Read Termanu 2 SEMUEL 20 Bible Online

2 SEMUEL 20 - Termanu bible

2 SEMUEL 20

¹ Nai kota Gilead-ta, hapu tou manatao tasibu esa, na'de Seba. Bikri neme leo Benyamin-na mai, anan ndia. Lelek hataholi manatunga Dauk-ka, beenongo mai boema, Seba puu pupuuk-ka, ma naloo bou-bou nae, “Dauk ndia, hataholi fe'ek, de sosoak hata, ita tunga hataholi ndia? Hai hataholi Israel-la lemin, mai fo ata fali teu-tala!”

²Boema hataholi Israel sila-la la'oela Dauk, de leu tunga Seba. Tehu hataholi Yehuda-la lilineka lahele, ma ala tunga Dauk, neme Lee Yarden-na losa Yerusalem.

³ Lelek Dauk losa uma manen-na, nai Yerusalem boema, naloo-na ana la'o ela sao makahatu ka sanahulun-na fo lanea uma manek-ka, de ana fes leo lai uma esa dalek, fo manamanea-la laneas. Dauk nakabobois, tehu ana ta sungu nos so'on. Da'di, inak sila-la pasi fe'e lahele, sama leo inafalu losa mate.

⁴Manek-ka paleta Amasa nae, “Nai faik telu dalen-na, maloo makabubua hataholi Yehuda-la, fo moos leo ia mai.”

⁵Boema, Amasa neu leona, de naloo nakabubuas, tehu ana ta fali ma'i fan, nai faik fo, manek-ka naketuk-ka fa.

⁶Basa boema, manek-ka nafa'da Abisai nae, “Touk fo mana'de Seba ndia, neukose ana tao susa ita, lena neme Absalom mai. Hu ndia de, moo au solda'dung-ngala, fo meu usin, fo ela boso nalosak, nangatuu-na kota-kota makota musuk-kala, ma ana hapu nalai neme ita mai.”

⁷Boema, Abisai nauli-nalanga Yoab solda'dun-nala, ma solda'du manamanea manek-ka, boema basa solda'du fe'ek-kala, de ala la'o leme Yerusalem mai fo leu usi Seba.

⁸Lelek ala losa batu matuaina esa nai Gibeon boema Amasa mai natongo nos. Nai lelek ndia, Yoab pake bua papake natee-natatik, ma ana pa'a tafainan-na no mamanan nai tala'dan-na. Lelek ana la'ok tutulumatak boema, tu'da heni tafaina ndia mamanan-na, de tafaina isin-na koluk leo lima kiin-na neu.

⁹Boema, Yoab nafa'da Amasa nae, “Leo bee, tolanoo?” boema ana ho'u Amasa nggolomein-na nenik lima konan-na, nono'kabai ana sanga de'in.

¹⁰Amasa ta nita tafaina nai Yoab lima kiin-na fa. No kaiboik, Yoab pau tafaina ndia neu Amasa tein-na, nalosa tein-na poka leo deak mai. Maten nai hatematak ndia boe, de Yoab ta paluu pau seluk-kana so'on. Boema Yoab no fa'din Abisai, usi lakandoo Seba.

¹¹Yoab solda'dun esa napadeik deka Amasa popolan-na, de naloo bou-bou nae, “See nok Yoab no Dauk soona, tunga Yoab leona!”

¹²Amasa popolan fo nadiu-nalou daak ndia, lee-lee nai enok-ka tala'da heon. Na'kasa Yoab solda'dun ndia, nita basa hataholi manala'ok tunga ndia, late'e leme ndia. Hu ndia de, ana loso neni Amasa popolan-na leo tina dale neu, de ana lalaa ketun nenik lafa.

¹³Lelek ko'o heok popolak ndia neme enok lain mai boema, basa hataholi-la la'ok lakandoo leu tunga Yoab, fo ala usi Seba.

¹⁴Seba la'ok tunga la'iesak leo Israel-la nusan-na, boema no basa Bikri teidalen-nala losa kota Abel-Bet-Maakha.

¹⁵Yoab solda'dun-nala lamanene lae Seba nai ndia boema, lakahapi-la kota ndia. Ladodou dae okofeo papala nanadama deak-ka, de ala mulai kali dae manai papala nanadamak ndia huun-na, fo suekande ala tao latu'un.

¹⁶Ina manatee-tenok esa nai kota ndia; inak ndia napadeik neu papala nanadamak ndia lain boema, naloo bou-bou nae, “Mamanene! Mamanene! Moke leona, fo ela Yoab mai leo ia mai; au hii kokolak on.”

¹⁷Boema, Yoab mai de inak ndia natane nae, “Yoab nde Tuan do?” Yoab nataa nae, “Hei.” Boema, inak ndia nae, “Tuan, mamanene au hala-kokolang ia-la.” Yoab nataa nae, “Hei, au amanene.”

¹⁸Boema inak ndia nafa'da nae, “Makahulun-na, hataholi-la biasa lafa'da lae leo ia, ‘Metema, o paluu natutu'duk soona, muu leo kota Abel-la muu’ — te sila tataon-na nde ndia.

¹⁹Ami nusam Abel ia matuaina, kota esa nee-nee lino-linok, ma manalilinekak nai dae Israel ia. Tao le'e de, Tuan sanga enok fo tao makalulutuk-kana? Tuan nahiik tao nakalulutuk MANETUALAIN daen-na do?”

²⁰Boema Yoab nataa nae, Ta, makandondook! Au ta anuu dudu'ak tao alutu, do tao akalulutuk o kotam-ma fa!

²¹Ami dale tutu'um-ma ta leondiak fa. Tehu hataholi esa na'de Seba, fo Bikri anan-na, neme nggolo letelepak Efraim-ma mai, ana lena-la'ban basa Mane Dauk-ka paletan-na so. Fen mai leona, soona neukose au la'o eme kota ia mai. Boema, inak ndia nafa'da nae, “Neukose ami tapa hataholi ndia langan-na neme papala nanadamak ia lain leo Tuan neu.”

²²Boema ana la'o, de no dodole da'un-na, nanduku-nalosak ndia dudu'an ndia neu laun manai kota ndia. Basa ndia boema, ala te'te-la Seba langan-na, de ala tapan leo Yoab neu. Basa boema, Yoab puu pupuuk-ka, de solda'dun-nala la'oela kota ndia, de esa-esak fali ne'un leo uman neu. Yoab boeo fali ne'un leo Yerusalem neu, fo neu nataa manek-ka.

²³Dauk so'u manapaleta manai lain-nala nde ia: Solda'du Israel-la lala'en-na, malanga solda'du matuainan-na nde, Yoab. Solda'du manamanea Dauk-ka, malangan-na nde, Benaya, fo Yoyada anan-na.

²⁴Mandool bela nusak-ka nde, Adoram. Hataholi manape'da nusak-ka tali-doin nde, Yosafat, fo Ahilud anan-na.

²⁵Nusak-ka hataholi manasulak susulan-na nde, Seya. Imam-ma nde, Zadok ma Abyatar.

²⁶Imam manai uma manek-ka nde, Ira, fo neme kota Yair-ra mai.