Read Termanu 1RAJA-RAJA 21 Bible Online

1RAJA-RAJA 21 - Termanu bible

1RAJA-RAJA 21

¹Deka no Mane Ahab-a uma manen manai Yizreel-La, hapu osi angol esa, fo manonuu ka na'de Nabot.

²Faik esa boema Ahab nafa'da Nabot nae, “Fe o osi angol la leo au mai, nana osi ndia deka no au uma mane nga. Au ahiik sele uta-aidoo neu ndia. Neukose o hapu osi angol fo malole na lena, da'di neu ngganggati na, do metema o nau soona, au asa an nenik belin-na nandaa.”

³Nabot nataa nae, “Au bei-ba'i kaing-ngala pusakan osi angol ia. No Manetualain na'den-na, au ta bole fen neu Tuan fa!”

⁴Ahab fali ne'un no dalen-na ta tesapopo-tama ma nasak nanahu namanene hata fo Nabot nafa'da neun, boema nangape'uk neu pepe'un lain ma ta nau na'a fa.

⁵Sainan Izebel neu de natanen nae, “Taole'e de o dale ma ta tesapopo-tama fa? Taole'e de o ta nau mu'a fa?”

⁶Ahab nataa nae, “Au daleng-nga ta loak no Nabot fa. Au oken fo ela nase'o ndia osi angol la neu au, do metema anan nau soona, au tukan nenik osi angol fe'ek, tehu ana ta nau fa!”

⁷Izebel nataa nae, “O nde manek nai Israel! Besak ia fo'a fo mu'a leona. Mamahoko leona, nana neukose au fe Nabot osi angol ndia neu o!”

⁸Boema Izebel sulak susulak pake Ahab na'den-na ma nakadiditak segel manek-ka neu susulak ndia. Ana haitua susulak ndia leo mauli-malangan ma lasi-lasi nggolok manai Yizreel-la.

⁹Susulak ndia lii na nae leoia, “Po'a-bengan leon fo ela laun-na okaaon-nala ma madenus fo lakabubua! Nai nakabuak ndia dalek, fe Nabot mamanatutuuk maha'da-holomatak.

¹⁰Madenu hataholi manatao tatao-nono'i mangalauk dua langatuuk lasasalematak loon, fo kalaa kana mae ana soo-supa basa Manetualain ma manek-ka so. Soona moon leo kota deak neu fo tapan nenik batu losa maten!”

¹¹Mauli-malangan ma lasi nggolo Yizreel-La lakalala'ok Izebel paletan ndia.

¹²Ala po'a-bengan fo ela laun-na okaaon-nala. Basa boema ladenu hataholi-la lakabubua, ma ala fe Nabot mamana tutu'uk maha'da-holomata

¹³Hataholi manatao tatao-nono'i mangalauk dua langatuuk lasasalematak loo Nabot, de ala kalaa kanan-nai lea matan lae ana soo-supa basa Manetualain ma manek-ka so. Hu ndia de, loon leo kota deak neu, boema ala tapan nenik batu losa maten.

¹⁴Hala tutuik la'eneu Nabot mamaten-na, landuku-lalosa kana neu Izebel.

¹⁵Izebel namanene hala tutuik ndia tutika nafa'da Ahab nae, “Mate Nabot so. Besak ia muu leona, fo ho'i ma osi angol fo ana ta nau nase'on neu o ndia fa.”

¹⁶Tutika Ahab neu de ana ho'i na osi angol ndia de ana taon da'di ndia nuun leona.

¹⁷Boema MANETUALAIN nafa'da Elia, fo nabi maneme Tisbe ndia mai nae,

¹⁸“Ahab, fo mane Samaria ndia, besak ia nai Nabot osi angol la, fo ana sanga ho'i na osi ndia fo ana taon da'di ndia nuun. Da'di, muu leo naa muu leon,

¹⁹fo mafa'dan mae Au, fo MANETUALAIN nafa'da nae leoia, ‘O manisa so, baite o maseti-mahange bai! Hu ndia de, neukose busa-la lalamemei o daa ma nai mamanak fo busa-la lalameimei Nabot daa na!’ ”

²⁰Lelek Ahab nita Elia boema nae, “Hai musunok konei, Mate'e na o matango moo au!” Elia nataa nae, “Tete'e ka. Hu kande Tuan nakikisak dalen-na, fo tao hata mangalauk nai MANETUALAIN mata memeten-na,

²¹de MANETUALAIN nafa'da Tuan dede'a ka nde ia nae, ‘Neukose Au fe soe a tuni-ndeni-na o. Neukose Au si'uheni o, ma basa touk manai o teidalem-ma dalek, lasik ma mulik, neukose Au tao alas ala sapu-lalo.

²²O teidalem-mala neukose ala da'di sama leo Mane Yerobeam fo Nebat anan-na, teidalen-nala, ma sama leo Mane Baesa, fo Ahia anan-na, teidalen-nala, nanahu o tao ma hataholi Israel-la tao sala-singok so, nalosa o tao mafo'a Au nasa melung.’

²³ Ma la'eneu Izebel, MANETUALAIN nafa'da nae neukose busa la'an nai kota Yizreel-La dalek.

²⁴O teidalem-mala su'di see fo maten nai kota dalek, neukose busa na'an, ma manamatek manai kota deak-ka, neukose manupui la la'an.”

²⁵Beita hapu hataholi fo nakikisak dalen-na ana tao nita tatao-nono'i mangalauk nai MANETUALAIN mata memeten-na, sama leo hata fo Ahab tao-no'i nana fa. Ana tao basa tatao-nono'i mangalauk sila-la no saoinan Izebel fufu'di-oo'don-na.

²⁶Ahab tao sala-singok fo neni mamaek nanseli a nde: ana sene-do'ok neu sosongo-tatangok sama leo hataholi Amori-la tao-no'i ka. Hataholi Amori sila, MANETUALAIN usihenis kalua leme nusa Kanaan-na naik lelek hataholi Israel-la masok nusak ndia.

²⁷Elia kokolak basa boema, Ahab siiheni bua papaken-na de ana pake si'di lafa lapik da'di neu ta'du-tana sale dalek, boema ana okaaon-na. Nai lelek ana sungu, ana pake si'di lafa lapik boeo, ma metema ana la'o-la'o soona, matan-na ka'da masu-masu nakandoo.

²⁸MANETUALAIN nafa'da Nabi Elia nae,

²⁹“O mita basa, tao leo beek fo Ahab nakaloe-nakadae ao na nai Au matang so hetu? Hu ndia de, neukose Au ta fe soe mai, nai lelek bei naso'da. Neu anan-na tepo-lelen besak-ka Au fe soe a tuni-ndeni-na teidalen-nala.”