Read Termanu 1RAJA-RAJA 5 Bible Online

1RAJA-RAJA 5 - Termanu bible

1RAJA-RAJA 5

¹Hiram, fo mane Tirus sa tao tia-laik no Mane Dauk ka tataas esa. Lelek Hiram nama nene nae Salomo da'di manek nggati aman Dauk boema, anan-nadenu hataholi neu leo Salomo neu.

²Boema Salomo boeo haitua hala heheluk-ka nde ia neu Hiram nae,

³“Mane Hiram Fo Mandela-masa'ak. Tao leo bee o Tuan bubuluk mae au amang Dauk no nakasetik natee-natati tataas esa, nanahu nusa-nusak manai ami boboa kaisu mala mai sapu-lan. Ma hu kande MANETUALAIN beita fen ana sengi basa musun-nala fa, de ana ta hapu loak nafofo'a uma fo mamana hule-haladoik neu MANETUALAIN fa.

⁴Tehu besak ia au MANETUALAIN fe basa tetu-tema ka nai basa au nusa paletang-nga la lala'en-na. Au ta anuu musu ma boeo ta hapu susa-soe tuni na au nusang-nga fa.

⁵ MANETUALAIN helu basa neu amang Dauk nae leo ia: ‘O ana manem fo neukose Au so'un da'di manek nggati o a, neukose nafofo'a uma fo mamana hule-haladoi neu au.’ Hu ndia de, Tuan Hiram Fo Mandela-masa'ak, au, Salomo, aketu basa soaneu afofo'a uma ndia.

⁶Tuan bubuluk basa mae nai au laung-ngala dalek, ta hapu manalo'o manatee-tenok ai sama leo Tuan laun-nala fa. Hu ndia de, au dokodoe ela leo been-na Tuan nadenu Tuan hataholin-nala lo'o fe au ai kaiou Libanon. Neukose au adenu au lau ngala leu tulu-falis, ma Tuan naketu basa ngga'di-a ba'ubee soaneu Tuan hataholin sila-la, neukose au bae.”

⁷Hiram namahoko nanseli lelek ana sipo na halak ndia. Naaf'da nae, “Koa-kio MANETUALAIN faik ia, nanahu Ana fe Dauk ana manek esa manatee-tenok nanseli soaneu ana da'di manek neu leoina matuaina ia.”

⁸Boema Hiram haitua fe Salomo natataak-ka nde ia nae, “Au sipo a Tuan hala nonoken-na de au aheheleaong tao atetu Tuan hala nonoken-na. Neukose au sadia ai kaiou Libanon ma ai kaiou biasa fo nandaa no Tuan nonoken-na.

⁹Neukose au hataholing-ngala lakona ai sila-la neme Libanon leo tasi dale neu. Losa ndia soona ala pa'a lakabubua ai momolak sila-la da'di ofaanak fo lii nenis tunga tasi su'u na leo Tuan mamanan-na neu. Losa naa soona, ala se'iheni ofaanak sila-la fo ala fes leo Tuan hataholin-nala fo launu matalololes. Au oke Tuan, fo ela Tuan sadia nana'ak soaneu hataholi-hataholi fo manai au uma mane nga.”

¹⁰Boema Hiram fe Salomo basa ai kaiou Libanon ma ai kaiou biasa fo ana paluu kala.

¹¹Ma soaneu fe hataholi-hataholi manai uma manek-kala la'a ndia, tunga teuk Salomo fe Hiram gandum kilo lifun natun telu duahulu duan-natun lima, ma mina setun nana sese'do tak liter lifun haa natun haa.

¹²MANETUALAIN tao natetu hehelu-balataan de Ana fe Salomo matee-tenok. Nai Hiram ma Salomo dalek, hapu tututi-nanato malole de duas tao hehelu-balataa matea-mahelek.

¹³Mane Salomo-a, ana paleta touk lifun teluhulu leme basa Israel-lala'en-na fo leu tao bela nusak;

¹⁴ ma Adoniram da'di sila malangan-na. Salomo ba'e hataholi sila neu bubuak telu, fo bubuak esa soona hataholi lifun sanahulu. Bubua kateluk sila-la leo langgatiaok fo bulak esa nai Libanon ma bulak duan nai uma.

¹⁵Salomo boeo nadenu hataholi lifun faluhulu soaneu ala fepa batu maneme letek kala, ma hataholi lifun hituhulu soaneu ala lepa batu sila-la.

¹⁶Ana so'u mandoo lifun telu natun telu fo laneas.

¹⁷No paletan-na boe, de ala fepa batu matuaina mana'ahii kala soaneu MANETUALAIN Uma laten-na.

¹⁸Basa Salomo hataholi manatao-no'in ma Hiram hataholi manatao-no'in boema hataholi fo leme Gebal mai a, ala sadia batu ma ai soaneu lafofo'a MANETUALAIN Uman ndia. Tutui na leondiak.