Read Termanu 1RAJA-RAJA 3 Bible Online

1RAJA-RAJA 3 - Termanu bible

1RAJA-RAJA 3

¹Mane Salomo-a tao Masir da'di ndia tia-lain nenik ana saon-na mane Masir-ra anafe'on-na. Salomo no anafe'oanak ndia leu leo kota Dauk ka neu fo ana lao nai ndia losa uma manek-ka ma MANETUALAIN uman-na boema kota musu manaokofefeo na Yerusalem ma, nananafofo'a basak.

²Nanahu MANETUALAIN Uman-na beita nananafofo'ak nai lelek ndia fa, de laun-na bei fe tutunu-hohotuk boomenik nai pupukuk-kalalain manai mamana mata-matak-kala.

³Salomo sue-lai MANETUALAIN ma ana tunga aman natutu'du nala, tehu ana bei do'do bana ma ana tunu-hotu boomenik nai pupukuk-kalalain manai mamana mata-matak-kala.

⁴Mamana huhule-haladoik fo nananita-nalelak nanseli a nai Gibeon. Nasi'a Salomo fe tutunu-hohotuk makadotok nai naa. Nai faik esa, fo sama leo mandoofai a, neu seluk leo naa neu.

⁵Le'odaek ndia boeo, MANETUALAIN natu'du aoinan-na neun nai me'is dale de nafa'da nae, “Salomo, moke hata fo o mahiik-kana leon, te neukose Au o!”

⁶Salomo nataa nae, “MANETUALAIN, O matu'du basa mae O sue-lai man seli neu au amang Dauk fo O atam ndia. Au amang ndia malole, ana tao tunga ndoon-na boema ana lilineka neu O. Ma da'dileo buti esa nae losa nakandondoohenin, O sue-lai mahelen, ma O fen ana touk esa fo besak ia ana paleta nggatin.

⁷Ou Amak, fo au MANETUALAING-nga, O so'u au da'di manek nggati au amang, leomae au bei muli-soluk nanseli, ma au ta bubuluk eno na tao leo beek fo au akalala'ok paleta fa.

⁸Au da'di O anam nai leoina fo O helek-kala tala'da heon. Sila leoina matuaina esa, fo ta leke-nala dede'un-nala fa.

⁹Hu ndia de, ou MANETUALAIN, ela leo been-na fe au dudu'a-aafi manatee-tenok fo au paluun soaneu paleta O anam ia la no tunga ndoos ma matetuk, ma soaneu au bisa mete kofe'ek bee kande malole ma bee kande mangalauk-ka. Metema ta leondiak fa soona, hapu nai bee au hapu paleta O anam fo matuaina ia la?”

¹⁰Manetualain namahoko nenik Salomo nonoken ndia,

¹¹de nafa'dan nae, “Hu kande o moke dudu'a-aafi manatee-tenok soaneu o paleta no tunga ndoos ma matetuk, te ta fai nalu-le'do loak fa, do su'i-betes soaneu o aoinam-ma mesak-kana, do o musu no mala mamaten-na,

¹²de o nonokem ndia, neukose Au tao atetun. Neukose Au tao a o da'di manatee-tenok ma manatee-tenok lena neme su'di see mai boe, nau nai fai maneu kala do nai fai manamaik-kala.

¹³Lena-lenak hata fo o ta moke fan boeo, neukose Au fen neu o: nai o fai maso'da ma dalek, neukose o mamasu'i ma nanafe ha'da-holomatak lena heni mane fe'ek see boe.

¹⁴Ma metema o sama leo o amam Dauk, fo ana tunga Au boema ana tunga Au hoholo-lalaneng soona, neukose Au fe o fai nalu-le'do loak.”

¹⁵Salomo fo'a boema, name'da nae Manetualain kokolak non nai me'is dale so. Boema ana fali leo Yerusalem neu, boema napadeik neu MANETUALAIN Peti Hehelu-balataan matan-na de ana fe tutunu-hohotu nanatunuk ma tutunu-hohotu mole-dame Basa boema ana tao fe basa hataholi mana'a ngga'din-nala feta.

¹⁶Faik esa boema, ina manasosoa-piao dua mai lataa Mane Salomo.

¹⁷Inak sila-la, esa nafa'da nae, “Ama Manek Fo Mandela-masa'ak, au o inak ia leo nai uma esa. Ta hapu hataholi fe'ek leo nakabubua no ami fa. Faik de'ubee maneu ka, au bongi ni'iana touanak esa. Basa faik dua boema, inak ia boeo bongi ni'iana touanak esa boe.

¹⁹Nai le'odaek esa, lelek ami bei sungu, inak ia ta name'da fa te ana tuni na anan-nalosa maten.

²⁰Fatila'da nai lelek au bei sungu, boema ana fo'a de ana ko'o na au anang-nga neme au boboa nga mai. Nangapepe'uk au anang-nga neu ndia pepe'un lain, ma nangapepe'uk ndia ana manamaten-na neu au pepe'ung lain.

²¹Balahaa fafaik, lelek au fo'a fo au sanga asu'u au anang-nga, te au itan maten so. Lelek au taoafik matalolole neun te se'kona au anang-nga ta nde ndia fa.”

²²Boema inak esak-ka nae, “O masapepeko-masandandali, te au anang-nga nde maso'dak ia, ma o anam-ma nde manamatek ndia!” Boema ina makasososak-ka nataa nae, “O anam-ma nde manamatek ndia, ma au anang-nga nde maso'dak ia.” Leondiak ala lale'a nai manek-ka matan.

²³Boema Mane Salomo nae, “Emi esa-esak manaku mae ni'iana maso'dak ia ndia anam, te ta nde manamatek ndia fa.”

²⁴Manek-ka nafa'da basa nae leondia boema, nadenu hataholi neu ho'i tafaina.

²⁵Basa boema manek-ka paleta fo, “Seseli ba'e ni'iana maso'dak ndia neu dua, fo fe inak sila esa na biak esa.”

²⁶Lamanene dede'ak ndia boema, ni'iana ndia ina bongin-na nae, “Au oke do'o do ampon, Ama Manek, boso taomisa ni'iana ndia. Ka'da fen leo ndia neu.” Inak ndia kokolak nae leondia nanahu ana sue mangalau anan-na. Tehu inak esa ka nafa'da nae, “Hei, ka'da tatin, leon na fo ita dua, esa boso hapun boe!”

²⁷Boema Salomo nae, “Boso taomisa ni'iana ndia! Fen leo ina makasososak-ka neu — te inan nde ndia.”

²⁸Lelek leoina Israel-la lamanene la'eneu Salomo nakeketun nai dede'ak ndia dalek, boema lasamanan ma ala fe ha'da-holomatak neun. Nana, nananitak nae Manetualain fe basan manatee-tenok soaneu tao ndoos ma matetuk.