Read Termanu 2 SEMUEL 6 Bible Online

2 SEMUEL 6 - Termanu bible

2 SEMUEL 6

¹Basa boema, Dauk naloo seluk solda'du neulaun manai Israel-la, fo lakabubua. Dede'un-na, hataholi lifun teluhulu.

² Nauli-nalanga hataholi sila, de leu leo Baale-Yehuda leu, fo leu ho'i-la Peti Hehelu-balataak-ka neme naa mai. Peti Hehelu-balataak fo loken nenik MANETUALAIN na'den-na, fo nangatuuk nai mahahae nusa so'dak-kala lain (kerub).

³ Ala ho'i Peti Hehelu-balataak ndia, neme Abinadab uman-na nai pupukuk lain, de ala fuan neu nggalobak beuk dale. Boema Uza ma Ohio, fo Abinadab anan-nala, ala tunga nggalobak ndia; Uza la'ok nai boboan-na,

⁴ma Ohio la'ok nai uluk.

⁵Dauk ma basa leoina Israel-la lala'en-na, ala la'ok nai Peti ndia uluk, boema ala foti-longe su'di bebe'ik, ma lakamee, fo ala fe ha'da-holomata neu MANETUALAIN. Lakaminak kecapi, gambus, rebana, kelentingan, ma simbal.

⁶Lelek ala losa Nakhon mamana po'de gandum-ma boema, sapi-sapi manahela nggalobak ndia, lakatunu, boema Uza ho'u nahele Peti Hehelu-balataak ndia, fo ela boso tu'da henin.

⁷Nai hatematak ndia boe, MANETUALAIN namanasa Uza, nanahu tatao-nono'in ndia, nalupa nakamumulu-nakamamaek esa neu MANETUALAIN. Boema, Ana taonisa Uza neme mamanak ndia, deka no Peti Hehelu-balataak-ka.

⁸Boema, mulai neme hatematak ndia mai, loke mamanak ndia lae, Peres Uza. Dauk namanasa, nanahu MANETUALAIN tao namopo-namate Uza.

⁹Tehu Dauk bii MANETUALAIN boe, de nafa'da nae, “Tao leo beek fo, au bisa ho'i uni Peti Hehelu-balataak ia?”

¹⁰Hu ndia de, ana ta nau neni Peti Hehelu-balataak ndia, leo Yerusalem neu so'on, de ana pe'dan neme Obed-Edom, fo hataholi Gat ndia, uman.

¹¹ Peti Hehelu-balataak ndia, nahele neme ndia, bulak telu dalen-na, de MANETUALAIN fe baba'e-papalak neu Obed-Edom no teidalen-nala.

¹²Mane Dauk-ka namanene, lae MANETUALAIN fe baba'e-papalak neu Obed-Edom teidalen-nala, ma hata-heton lala'en-na, nanahu Peti Hehelu-balataak ndia. Boema, neu leo Obed-Edom uman neu, de ana ho'in-na Peti-a, fo ana lali heok-kana leo Yerusalem neu, de ana tao feta matuaina.

¹³Lelek hataholi manandolo Peti Hehelu-balataak ndia, ala nggani, nggani eik nee so boema, Dauk nadenus fo late'e. Boema, ana tunu-hotu fe MANETUALAIN tutunu-hohotuk, fo nde sapi mane ma sapiana maao.

¹⁴Basa boema, Dauk foti-longe no namahokok nanseli, fo ana fe ha'da-holomata neu MANETUALAIN. Nai lelek ndia, ana pake ka'da si'di abalutu keke'uk, de ana pa'an nai tala'dan-na.

¹⁵Enon-na leondiak, Dauk no basa laun Israel-la lala'en-na, ala lali heok Peti Hehelu-balataak ndia, leo Yerusalem neu, no eeki-natadalek ma pupuu liik.

¹⁶Lelek fo leni Peti Hehelu-balataak ndia, masok leo kota dale neu, Mikhal, fo Saul anafe'on-na, ana titino neme jendela mai, boema nita Mane Dauk-ka nakaboboku, ma ana foti-longe, fo ana fe ha'da-holomata neu MANETUALAIN, boema ana mete Dauk soona, ana ta hii mete fan.

¹⁷Peti Hehelu-balataak ndia, nanape'dak nai mamanan-na, nai Dauk tao fe Peti ndia lalaa temak-ka dalek. Basa boema, Dauk tunu-hotu fe MANETUALAIN tutunu-hohotu nanatunuk, ma tutunu-hohotu mole-dame.

¹⁸Boema, ana fe laun Israel-la, baba'e-papalak nenik MANETUALAIN Fo Manakoasa, na'den-na.

¹⁹Basa boema, ana baba'e fe basa-basas nana'ak. Basa hataholi manai sila-la, nau touk do inak boe, ana fe esan-na, paa nanadalak biak esa, loti ma koki kismis. Basa ndia boema, basa-basas fali le'us leo esa-esak uman neu.

²⁰Nai lelek, Dauk fali ne'un leo uma manek-ka neu, fo nate'a teidalen-nala boema, Mikhal kalua mai leo Dauk mai, de nafa'da nae, “Faik ia, mane Israel-la te'e-te'e, tao-na aoinan-na nananita-nalelak! Nakahola-la so, sama leo hataholi nggoa-panganaa fo ta nanuu mamaek nai uma manek-ka, hataholi mana'a ngga'din-nala ata inaanan-nala matan fa!”

²¹Boema, Dauk nataa nae, “Au foti-longe, fo au fe ha'da-holomata neu MANETUALAIN, fo manatipa heni o amam no teidalen-nala, boema Ana hele au da'di mauli-malangan neu Israel, fo anan-nala. Hu ndia de, neukose au foti-longe akandoo, fo au fe ha'da-holomata neu MANETUALAIN.

²²Nakalenak, au sadia basa, soaneu lakamumulu-lakamamaek au, lena seluk neme nakamumulu-nakamamaek na'kasa. O bole ka'da, mete makamamaek au, tehu na'kasa o seseik ata inak-kala, neukose ala fe ha'da-holomatak neu au!”

²³Mikhal, fo Saul anafe'on ndia, manabongi tak nai fai maso'dan-na dalek.