁵Absalom so'u Amasa da'di malanga solda'du, fo ana nggati Yoab. Amasa nde been-na, Yitra, fo hataholi Ismael esa anan-na. Inan na'de Abigail, fo Nahas anan-na, fo nde Yoab inan Zeruya tolanoon-na.)

²⁶Absalom no solda'dun-nala, ofu leme dae Gilead-ta.

²⁷Lelek Dauk losa Mahanaim boema, hataholi manasipok-kana nde Sobi, fo Nahas neme kota Rama nai Amon, anan-na, ma Makhir, fo Amiel neme Lodebar anan-na, ma Barzilai, neme Rogelim mai, fo nai Gilead.

²⁸Leni fe Dauk no solda'dun-nala mango, ulek ma nene'ik, boeo leni gandum, betek, ha'desopuk, gandum nanadalak, fufue pilas, fufue pilas de'e matua, fanioe, keju, kapaoe isik, ma bi'ilopo de'ubee. Ala bubuluk lae Dauk no solda'dun-nala lamala'a, maama'da, ma ala sota-mangu, nanahu leleo-lala'ok manai moo solokaek-ka.