Read Termanu 2 SEMUEL 24 Bible Online

2 SEMUEL 24 - Termanu bible

2 SEMUEL 24

¹MANETUALAIN namanasa seluk Israel, boema Ana fufu'di-oodok Dauk no dudu'ak, fo ela neni toto'a-sosotak fe leoina ndia. MANETUALAIN nafa'dan nae, “Leke hataholi Israel-la ma hataholi Yehuda-la dede'un-nala.”

²Boema, Dauk nafa'da Yoab, fo solda'dun-nala malanga matuainan-na nae, “Sama-sama moo o malanga solda'du matuainam-mala, meu leo basa leo Israel manai nusak-ka lala'en-na, fo leke laun-na dede'un-nala. Au hii bubuluk laun-na dede'un-na.”

³Tehu Yoab nafa'da manek-ka nae, “Leo been-na, Ama MANETUALAIN-na, tao namade'u laun Israel-la, la'i natun esa, neme dede'un besak ia mai, ma sa'di leo been-na, Ama Manek bei naso'da, fo ela Ama Manek hapu nitan. Tehu, sosoak hata, Ama Manek hii leke laun-na dede'un-na ia?”

⁴Tehu manek-ka ho'u nahele paletan ndia. Da'di, Yoab no malanga solda'du matuainan-nala, leu leke leoina Israel-la, dede'un-na.

⁵Ala lena lala Lee Yarden-na selik boema, Yoab no solda'dun-nala ofu leme Aroer boboan kona, fo kota esa nai bafak manai Gad-a, tala'da heon. Ala la'ok leme ndia mai de leu leo kii leu, fo nai Yaezer,

⁶boema, lakandoo leo Gilead leu, de leu leo Kades leu, fo nai hataholi Het-tala daen-na. Basa boema, leu leo Dan-na leu, boema leme Dan mai de ala lepos leo muli leu, fo leo Sidon leu.

⁷Leme ndia mai, de leu leo kona leu, fo leo Tirus leu, fo kota makota musuk ndia. Basa boema, ala la'ok lakandoo leo basa hataholi Hewi ma hataholi Kanaan-nala kotan-nala leu, de mate'en-na, ala leo Bersyeba, fo nai Yehuda boboan kona.

⁸Ala la'ok okofeo basa nusak-ka lala'en-na, nai bulak sio faik duahulu dalen-na. Basa ndia boema, ala fali ma'is leo Yerusalem mai,

⁹de lafa'da manek-ka, sila leke laun ndia, dede'un-na. Basa touk fo landaa ho'u tafa-sisilo, lifun natun fali nai Israel, ma lifun natun lima, nai Yehuda.

¹⁰Tehu lelek Dauk leke basa leoina ndia dede'un-na boema, name'da nasala, de nafa'da MANETUALAIN nae, “Ou MANETUALAIN, au asala-asingo anseli so. Fe do'o do ampon neu au, nana au tatao-nono'ing ndia, nggoak nanseli.”

¹¹MANETUALAIN nafa'da Nabi Gad, fo ana da'di lelete neu Dauk ma MANETUALAIN nae, “Muu leona, fo mafa'da Dauk mae, Au fen ana hele dede'ak telu. Ana hele su'di beek-ka boe, soona neukose Au tao atetun.” Balahaa, fo nai lelek Dauk sungu fo'a boema,

¹³Gad mai de nafa'dan, MANETUALAIN paletan ndia nae, “Ama Manek helek-ka, nde beek-ka: Soe la'a-ndoes-sa tuni-ndeni-na nusak ia, nai teuk telu dalen-na, do Ama Manek nalai, hu kande musu-a usi nahele Ama Manek, nai bulak telu dalen-na, do he'di-laus la'e nusak ia, nai faik telu dalen-na? Besak ia, Ama Manek ho'i nakeketuk leona, fo beek kande, au muse anduku-alosak-kana neu MANETUALAIN.”

¹⁴Boema, Dauk nataa nae, “Awii! Au soe so! Tehu neme hataholi daebafak huku au, malole lenak MANETUALAIN huku ita basa-basa-tala, nana susue-lalain ba'un-na seli.”

¹⁵Boema, MANETUALAIN fe he'di-laus neu hataholi Israel-la, mulai neme fafaik ndia losa faik fo Manetualain naketu basak-ka so. De mate hataholi liun hituhulu nai basa Israel-lala'en-na.

¹⁶Boema, MANETUALAIN ata nusa so'dan maneni mamates ndia, ana losa nai Arauna, fo hataholi Yebus ndia, mamana po'de gandum-ma so. Lelek MANETUALAIN nita ata nusa so'dak ndia naheheleaon basa, fo ana tao namopo-namate Yerusalem boema, MANETUALAIN dodoo nasafali seluk nakeketun-na, de Ana hahae huku leoina ndia. Nafa'da ata nusa so'dak ndia nae, “Dai so! Mate'e leona!”

¹⁷Dauk nita ata nusa so'dak fo manataonisa laun-na ndia, boema nafa'da MANETUALAIN nae, “Au nde asala-asingo, nana au nde tao sala-singok ndia. Tehu leoina manahapu soe ndia, sala beek? Huku au ma au teidaleng-ngala!”

¹⁸Nai faik ndia boe, Gad neu leo Dauk neu, de nafa'dan nae, “Ela leo been-na, Ama Manek kae leo Arauna mamana po'de gandum-ma neu, fo mapadedeik mei tunu-hotuk ba'eneu MANETUALAIN.”

¹⁹Boema Dauk la'o leona, nandaa no MANETUALAIN paletan fo nanduku-nalosak-kana neun tunga Gad.

²⁰Lelek Arauna titino leo dae neu, te nita Dauk no basa hataholi manatungan-nana, ala mai fo latongo loon. Boema, Arauna sene-do'ok neu Dauk matan-na,

²¹de natane nae, “Ama Manek mamain ia, sosoan-na hata?” Boema, “Dauk nataa nae, Soaneu asa mamana po'de gandum ia, te au sanga apadedeik mei tunu-hotuk ba'eneu MANETUALAIN nai ia, fo ela he'di-laus ia nate'e.”

²²Arauna nafa'da nae, “Ama Manek asa-man, fo tunu-hotu fe MANETUALAIN hata fo Ama Manek dodoo-nana, malole. Sapi-la nde ia, soaneu tutunu-hohotu nanatunuk, ma soaneu ai ha'i-a soona, Ama Manek bole pake luku-a ain-nala, ma popo'de gandum-ma, papan-nala.”

²³Arauna fe basa sila-la leo manek-ka neu, boema nafa'da nae, “Sa'di leo been-na, Ama Manek MANETUALAIN-na, sipok Ama Manek tunu-hotun.”

²⁴Tehu manek-ka nataa nae, “Bosok! Au nau asa alan. Nana, au ta nau tunu-hotu fe au MANETUALAING Manakoasang-nga, hata esa fo au hapu hiik-kana fa.” Boema, Dauk asan-na mamana po'de gandum ndia, no sapi sila-la, nenik doi fulak limahulu.

²⁵Boema, Dauk napadedeik mei tunu-hotuk, ba'eneu MANETUALAIN nai mamanak ndia, de ana tunu-hotu tutunu-hohotu nanatunuk, boema tutunu-hohotu mole-dame. MANETUALAIN sipok Dauk huhule-haladoin, boema he'di-laus ndia nate'e nai Israel.