Read Termanu 1RAJA-RAJA 6 Bible Online

1RAJA-RAJA 6 - Termanu bible

1RAJA-RAJA 6

¹Salomo mulai nafofo'a MANETUALAIN Uman-na neu bula Ziw, fo nde bula ka dua, nai lelek ana paleta teuk-ka haa na, fo leoina Israel-la la'oela Masir teuk natun haa faluhulu ndia so.

²MANETUALAIN Uman-na uukun nai dalen-na nde been-na leoiak: nanalu na metel duahulu hitu, loloa na metel sio, ma dedema na metel sanahulu telu senti lima.

³Nai MANETUALAIN Uman ndia so'da na hapu pandopo fo nanalu na metel haa senti lima, loloa na metel sio, de loloa na loa uma ndia boe.

⁴Nai uma ndia papala nanadama na hapu jendela fo namaloa leo dalek neu.

⁵Nai uma ndia buin-na, fo nai papala nanadamak manai deak-ka, ala taok-kama ta'da-ta'da kala okofefeo lan. Hapu ta'dak telu, fo esa soona, dedema na metel dua senti dua.

⁶Nai ta'dak makasososak-ka, kama esa soona, loloa na metel dua senti dua, ma nai ta'da ka dua, metel dua senti hitu, ma nai ta'da ka telu a metel telu senti esa. Ta'dak manai dae a, papala nanadama na kate lena ta'dak manai lai na papala nanadama na, nalosa kama-kama fo nana popo-tamak ndia lolo nala latutik loo MANETUALAIN Uman ndia papala nanadama na, tehu ala ta tao lolo neu papala nanadamak ndia fa.

⁷Balok sila-la ala pake ai kaiou Libanon. Lelesu leo kama-kama nana popo-tamak manai ta'dak dae, nai boboan kona, ma soaneu leo ta'da ka dua ma ka telu a, hapu e'dak manadopelele'uk. Basa boema Salomo tao uma ndia hunun-na. Soaneu uma hunuk ka ana pake papak de nakalele'as sama leo kaiisu dui ka ma ana pake papak ai kaiou Libanon. Lelek MANETUALAIN Uman ndia nananafofo'ak, ta tamanene taka-besi lii na fa, nana batu fo nanapakek soaneu uma ndia nafofo'a na, nanasadia basak nai lelek bei lai mamanan-nala. Leondiak Salomo nafofo'a MANETUALAIN Uman ndia losa basan.

¹¹Boema MANETUALAIN nafa'da Salomo nae,

¹²“Metema o tunga basa Au hoholo-lalaneng ma Au paletang-nga soona, neukose Au tao atetu hata, fo Au helu-balataan neu o amam Dauk so.

¹³Neukose Au leo nai uma fo o mafofo'ak ia dalek, nai Au anang Israel tala'da heon. Neukose Au ta la'oela fas.”

¹⁴Salomo tao nakababasak MANETUALAIN Uman ndia leoiak:

¹⁵Basa papala nanadamak manai dalek-ka nananakatatamak nenik ai kaiou Libanon, mulai neme uma laten-na mai losa hunun-na. Laten-na nanataok neme ai kaiou biasa mai.

¹⁶ Nai uma ndia dalek, fo nai boboan dea ala taok-kama de ala ta'da ba'ek kama ndia nenik papala ai kaiou, fo mulai neme uma laten-na mai losa hunun-na. Kama Malalao-malalafuk nanseli ndia nanalun-na metel sio.

¹⁷Kama manai Kama Malalao-malalafuk nanseli ndia uluk, loken lae, Kama Matuainan-nanalu na metel sanahulu falu.

¹⁸Papala nanadamak manai uma ndia dalek lala'en-na, nananakatatamak nenik ai kaiou Libanon, nalosa papala nanadama ka batu nala ta titas makandondook fa. Ai kaiou nananaka popo-tamak ndia nanabalias nenik doki-dulak nggela boak ma bunga makapela kala.

