Read Termanu 2RAJA-RAJA 10 Bible Online

2RAJA-RAJA 10 - Termanu bible

2RAJA-RAJA 10

¹Mane Ahab-pa, upu-anan hituhulu nai kota Samaria. Hu ndia de, Yehu haitua susulak leo Samaria neu, fo neu basa Ahab upu-anan, ina-aman, fo mananggati ina-ama bongin-na, ma neu manakoasa-la, boema lasi nggolok manai kota ndia. Susulak ndia, liin-na nae leo ia,

²“Ahab upu-anan-nala, lai emi liman dale, de emi makaleta musu, mandalak, matafa-sisilo, ma makota musu. Hu ndia de, emi sipo-ma susulak ia soona, no lai-laik,

³hele-ma, Ahab upu-anan sila-la, see kande malole, fo so'un da'di manek, soona pasak mamates boeo, sa'di masala'en.”

⁴Hataholi manakoasa manai Samaria-la, ala bii lanseli. De lafa'da lae, “Mane Yoram-ma, ma Mane Ahazia boeo, ta bisa la'ban Yehu fa, na muda hata no ita bai!”

⁵Hu ndia de, malanga uma manek-ka, ma walikota, sama-sama no lasi-lasi nggolok-kala, ma basa Ahab upu-anan, ina-aman, fo mananggati ina-ama bongin-na, ala haitua fe Yehu halak-ka nde ia, nae, “Ami makatele neu Tuan, ma ami nau tao su'di beek, fo Tuan paletan neu ami. Neukose, ami ta so'u su'di see boen, fo da'di manek fa. Tuan tao hata fo malole, tunga Tuan mata memeten-na.”

⁶Boema, Yehu haitua fe seluk-kasa susulak. Liin-na nae, “Metema emi mook au, boema emi nau tunga au paletang-ngala soona, taomisa Ahab upu-anan sila-la, fo balahaa, nai faik sama-na leo ia soona, meni langan-nala leo au mai, nai Yizreel.” Mane Ahab-pa upu-anan ka hituhulun sila-la, ala leo loo lasi nggolok manai kota Samaria, de sila nde lafadulis ala.

⁷Ala sipo-la Yehu susulan-na boema, kota Samaria lasi nggolon sila-la, taolisa la'iesak Ahab upu-anan ka 70-k sila-la, de ala tao langan-nala, neu sapai-la dalek, de ala haituas leo Yehu nai Yizreel.

⁸Lafa'da basa Yehu boema, ana fe paleta, fo ela lakatoto'dok langak sila-la, neu bubuak 2 nai kota lelesuinan-na, de ala la'o elas leme ndia, losa fafaik.

⁹Yehu kalua fafaik leo lelesuina neu, boema nafa'da hataholi manalakabubua lai ndia nae, “Au nde tao nakabua makahatuk-ka, fo la'ban Mane Yoram-ma, fo au taoisan; emi salam ta nai dee'ak ia dalek. Tehu, au ta nde taoisa basa hataholi ia-la fa.

¹⁰Buti-na, nde ia nae basa hata lala'en, fo MANETUALAIN nafa'dan, la'eneu Ahab upu-anan-nala, neukose ana da'di. MANETUALAIN nakalala'ok basa hata fo, Ana kokolak-kana tunga atan Elia so.

¹¹ Basa boema, Yehu taonisa la'iesak Ahab tolanoo ka'a-fa'di fe'e-fe'en, fo manaleo nai Yizreel-la, ma basa hataholi mana'a ngga'din-nala, tia-lain-nala, ma imam-imam-nala; ana ta po'ilotak hataholi esa boen, naso'da fa.”

¹²Yehu la'o neme Yizreel mai, de neu leo Samaria neu. Nai eno tala'dak, nai mamanak fo loken lae “Nggolok Manafoo” boema,

¹³natongon-no Ahazia, fo Mane Yehuda tolanoo ka'a-fa'din de'ubee. Boema, natane nae, “See emi?” Ala lataa lae, “Ahazia tolanoo ka'a-fa'din ami. Ami sanga meu leo Yizreel meu, fo donge-dama basa manek-ka teidalen lala'en-na, ma Ina Manek Izebel-la, upu-anan.”

¹⁴Yehu paleta ana paletan-nala nae, “Ho'u-ma hataholi sila no maso'dak!” Boema, ala ho'u-la hataholi sila-la, de ala taolisas, deka no oedolu madak esa. Basa-basas, hataholi 42. Ala ta po'ilotak hataholi esa boen, naso'da fa.

¹⁵Yehu la'ok nakandoo leleo-lala'on. Yonadab fo Rekhab anan-na, ana soluk-kana nai eno tala'dak. Yehu nate'an, ma nae, “Ade, ita dalek esa hetu? O nau tia-to'ba au do ta?” Boema Yonadab nataa nae, “Hei,” Yehu balas-sana nae, “Metema leondiak soona, mai fo taho'u limak.” Ala laho'u limak, de Yehu fali Yonadab, fo ana sa'e leo kaletan dale neu,

¹⁶ma nae, “Mai tunga, fo sakasii matam, tao leo beek de, au manggate anseli soaneu MANETUALAIN.” Boema, ala sa'e kaleta sama-sama leo Samaria leu.

