Read Termanu 1RAJA-RAJA 11 Bible Online

1RAJA-RAJA 11 - Termanu bible

1RAJA-RAJA 11

¹ Mane Salomo-a nahiik no anafe'ok anak nusa dea makadotok. Fe'ek neme mane Masir-ra anafe'on-na, Salomo kabing no ina Het, Moab, Amon, Edom-ma Sidon nala boe.

² MANETUALAIN fe basa paleta nae hataholi Israel-la ta bole sao sese'do-babalik loo leoina sila-la fa, nana neukose hataholi sila tao la hataholi Israel-la sene-do'ok neu lamatua daebafa fe'e kala. Leomae leondiak boe, Salomo kabing no ina nusa dea boe.

³Salomo kabing no anafe'oana manefetoanan-natun hitu, ma sao makahatun natun telu. Saoinak sila-la nde tao la Salomo la'oela MANETUALAIN na,

⁴nalosa nai lelek fo nai fai lasin-na, ala hapu fufu'di-oodok lan fo ana sene-do'ok neu lamatua daebafa fe'ek-kala. Dauk, fo Salomo-aman, lilineka neu Amak, fo MANETUALAIN na, tehu Salomo ta sama leo aman fa.

⁵Salomo sene-do'ok neu Astoret, fo leoina Sidon lamatua daebafa inan-na, ma lamatua daebafa Molokh fo nanamaluak fo leoina Amon-na sene-do'ok-ka.

⁶Leondiak Salomo nasala-nasingo neu MANETUALAIN. Dauk, fo Salomo-aman, tunga MANETUALAIN no dalek-katematuak, tehu Salomo ta leondiak fa.

⁷Nai letek lain fo nai Yerusalem boboan dulu, ana tao mamana sosongo-tatangok soa neu Kamos, fo hataholi Moab ala lamatua daebafan-na, ma soaneu Molokh, fo hataholi Amon nala lamatua daebafan-na — lamatua daebafak-kaduak sila-la nanamaluak.

⁸Salomo tao fe saoina leoina nusa dean-nala mamanak soaneu ala tunu boomenik, ma ala fe tutunu-hohotuk soaneu sila-lamatua daebafan-nala.

⁹La'idua so Amak, fo Israel MANETUALAIN na, natu'du aoinan-na neu Salomo ma Ana fen nasanene'dak nae ana ta bole sene-do'ok neu lamatua daebafa fe'e kala, tehu Salomo ta tunga MANETUALAIN fa. Nakalenak bai, ana la'oela MANETUALAIN, nalosa MANETUALAIN namanasan.

¹¹MANETUALAIN nafa'da nae, “Nanahu no o dalen-nameme'da ma, o la'olena o hehelu-balataam moo Au, ma o ta tunga Au paletang-nga la fa, de neukose Au loso-a nusak ndia neme o mai fo Au fen neu o hataholi mana'a ngga'dim esa.

¹²Leomae leondiak boe, hu kande o amam Dauk de, neukose Au ta tao dede'ak ndia nai o fai maso'da ma dalek fa. Neu tepo-lelek fo o anamanem-ma paleta, besak-ka Au taon.

¹³Tehu Au ta loso-a nusak ndia lala'en-na neme o anam-ma mai fa. Hu kande Au atang Dauk, ma hu kande Yerusalem fo Au taon da'di Au kotang ndia so, de neukose Au ela leo esa soaneu o anamanem-ma.”

¹⁴Boema MANETUALAIN tao na Hadad, fo hataholi esa neme mane Edom-ma tititi-nonosin mai, ana musu no Mane Salomo-a.

¹⁵Nanahu makahulun-na, nai lelek Mane Dauk ka tao na Edom nakatele neun, boema Yoab, fo Mane Dauk ka malanga solda'du matuainan-na, neu leo Edom neu fo natoi-natono ndia hataholi manamate nala. Bulak nee dalen-na no solda'du anan-nala leo leme Edom. Ma nai lelek ndia, ala taolisa basa touk manai naa la.

¹⁷Tehu, Hadad fo nai lelek ndia bei muli-soluk de nalai leo Masir neu, sama-sama no hataholi Edom de'ubee fo aman malalau-maoono nala.

¹⁸Ala la'o leme Midian mai, boema leu leo Paran leu. Nai naa, hataholi fe'ek de'ubee lakabubua loos, boema ala la'o sama-sama leo Masir leu fo latongo loo Mane Masir-ra. Manek ndia fe Hadad uma ma dae fo ana leo, ma ana taoafik so'dan-na neu.

¹⁹Boema Hadad da'di manek-ka tia-lai malolen, nalosa manek-ka fe sao fa'din-na, fo ina manek-ka fa'din-na na'de Tahpenes neu Hadad fo da'di saoinan-na.

²⁰Basa boema, Hadad saoinan ndia bongin-na ni'iana touanak esa de ala foin na'de Genubat. Ina manek-ka nde nakaboboi ni'iana ia, de ana leo nai uma manek-ka sama-sama no manek-ka anatouanan-nala.

²¹Lelek Hadad sipo halak-ka nae Mane Dauk ka ma Yoab, fo Israel malanga solda'du matuainan-na boeo maten so, boema Hadad nafa'da manek-ka nae, “Po'i au fali leo au nusan-namong uu.”

²²Boema manek-ka natane nae, “Te taole'e? Ade o to'a-taa nai ia, de nalosa o nau fali leo o nusan-namom muu?” Hadad nataa nae, “Au ta to'a-taa hata esa boen, tehu po'i au fo au la'o.” Boema ana fali leo nusan-namon neu.

