Read Termanu 1RAJA-RAJA 19 Bible Online

1RAJA-RAJA 19 - Termanu bible

1RAJA-RAJA 19

¹Mane Ahab-pa tui saoinan Izebel, basa hata fo Elia taon so, boeo tao leo beek de Elia taonisa basa Baal-la nabin-nala.

²Boema Izebel haitua fe Elia halak-ka nde ia nae, “Sa'di leo been-na basa lamatua daebafa dae bafak kala huku au ma lena-lenak taolisa au, metema balahaa nai li'u sama leo ia, au ta tao o sama leo o tao nabi Baal-la sila-la.”

³Elia bii, boema nalai fo sueka boso taolisan. Elia no atan-na leu leo Bersyeba fo nai Yehuda. Nai naa, ana la'oela atan ndia,

⁴ boema ana la'o eik faik esa dalen-na leo moo solokaek ka neu, de ana hahae neme ai matuaina esa huun-na. Ana nangatuuk neu ndia de nahiik fo ela ana mate leona. Nafa'da MANETUALAIN nae, “Au ta akatatakak seluk so'on MANETUALAIN. Ho'i ma au hahae nga leona. Au ta malole lena neme au bei-ba'i kaing-ngala mai fa!”

⁵Boema nakandondoo ao neu ai ndia huun-na de ana sungu. No kaiboik, ata nusa so'dak esa nalakein ma nafa'da nae, “Fo'a Elia, fo mu'a leona!”

⁶Elia mete okofefeok, boema nita, loti nanatunuk biak esa ma boto oe esa, oe nai dalek deka no langan-na. Na'a ninu leona, boema nakandondoo ao seluk.

⁷Soaneu kala'i duan-na, MANETUALAIN ata nusa so'da na mai nalakein ma nafa'da nae, “Fo'a Elia, fo mu'a leona, fo ela o hapu makatatakak nai leleo-lala'ok manalu dalek.”

⁸Elia fo'a, boema na'a ninu. Boema ana hapu balakaik de ana hapu la'ok faik haa hulu dalen-na leo Lete Sinai fo mamanak Manetualain natu'du aoinan-na.

⁹Nai naa, Elia sungu nai leak dale. Boema MANETUALAIN nafa'dan nae, “Elia, o tao beek nai ia?”

¹⁰Elia nataa nae, “Ou Amak, MANETUALAIN Fo Manakoasa, au aue-ale'di tataas esa ka'da soaneu O mesa ma. Tehu hataholi Israel-la la'olena sila hehelu-balataan neu O a. Ala ofeheni O mei tunu-hotu mala ma ala taolisa O nabi mala. Ela ka'da au mesang-nga, tehu besak ia, ala nau taolisa au!”

¹¹MANETUALAIN nafa'dan nae, “Kalua meme leak ndia dalek mai leon, fo mapadeik masale leo Au mai, nai letek lain.” Boema MANETUALAIN tunga ndia, fo ani matuainan-nakahuluk, nalosa heaba'e pupukuk kala ma lete batu la hea ba'es. Tehu MANETUALAIN ta natu'du aoinan-na nai anin ndia dalek fa. Lelek anin ndia nakamate, boema dae manggengo ka da'di, tehu MANETUALAIN ta natu'du aoinan-na nai dae manggengok ndia dalek boen.

¹²Basa boema, ha'i mai, tehu MANETUALAIN ta nai ha'i ndia dalek boen. Basa ndia boema nee nee-lino lino, boema namanene anin-na filo-filo anak.

¹³Lelek Elia namanene ani manafifilok ndia boema, ana potiketu mata-panan nenik ba'du manalun-na, boema ana kalua de napadeik neu leak ndia bafan-na. Boema halak-ka nanan-namanenek nae, “Elia, o tao beek nai ia?”

¹⁴Elia nataa nae, “Ou Amak, MANETUALAIN Fo Manakoasa, au aue-ale'di tataas esa ka'da soaneu O mesa ma. Tehu hataholi Israel-la la'olena sila hehelu-balataan no O. Ala ofeheni O mei tunu-hotum, ma ala taolisa O nabi mala. Ela ka'da au mesang-nga, tehu besak ia, ala nau taolisa au!”

¹⁵ MANETUALAIN nafa'da nae, “Fali leo moo solokaek manadeka no Damsyik ka! Boema muu leo kota muu, fo po'a mina neu Hazael langan lain, fo da'dileo ta'du-tana ndo ein-na da'di mane Siria.

¹⁶ Tao leondiak boe neu Yehu fo Nimsi anan-na, fo ela ana da'di mane Israel, ma neu Elisa fo Safat neme Abel-Mehola anan-na, fo ela ana da'di nabi nggati o.

¹⁷Su'di see fo Hazael ta taonisa fan, neukose Yehu taonisan, ma sila fo laladeak leme Yehu liman dale mai-a, neukose Elisa taonisas.

¹⁸ Tehu neukose Au soi-tefa ala hataholi Israel lifun hitu, fo nde hataholi fo ala lilineka lahele neu Au, ma ala beita sene-do'ok lita Baal-la doki-dulan fa.”

¹⁹Boema Elia la'o de ana hapu Elisa fo Safat anan-na bei nakauuk. Hapu sapi pasang sanahulu dua, de Elisa mesak-kanan-nakauuk nenik sapi pasang mate'e ka. Lelek Elia la'ok deka Elisa boema, Elia o'duheni ba'du manalun-na de ana ndaen neu Elisa alun lain.

²⁰Boema Elisa la'oela sapi nala de ana usi tunga Elia de nae, “Fe au loak fo au u afa'da au ina-amang dei, fo basa soona neukose au tunga Ama.” Elia nataa nae, “Muu leona. Te au ta kenaka'i o fa.”

²¹Elisa fali leo ha'deoe neu, boema ana do'do sapi nala. Ana pake lange manai sapi-la lesuha'in-na da'di ai ha'i, fo ana tunu-nasu nenik sapi sila paan-na. Basa boema ana baba'e paa sila-la neu ana manatunga dean-nala fo la'a. Basa ndia boema Elisa neu tunga Elia de ana da'di Elia manatulu-falin.