Read Termanu 1RAJA-RAJA 9 Bible Online

1RAJA-RAJA 9 - Termanu bible

1RAJA-RAJA 9

¹Salomo napadedeik basa MANETUALAIN Uman-na ma manek-ka uma manen-na boema basa hata fo ana tutu'un boema,

² MANETUALAIN natu'du seluk aoinan-na neun, sama leo ana da'di nai Gibeon.

³MANETUALAIN nafa'dan nae, “O hule-haladoim Au amanenen so, ma no uma fo o mapadedeik basan ia, Au aketu ana da'di mamana hehelik soaneu hule-haladoi neu Au losa dodoon-na. Neukose Au taoafik ma anea mamanak ia tataas esa.

⁴Metema o da'di ata neu Au no dale ndoos ma tao tunga ndoon-na sama leo o amam Dauk, ma o tunga Au hoholo-lalaneng ma Au paletang-nga la,

⁵ soona neukose Au tao atetu Au hehelu-balataang neu o amam Dauk ae tititi-nonosin upu-anan-nala, neukose paleta Israel tataas esa.

⁶Tehu metema o do o tititi-nonosim lasadea Au ma ta tunga neu Au hoholo-lalaneng ma paletang-nga la boema o sene-do'ok neu lamatua daebafa fe'e kala,

⁷soona neukose Au usiheni Au anang Israel neme nusak fo Au fe basan neu sila so. Neukose Au boeo la'oela uma ini fo Au aketu basan da'di mamana hule-haladoik neu Au. Neukose hataholi Israel-la nananakamumulu-nakamamaek ma nanahika-humek nai mamanak lala'en-na.

⁸ Uma hule-haladoik ia neukose ana da'di ai-batu madodouk esa, nalosa hataholi manala'ok tunga ndia, neukose ala nggenge ma ala bii-lamata'u lanseli. Neukose lafa'da lae, ‘Taole'e de MANETUALAIN tao leondiak soaneu nusak ma uma ia?’

⁹Boema neukose hataholi nataa nae, ‘Nanahu ala la'oela Amak, fo sila MANETUALAIN fo no sila bei-ba'i kai nala kalua leme Masir mai. Ala sene-do'ok neu lamatua daebafa fe'e kala. Hu ndia de, MANETUALAIN fe soe ia tuni nalas.’ ”

¹⁰Salomo nafofo'a MANETUALAIN Uman-na ma manek-ka uma manen-na, nai teuk duahulu dalen-na.

¹¹Mane Hiram-ma, fe basa Salomo-ai kaiou Libanon nala ma ai kaiou biasa boema lilopilas fo ana paluun soaneu nafofo'a uman-ndia so. Ue-le'dis ndia basan boema Mane Salomo-a fe Hiram kota duahulun-nai nusak Galilea.

¹²Boema Hiram neu meten, tehu ta na hiik fefeek ndia fa.

¹³Ana nafa'da Salomo nae, “Tolano nga nei, kota-kota matak leoia kande o fen neu au?” Hu ndia de, nusak ndia bei loken lae Kabul.

¹⁴Hiram haitua basa fe Salomo lilopilas kilo lifun haa lenak so.

¹⁵Mane Salomo pake enok nenik tao bela nusak soaneu nafofo'a MANETUALAIN Uman-na, manek-ka uma manen-na, Yerusalem papala nanadama na ma soaneu ala hulu ladodou dae neu MANETUALAIN Uman-na boboan kona. Ana pake enok matak esa soaneu nafofo'a falik kota Hazor, Megido ma Gezer. (

¹⁶Kota Gezer-ra nde been-na kota fo makahulun-na mane Masir-ra neu sapun-nan de ana sengin, boema ana taonisa laun-na ma ana hotuheni kotan-na. Basa boema, mane Masir-ra fe kota ndia neu anafe'on-na, da'dileo bua palsen nai faik fo ana kabing no Salomo.

¹⁷De Salomo nde nafofo'a falik kota ndia.) Nenik tatao bela nusak-ka boe, de Salomo nafofo'a falik Bet-Horon-Hilir,

¹⁸Baal-laat, ma kota Tamar-ra nai moo solokaek Yehuda,

¹⁹Kota-kota manape'da tua-lepa, boema kota-kota soaneu kaleta musu no ndalan-na mamana hahaen-na. Basa dale tutu'un soaneu nafofo'a uman-nai Yerusalem, Libanon ma nai nusa paletan-na lala'en-na, ana tao nakababasa kasa so.

²⁰Soaneu tao bela nusak ndia de Salomo paleta hataholi-la leme Amori, Het, Feris, Hewi ma Yebus tititi-nonosin-nala mai. Hataholi sila nde been-na leoina Kanaan-na tititi-nonosin fo Israel ta taonisa la'iesa kasa fa, nai lelek fo nangatuu na nusak ndia. Losa besak ia, hataholi sila tititi-nonosin bei da'di ata lahele.

²²Salomo ta tao hataholi Israel-la da'di ata fa; sila bela-ba'un nde ala da'di solda'du, malanga solda'du, malanga solda'du matuaina ma malanga kaleta musu, ma solda'du manasa'e ndala.

²³Ala fe hataholi mana'a ngga'di natun lima limahulu, lanea hataholi manatao bela nusak-kala nai Salomo bela-ba'u mata-matan-nala dalek.

²⁴Dae manai MANETUALAIN Uman-na boboan kona, fo Salomo hulu ladodoun nai lelek saoinan-na, fo nde mane Masir-ra anafe'on-na, ana laliheok neme Dauk kotan-na leo uma manek fo Salomo nafofo'an soaneu saoinan ndia.

²⁵ Teuk esa la'i telu, soona Salomo fe tutunu-hohotu nanatunuk ma tutunu-hohotu mole-dame nai mei tunu-hotuk fo nafadedeik basan soaneu MANETUALAIN so. Boeo ana hotu boomenik soaneu MANETUALAIN. Leondiak, Salomo tao basa MANETUALAIN Uman-na.

²⁶Soaneu solda'du tasi bafa ka soona, Mane Salomo tao ofak kala nai Ezion-Geber, fo deka no Elot nai Namo Akaba, fo nusa Edom-ma, tasisu'u na.

²⁷Mane Hiram-ma haitua ofaisi malela nala fo lakabubua loo Salomo ofaisin-nala.

²⁸Ala leu hai leme nusa Ofir-ra soaneu ala ho'i lilopilas kilo lifun sanahulu haa fo leni fen leo Salomo neu.