²³Manetualain boeo taon-na Rezon, fo Elyada anan-na, musu no Salomo. Rezon nde been-na, ata fo nalai neme tuan-na, fo nde Mane Hadadezer ra neme Zoba mai.

²⁴Mane Dauk ka sengi hai Hadadezer ia so, ma ana taonisa Hadadezer nono nala leme Siria mai. Nai lelek ndia, Rezon nalai neme Hadadezer mai de naloo nakabubua hataholi-la boema ana da'di malangan-nakabua makahatuk. No nonon-nala leu leo Damsyik leu boema ala leo leme kota ndia. Nai naa, nonon-nala so'un da'di manek nai Siria.

²⁵Sama leo Hadad, mane Rezon boeo musu no Israel nai lelek Salomo fai maso'da na ma ana tao tasibu nai nusak ndia.

²⁶Hataholi fe'ek fo ta tunga paleta fa de ana lena la'ban Salomo-a, nde hataholi mana'a ngga'din esa na'de Yerobeam. Yerobeam ia Nebat anan fo neme kota Zereda nai nusak Efraim-ma. Inan, inafalu so, na'de Zerua.

²⁷La'eneu Yerobeam manatunga paleta taan-na soona, tutuin-na leoiak. Lelek dae manai MANETUALAIN Uman-na boboan kona bei nananadodouk, ma ala tao matalolole kota papala nanadama na te,

²⁸Yerobeam boeo naue-nale'di nai ndia. Lelek Salomo bubuluk nae Yerobeam ue-le'din neulauk ma manggatek, boema ana fen bela-ba'uk soaneu nanea manatao bela nusak-kala nai leo Manasye nusan-na ma leo Efraim-ma nusan-na.

²⁹Faik esa boema Yerobeam kalua neme Yerusalem mai. Nai eno tala'dak fo nai mook-ka, Nabi Ahia mai natongon-no n. Nabi Ahia neme Silo mai, fo nai lelek ndia ana pake ba'du manalu beuk.

³⁰Boema Ahia o'duheni ba'du manalun-na, de ana sisiin da'di neu biak sanahulu dua.

³¹Basa boema nafa'da Yerobeam nae, “Ho'i-ma o soa biak sanahulu, nana Amak, fo Israel MANETUALAIN na, nafa'da o nae leo ia, ‘Neukose Au loso a nusak ia neme Salomo mai, fo Au fe o leo sanahulu.

³²Neukose leo esa nahele no Salomo, hu kande Au atang Dauk, ma hu kande Yerusalem, fo Au hele basan neme basa nusak Israel-la lala'en-na mai fo ana da'di Au kotang.

³³Neukose dede'ak ndia Au taon, nanahu Salomo la'oela Au so, de ana sene-do'ok neu lamatua daebafak-kala, fo nde: Astoret, leoina Sidon na lamatua daebafa inak ka; Kamos, fo leoina Moab pa lamatua daebafan-na; ma Milkom, fo leoina Amon na lamatua daebafan-na. Salomo ta tunga Au hihii-nanaung fa. Salomo ta sama leo aman Dauk fa, fo ana tunga neu Au ma ana tao tunga Au paletang-nga la.

³⁴Leomae leondiak boe, neukose Au ta ho'i a la'iesak nusak ndia neme ndia mai fa. Neukose Au po'ilota kana ana koasan-nai fai maso'da na dalek. Au tao dede'ak ndia, nanahu Au atang Dauk, fo Au hele basan so, ma ana tunga Au hoholo-lalaneng ma Au paletang-nga la.

³⁵Neukose Au ho'i a nusak ia neme Salomo-anamanen-na mai, ma neukose Au fee leo kasanahuluk-kala neu o.

³⁶Tehu Au ela leo esa soaneu ndia, fo ela hapu hataholi esa neme Au atang Dauk tititi-nonosin mai, fo ana paleta soaneu Au nai Yerusalem tataas esa, kota fo Au hele basan da'dileo mamana hule-haladoik neu Au.

³⁷Ma o, fo Yerobeam, neukose Au tao o da'di mane Israel ma Au hii o paleta basa nusak fo o mahiik-kana.

³⁸Metema o sama leo Au atang Dauk fo o tunga Au no dalek-katema tuak boema maso'da tunga Au hoholo-lalaneng, ma tao mamahoko Au daleng-nga nenik tao basa hata fo Au paletan neu o, soona neukose Au ook-ko tataas esa. Neukose Au fe o da'di manek nai Israel. Neukose Au helu memak ae o tititi-nonosim neukose da'di mane Israel nggati o, sama leo hata fo Au tao basan soaneu Dauk.

³⁹Hu kande Salomo nasala-nasingo, de neukose Au huku Dauk tititi-nonosin, tehu ta losa dodoon-na fa.’ ”

⁴⁰Lelek fo halak ndia losa Salomo boema, ana sanga enok fo taonisa Yerobeam. Tehu Yerobeam nalai leo Mane Sisak-ka nai Masir, de ana leo neme ndia losa mate Salomo.

⁴¹Tutui fe'ek la'eneu Salomo, nde la'eneu basa hata fo ana tao-no'in, ma la'eneu malela na, nanasula basak nai Salomo buku tutuin la'eneu Fai Maso'dan-na.

⁴²Salomo paleta nai Yerusalem neu basa Israel-lala'en-na teuk haahulu dalen-na.

⁴³Basa boema maten de latoi-latonon nai Kota Dauk ka. Boema anamanen Rehabeam nggatin da'di manek.