Read Termanu 2 SEMUEL 3 Bible Online

2 SEMUEL 3 - Termanu bible

2 SEMUEL 3

¹Saul teidalen-nala solda'dun-nala, loo Dauk teidalen-nala solda'dun-nala, latee-lata'ti lakandoo. Dauk boetai natea-nahele, tehu musu noon-na, boetai lakama'a.

²Dauk anamanen fo bongis lema Hebron-na, nanasulak tunga fai bobongin-nala nde ia: Amnon. Inan nde Ahinoam, neme Yizreel mai.

³Kileab. Inan nde Abigail, fo Nabal manamatek-ka saon-na, neme Karmel mai. Absalom. Inan nde Maakha, fo Mane Talmai neme Gesur mai, anafe'on-na.

⁴Adonia. Inan nde Hagit. Sefaca. Inan nde Abital.

⁵Yitram. Inan nde Egla. Bongi anamane ka neek sila-la, leme Hebron.

⁶Dauk teidalen-nala solda'dun-nala loo Saul teidalen-nala solda'dun-nala, bei latee-lata'ti lakandoo, de Abner sanga enok, fo ela koasan-na boetai namatuak-ka, nai Saul solda'dun-nala dalek.

⁷Faik esa boema, Saul anamanen Isyboset, nakasasa'ek dede'ak neu Abner nae, Abner sungu no Saul sao makahatun esa, na'de Rizpa, fo Aya anafe'on-na.

⁸Boema, Abner namanasa nanseli, de nafa'da nae, “Ade, au Ama Maneng-nga, naedaenga au ia, alelesi Saul fo au ook Yehuda do? Neme makasososan mai-a, au lilineka neu Saul, fo Tuan aman, ma au lilineka neu tolanoo ka'a-fa'din, boema tia-lain-nala. Au tulu-fali basa au Ama Maneng so, nalosa Dauk ta bisa sengi fan. Leomae leondiak boe, au Ama Maneng nakamumulu-nakamamaek au, ka'da hu kande dede'a ina-anafe'ok-ka.

⁹ Malole lenak, au tulu-fali Dauk, nakalenak MANETUALAIN helu basa neun nae, neukose Ana ho'in-na nusak ia neme Saul, ma neme tititi-nonosin mai, boema Ana so'u Dauk da'di manek neu Israel-lala'en-na, ma Yehuda. Sa'di leo been-na, Manetualain taonisa au, metema au ta akalala'ok Manetualain hehelu-balataan ndia neu Dauk fa!”

¹¹Isyboset ta hapu nataa dede'ak de'ek esa boen, nanahu ana bii Abner.

¹²Boema, Abner nadenu hataholi neu leo Dauk neu, fo nai lelek ndia, Dauk nai Hebron, neni hala heheluk-ka nde ia nae, “See nde, neukose koasa dae ia? Tao hehelu-balataak moo au leona, soona neukose au tulu-fali au Ama Maneng, fo ela leoina Israel-la lala'en-na, ala look au Ama Maneng!”

¹³Boema Dauk nataa nae, “Hei! Manduku-malosak hala heheluk ia neu Abner mae, Au nau tao hehelu-balataak o o, tehu no nonokek esa nde ia: Metema, o mai mataa au soona, o muse moo Mikhal, fo Saul anafe'on-na leo au mai.”

¹⁴ Basa ndia boema, Dauk boeo nadenu hataholi neu leo Isyboset neu, fo neni hala heheluk-ka nde ia nae, “Ela leo been-na, Tuan fe falik Mikhal, fo au saoinan-nga leo au mai. Nana au sunat hataholi Filistin natun esa, boema au ho'i-a sila mamaen-nala loun-nala de au bae belin-na, de ketun so.”

¹⁵Boema, Isyboset nadenu hataholin esa neu nala falik Mikhal neme saotoun Paltiel, fo Lais anan-na.

¹⁶Tehu Paltiel tunga nahele Mikhal, ma ana kii. Lelek ala losa kota Bahurim-ma boema, Abner nafa'dan nae, “Le'on-na leon, fo ka'da fali mu'um-ma!” Boema, Paltiel fali ne'un leona.

¹⁷Ndia te, Abner nakokolaok no basa lasi-lasik Israel-la nae, “Dook-ka so, emi mahiik Dauk da'di emi manem.

¹⁸Nah, emi fai loam ndia, ana losa nde ia so. Mafandendelek te, MANETUALAIN helu basa neu Dauk, nae neukose Ana pake Dauk, soaneu soi-tefa Anan Israel neme hataholi Filistin-nala mai, ma neme basa musu fe'e-fe'en-nala mai.”

¹⁹Abner boeo, nakokolaok no hataholi Benyamin-nala, de basa boema, neu leo Hebron neu boe, fo nafa'da Dauk, hataholi Benyamin-nala, ma hataholi Israel-la lakaheik basan ndia so.

²⁰Lelek Abner no solda'dun duahulu fo leu lataa Dauk nai Hebron boema, Dauk tao fes feta.