¹⁷Ala losa naa boema, Yehu taonisa Ahab tolanoo ka'a fa'din-nala, de ta ela esa boen. Manada'dik ndia ana da'di, fo nandaa no hata, fo MANETUALAIN nafa'dan neu Elia.

¹⁸Yehu nadenu laun Samaria-la lakabubua, boema nafa'da nae, “Mane Ahab-pa, manggaten-na ta dai, soaneu sene-do'ok neu Baal fa; neukose au manggateng-nga, lena neme ndia mai.

¹⁹Hu ndia de, makabubua basa Baal nabin-nala, ma hataholi manasene-do'ok-kana boema imam-imam-nala; boso ela hataholi esa boen. Neukose Au fe tutunu-hohotuk matuaina, soaneu Baal. See ta mai fa soona, neukose nanahukunisak.” Tehu, Yehu sanga ka'da enok mesak-kana ndia, fo ana taonisa basa hataholi manasongo-tango neu Baal-la.

²⁰Yehu fe paleta nde ia: “Hele-ma, fai hehelik esa, fo sene-do'ok neu Baal!” Boema hataholi-la, hele-la faik ndia boe,

²¹de Yehu po'a-bengan nai Israel-lala'en-na. Nai faik ndia, basa manasongo-tango neu Baal-la, ala mai, de ta ela hataholi esa boen. Ala masok leo Baal uma sosongon dale leu, de uma ndia henun, neme uluk losa dea.

²²Yehu paleta, fo ela manaito-ato uma sosongok ndia bua papaken-nala, fe bua papakek sila-la, leo hataholi manamai sene-do'ok neu Baal-la. Lakala'ok basa paleta ndia boema,

²³Yehu sama-sama no Yonadab, fo Rekhab anan-na, leu leo Baal uma sosongon dale leu, de nafa'da hataholi manai naa-la nae, “Palisak matalolole, ade basa hataholi manai ia-la, ka'da hataholi manasongo-tango neu Baal-la do ta. Boso nalosak, hapu hataholi nggelok lai ia, ala sene-do'ok neu MANETUALAIN.”

²⁴Boema, Yehu ma Yonadab, tunu-hotu tutunu-hohotuk fe Baal. Yehu pe'da basa manamanea, ma malanga solda'du manai lain 80, lai deak so. Ana fes paleta nde ia so, nae, “Emi muse taomisa la'iesak hataholi sila-la. See po'ilotak hataholi sila-la, esa nalai soona, neukose hataholi ndia nanataonisak!”

²⁵Yehu tunu-hotu basa tutunu-hohotuk tutika, neu leo deak neu, de nafa'da manamanea-la, ma malanga solda'du manai lain sila-la nae, “Meu leo dalek meu leona, fo taomisa la'iesa kasa. Boso po'ilotak, esan-nala deak boen!” Boema, leu leo dalek leu, no ala ho'u tafaina, de ala taolisa la'iesak hataholi manai sila-la, boema ala loso mamates sila-la, leo deak neu. Basa boema, leu leo uma sosongok-ka, kaman manai dalek-ka leu,

²⁶de ala kalua heni Baal dodoki-dudulan, de ala hotu henis.

²⁷Ala tao lakalulutuk dodoki-dudulak ndia, sama-sama no uman-na, boema ala tao mamanak ndia, da'di mamana teteik, ma momoek, losa faik ia.

²⁸Boema, Yehu taonisa la'iesak manasongo-tangok neu Baal manai Israel-la lala'en-na.

²⁹ Hu ndia de, MANETUALAIN nafa'da Yehu nae leo ia, “Basa hata lala'en, fo Au paletan neu o, fo o taon neu Ahab tititi-nonosin-nala, o taon so. Hu ndia de, Au aheluk, ae o upu-anam, losa tititi-nonosi ka 4, neukose da'di manek neu Israel.” Tehu, Yehu ta tunga Amak, fo Israel MANETUALAIN-na, hoholo-lalanen no dale katema tuak fa. Ana tunga Yerobeam tatao-nono'in, fo ana taon-na hataholi Israel-la lasala-lasingo nenik, ala sene-do'ok neu sapi lilopilas fo, lapadedeik-kana nai Betel ma Dan.

³²Nai lelek ndia, MANETUALAIN mulai tao nama ana nusa Israel-la. Hazael, fo mane Siria, natona-na basa nusa Israel-la lala'en fo,

³³nai Lee Yarden-na boboan dulu, losa leo kona neu, fo dodook kota Aroer-ra, deka Lee Arnon-na, de nai dalek hapu nusa Gilead ma Basan, fo leo Gad, Ruben ma Manasye mamana leleon-nala.

³⁴Tutui fe'ek la'eneu Yehu, ma palani tati batu-na, tatao-nono'i malolen-nala, nanasulak nai Manek-manek Israel-la, susula Tutuin dale.

³⁵Yehu paleta da'di leo Manek Israel-la, teuk 28 dalen-na. Maten, de latoin nai Samaria. Boema anan Yoahas nggatin da'di Manek.