¹⁹Kama Malalao-malalafuk nanseli fo nanataok nai MANETUALAIN Uman dale ndia, nana sadiak soaneu MANETUALAIN Peti Hehelu-balataan.

²⁰ Kama ndia nanalun, loloan, ma dedema na bekedede'uk fo nde metel bekesiok. Mei tutunu-hohotuk ma nai Kama Malalao-malalafuk ndia matan-na, nanataok neme ai kaiou Libanon-na mai. Nai lelesu masok leo kama ndia neu a, ala lolo dopelele'u namosina lilopilas neun. Basa MANETUALAIN Uman ndia dalen-na lala'en-na fo Kama Malalao-malalafu na ma mei tunu-hotu na boeo, nananakatatamak nenik liliopilas isik.

²³Nai Kama Malalao-malalafuk ndia dalek, ala doki-dulak-la mahahaek nusa so'dak dua, fo nanadoki-dulak neme ai setun na mai. Mahahaek nusa so'dak nanadoki-dulak kaduak sila-la, esa soona dedema na metel haa senti haa hulu;

²⁴fo uuku na ma lupa na matak esa. Esa na nanuu li'dak dua, fo lidak sila esa soona nananalu na metel dua senti dua hulu. Lelak neme nanadoki-dulak-ka esa li'da pe'dan duas leo esa ka li'da pe'dan duas neu a, metel haa senti haa hulu.

²⁷Nanadoki-dulak kaduak sila-la, nanape'da nakadadalak nai Kama Malalao-malalafuk dale, nalosa nanadoki-dulak kaduak sila-la esa-esak li'dan esa koila'e papala, ma li'dan esa ka, lakoi ao nai kama ndia tala'da heon.

²⁸Mahahaek nusa so'da nanadoki-dulak kaduak sila-la nananakatatamak nenik lilopilas.

²⁹Basa papala manai MANETUALAIN Uman dale, nanabalias nenik mahahae nusa so'dak-kala doki-dulan, ai palem mala, ma bunga makapela kala.

³⁰MANETUALAIN Uman-na laten manai dalek ndia lala'en-na nananakatatamak nenik lilopilas.

³¹Nai lelesu masok leo Kama Malalao-malalafuk ndia dalek neu, nanapasak lelesu dook dua neme ai setun na mai. Lelesu ndia bafan manai lai na, nalupa kaiho'ek matane nai tala'da heon.

³²Lelesu dook ka duak sila nanabalias nenik mahahae nusa so'dak nanadoki-dulak, ai palem ma bunga manamakapelak-kala. Lelesu dook, mahahae nusa so'dak nanadoki-dulak, ma ai palem nanadoki-dula kala, basa-basas nananakatatamak nenik lilopilas.

³³Nai lelesu masok leo kama manai uluk-ka, fo nde kama matuaina, alapasak lelesu-a koseng-nga balakak neme ai setun na mai.

³⁴Boeo ala tao la lelesu dook dua neme ai kaiou biasa mai, fo dook kaduak sila-la hapu dikun.

³⁵Lelesu sila-la doo na nanabalias nenik mahahae nusa so'dak nanadoki-dulak, ai palem ma bunga manamakapela kala. Basa doki-dulak sila-la, nananakatatamak nenik lilopilas.

³⁶Nai MANETUALAIN Uman ndia uluk, ala tao uma so'dan. Uma so'dan ndia nanaokofefeok nenik papala nanadama ta'da-ta'dak: nai batu ta'dak telu lain soona, hapu ai kaiou Libanon ta'dak esa.

³⁷Ala tao MANETUALAIN Uman ndia fanderen na ndek bula Ziw, fo nde hataholi Yahudi-la bula ka duan-na, nai Salomo paleta teuk-ka haa na dalek.

³⁸Ma nai bula Bul, fo nde bula ka falu, nai Salomo paleta teuk-ka sanahulu esa na dalek Salomo nafofo'a basa MANETUALAIN Uman ndia fo nandaa no ana tutu'u basa ka so. Uma ndia tatao na na'a teuk hitu.