²¹Basa ndia boema, Abner nate'a fo ana sanga fali boema nae, “Fe au loak fo au la'o, fo au u hoka basa hataholi Israel-la lala'en-na, fo ela lakabubua loo au Ama Maneng. Neukose ala sipok Tuan da'di manek, de no enok ndia, neukose au Ama Maneng paleta basa nusak-ka lala'en-na, fo nandaa no au Tuang-nga dale hihiin-na.” Basa boema, Dauk po'i Abner la'o, de Dauk nanea Abner so'dan-na.

²²Abner la'o boema, Yoab no Dauk solda'dun nggelok, fali ma'is leme musu dale mai, de leni bua-lo'a kakalok makadotok.

²³Yoab hapu halak, nae Abner mai nataa Mane Dauk-ka so, de Mane Dauk-ka po'in la'o no nanea so'dan-na.

²⁴Boema, Yoab neu nataa manek-ka de nafa'dan nae, “Ama Manek tatao-nono'in leo beek ndia? Abner mai nataa Ama Manek so. Tao le'e de, Ama Manek po'in ana la'o, no ka'da leondiak mesan?

²⁵Tao leo bee-o, Ama Manek bubuluk nae Abner mamain ndia, ka'da soaneu ana ke'di-ndiu Ama Manek, ma soaneu ana bubuluk, Ama Manek heo-hilun ma dale tutu'un lala'en-na.”

²⁶Yoab la'o neme Dauk mai boema, ana nadenu hataholi neu naloo Abner. Ala tunga Abner losa deka no oedolu Sira, boema loo falik-kana. Dauk ta bubuluk basa manada'dik sila-la fa.

²⁷Abner losa Hebron tutik-ka, Yoab lelekon leo boboak neu, deka no lelesuina, nono'kabai, ana sanga kokolak non dede'a nafufunik esa. No kaiboik, Yoab pau tafainan-na neu Abner tein-na, de maten. Yoab taonisa Abner, soaneu ana balas nape'da dalen-na neu Abner, nana ana taonisa fa'din Asael so.

²⁸Lelek Dauk namanene manada'dik ndia boema, nafa'da nae, “MANETUALAIN bubuluk nae au ma au laung-ngala, ta masala faa anak boen, nai manada'dik kanisak neu Abner ndia dalek fa.

²⁹Nemen-na, fo huku Yoab no teidalen-nala, hu kande tatao-nono'in ndia. Sa'di leo been-na, nai Yoab teidalen-nala dalek, neme bobongik leo bobongik neu, hapu hataholi, ana hapu he'di lou mangalauk tataas esa, do touk be'i-balakai tak, do maten nai natee-natatik dale, do ala to'a-taa nana'a-nininuk.”

³⁰Yoab no fa'din Abisai, ala balas nape'da dalen-na leondiak neu Abner, nanahu Abner taonisa sila fa'din Asael, nai natee-natatik dale neme Gibeon.

³¹Basa boema, Dauk paleta Yoab no solda'dun-nala, fo ela ala siba'e sila bua papaken-nala, ma ala pake tema susa, boema ala kii-makaleleu Abner. Ma nai lelek ala ndolo kopak-ka fo leu latoi, Mane Dauk-ka mesak-kana la'ok nai kopak-ka dean-na.

³²Latoi-latono Abner nai Hebron, de manek-ka, boema basa laun-na lala'en-na, ala kii-makaleleu lapane'e nai lates ndia.

³³Basa ndia boema, Dauk makaleleu soaneu Abner nae, “Ade, Abner muse maten da'di leo hataholi nggoak-panganaa do?

³⁴Liman-na, ta nanapa'ak, ma ein-na ta nanalangek fa. Ana mate no nanapauk, neme hataholi mangalauk, ma dale susue-lalai tak-ka mai.” Boema, basa laun lala'en-na, boetai kii-makaleleu Abner no lapane'e seluk halan-nala.

³⁵Nai faik katemak esa dalen-na, hataholi-la sanga enok, fo ala kokoe Dauk, fo daenga na'a faa anak, tehu ana soo nae, “Sa'di leo been-na, Manetualain taonisa au, metema au u'a-inu te, le'do beita tenak fa!”

³⁶Laun-na lamanene dede'ak ndia, boema lamahoko. Memak, Mane Dauk-ka tao su'di beek-ka soona, taon-na laun-na dalen-nala lamahoko.

³⁷Nai faik ndia, basa Dauk laun-na lala'en-na, ma basa leoina Israel-la lala'en-na bubuluk, lae kanisak la'eneu Abner ndia, manek-ka dale tutu'un ta ndia fa.

³⁸Manek-ka nafa'da basa hataholi mana'a-ngga'din-nala nae, “Ade, emi ta bubuluk mae nai faik ia, mauli-malangan matua esa, ana kono-monu nai Israel so do beik?

³⁹Leomae au ia, manek fo Manetualain nde hele-a, tehu besak ia, au ame'da, au akama'a. Zeruya anan sila-la, ala tao hata esa, ta no dale susue-lalaik makandondook fa. De au ta paleta abe'i fas. Sa'di leo been-na, MANETUALAIN huku hataholi manatao tatao-nono'i mangalauk sila-la, nandaa no sila tatao-nono'in!”