Read Termanu 2 SEMUEL 8 Bible Online

2 SEMUEL 8 - Termanu bible

2 SEMUEL 8

¹Basa boema, Dauk sapu-na hataholi Filistin-nala seluk. Ana sengis, de nangatuu-na daen-na.

²Dauk sengi hataholi Moab-pala boe. Nadenus fo langape'uk lakandondoo leu dae lain, boema, metema hapu hataholi telu nai mamanak esa soona, ana taonisa hataholi dua. Da'di, hataholi Moab-pala lakatele neu Dauk, de ala bae bea leo Dauk neu.

³Basa boema, Dauk sengi Mane Hadadezer, fo Rehob anan-na, ana paleta nai Zoba, fo nusak esa deka no Damsyik. Nai lelek ndia, Hadadezer bei nai leleo-lala'on dale, fo sanga neu tao matalolole koasan-na neu nusak manadeka no Lee Efrat-ta, langan-na.

⁴Dauk foo neni solda'du manasa'e ndalan lifun esa natun hitu, ma solda'du manala'o eik, lifun duahulu. Ana ke'di ketu basa ndala-la, ei pipiin-nala, tehu ana ela ka'da ndala natun esa, fo ala hela nggalobak musu-la.

⁵Hataholi Siria-la leme Damsyik mai, ala haitua solda'du-la leu, fo ala tulu-fali Mane Hadadezer-ra. Tehu Dauk sengis, de ana taonisa sila solda'dun lifun duahulu dua.

⁶Basa boema, Dauk napadedeik solda'du-la lalaa ofun-nala nai hataholi sila nusan dale, de lakatele neu Dauk, boema ala bae bea leo Dauk neu. MANETUALAIN fe Dauk sengi, su'di nai mamanak bee fo natee-nata'ti.

⁷Dauk loso-na, Hadadezer solda'dun-nala pake babaa fana lilopilas-sala, de nenis leo Yerusalem neu.

⁸Fe'ek neme ndia mai, Dauk boeo, ho'in-na liti makadotok nanseli neme kota Betah ma kota Berotai, fo makahulun-na, Hadadezer koasa kota sila-la.

⁹Mane Tou, fo neme Hamat mai, namanene lae Dauk sengi Hadadezer solda'dun-nala lala'en-na so.

¹⁰Boema, nadenu anamanen Yoram, fo nanduku-nalosak nate'an-na neu Mane Dauk-ka, ma ana kokolak dede'a so'da-molek neu sesengik ndia, nana nasi'a, Hadadezer natee-nata'ti no mane Tou-a. Yoram neni fe Dauk bua palsen lilopilas lilofulak ma liti makadotok.

¹¹Mane Dauk-ka, tunu-hotu la'iesak bua palsen sila-la neu MANETUALAIN fo ala paken nai feta makaluku-makatele dale. Ma ana loso neni bua-lo'a lilopilas ma lilofulak neme Hadadezer, ma neme ana sengi leoina Edom, Moab, Amon, Filistin ma Amalek mai, ana tunu-hotu fes neu Manetualain boe.

¹³ Nai lelek Dauk taonisa hataholi Edom lifunnatun esa sanahulu falu neme Bafak Asin-na, de ana fali ma'in boema, na'den-na boetai nanakoa-nanakiok lena seluk bai.

¹⁴Napadedeik solda'du-la uma ofun-nala, nai basa Edom lala'en-na, boema hataholi Edom sila-la, lakatele neu Dauk. MANETUALAIN fe Dauk sengi nai su'di mamanak bee fo, natee-nata'ti.

¹⁵Enon-na leondiak, Dauk paleta basa Israel-lala'en-na, ma nanea, fo ela ana tao laun-na no matetun-na, ma no malole.

¹⁶Duk so'u hataholi manaho'u paleta manai lain-nala, nde ia: Malanga solda'du matuaina nde: Yoab, fo Zeruya anan-na; Hataholi manasulak susulak nai uma manek-ka, nde Yosafat, fo Ahilud anan-na; Imam-mala nde: Zadok, fo Ahitub anan-na, ma Ahimelekh, fo Abyatar anan-na; Hataholi manasulak susulak nai nusaina dalek nde, Seraya.

¹⁸Solda'du manamanea manek-ka, malangan-na nde, Benaya, fo Yoyada anan-na; Imam-imam manai uma manek-ka, nde, Dauk anamanen-nala.